Jeremia 46 - ÎVUKU RÎA ÛVORO MWARO

Mûthamaki wa Misiri nîwavootirwe arî Karikemishi

¹ Kiugo Kîam Ngai-Mûnene nîgîakinyîre mûrathi Jeremia îgûrû rîgiî mavûrûri.

² Ûvoro wîgiî Misiri: aaugire atî, athigari a mbaara a mûthamaki wa Misiri arîa marî vakuvî na Karikemishi vakuvî na rûnjî rwa Farati, arîa Nebukadinezarû mûthamaki wa Babuloni aavotire mwakarî wa kana wa wathani wa Jehoiakimu mûvîcî wa Josia, mûthamaki wa Juda. Ngai-Mûnene augîte atîrî:

³ “Varîriani ngo nene na nini, mûthiî mûkarûe mbaara.

⁴ Ovani mbarathi mîkwa na mûciîkarîre, norani matumû menyu! Îkîrani ngovia cia cuuma cia kûgitîra kîongo na mwîvarîrie! Mûndû nîekîre indo ciake cia mbaara cia kwîgitîra!

⁵ “Nwatî nîndûî nîrona? Nîmacokete na vuva. Njamba ciao cia mbaara nî mvoote, na makaûra na îvenya, wana matiraroria na vuva. Guoya wîcûrîte kûndû kuonthe. Ûguo nîguo Ngai-Mûnene arauga.

⁶ Arîa marî îvenya mativotaga kûûra, wana athigari njamba matingîvota kwîthara, mwena wa rûgûrû wa rûnjî rwa Farati, nîavîngîce na makagwa.

⁷ Nîûrîkû ûyû wîkariî ta rûnjî rwa Nilo, ta nyûnjî ciîcûrîte ikauna?

⁸ Misiri îcûraga ta rûnjî rwa Nilo, ta nyûnjî irîa ciîcûraga ikauna. Aaugire atî nîngwîcûra nginya ngunîkîre nthî, nîngacûkangia matûûra vamwe na arîa matûûraga kuo.

⁹ Thiîni na mbere mue mbarathi, tharîkîrani mue ikaari cia mbarathi! Athigari a mbaara nîmaumagare, arûme a Ethiopia na Puti arîa makuuaga ngo, arûme a Ludi arîa maicî kûratha na ûta.”

¹⁰ Mûthenya ûcio nî wa Ngai-Mûnene Mwene Vinya Wonthe, nî mûthenya wa kwîrîvîrîria; mûthenya wa kwîrîvîrîria kûrî nthû ciake. Rûviû nîrûkamathiria na rwîganîre, na rûnyue nthakame yao rûvae. Nîûndû Ngai-Mûnene mwene vinya arî na îgongoona, kûu mwena wa rûgûrû vakuvî na rûnjî rwa Farati.

¹¹ Unûkiani Gileadi na mwîvake ndawa mue andû a Misiri! Mûtûmîrîte ndawa nyîngî mana, na mûtikaavona.

¹² Mavûrûri nîmeguîte gîconoko kîenyu, na nthî îcûrîtwe nî kîrîro kîenyu; nîûndû athigari njamba maravîngîcana o ene kwa ene; onthe vamwe nîagwîu.

Misiri nînthithûkîre

¹³ Kiugo Kîam Ngai-Mûnene nîgîakinyîre mûrathi Jeremia kîgiî Nebukadinezarû mûthamaki wa Babuloni akîthiî kûtharîkîra vûrûri wa Misiri akîrwa atîrî,

¹⁴ “Anîrîra vûrûrirî wa Misiri, na ûmenyithanie kûu Migidoli, anîrîra kûu Memufisi na Tahipanesi. Meere atî: ‘Îkarani mwîvarîrîtie, nîûndû mbaara nîgaacûkangia kûndû kuonthe.’

¹⁵ Apisi ngai yaku yavinyûrire nîkî? Ndegwa yaku îrîa îrî vinya yagwîre nîkî? Nîûndû Ngai-Mûnene nîwamîgwîthirie nthî!

¹⁶ Andû engî nîmaavîngirwe na makîgwa, nao nîmeeranire o ene atî: ‘Ûkîrani tûcoke kûrî andû etû, vûrûrirî wetû kûrîa twaciarîrwe, tûrîre mbaara ya nthû cietû.’

¹⁷ “Îta Faraû mûthamaki wa Misiri rîîtwa rîrî, ‘Mûndû wa înegene rîa mana.’

¹⁸ Wata ûrîa nie Mûthamaki ndûûraga mwoyo, nie Ngai-Mûnene mwene vinya wonthe, nthû nîgaûka kûmûtharîkîra, ta Taboru gatagatî ka irîma, na ta kîrîma gîa Karimeli kîrî rûtere rwa îria.

¹⁹ Mue atûûri a Misiri, varîriani mîrigo yenyu nîguo mûthiî îthamîriorî! Nîûndû îtûûra rîa Memufisi nîrîgacûkangua viû, rîgaatuîka îganjo kûndû gûtatûûragwa nî andû.

²⁰ Misiri nî ta mori nthaka, nwatî kîvogo kuuma mwena wa rûgûrû nîgîkûtharîkîrîte.

²¹ Wana athigari ake a gûkomborwa, nîta njaû noru; wanao nîagarûrûku makavinyûra vamwe, matiavota kûmîrîria, nîûndû mûthenya wao wa gûcûkangua nî mûkinyu, îvinda rîao rîa kûverithua nîrîkinyu.

²² Misiri îrutaga mûgambo ta wa njoka, nîûndû nthû ciake imûthithûkagîra na vinya, imûthithûkagîra na mathanwa ta atemi a mîtî.

²³ Nîmagaatema mûtitû wake wana ethîrwa ndûngîtonyeka, nîûndû o nî eengî gûkîra ngige matingîtarîka. Ûguo nîguo nie Ngai-Mûnene nauga.

²⁴ Andû a Misiri nîmagaconorithua, nîmakaarekererua kûrî andû a mwena wa rûgûrû.”

²⁵ Ngai-Mûnene mwene vinya wonthe Ngai wa Isiraeli augire atîrî, “Taroria, nie nîngaverithia Amoni ngai ya Thebesi, Misiri na ngai ciake na athamaki ake, vamwe na andû arîa mamwîtîkîtie.

²⁶ Nîngamanenganîra kûrî Nebukadinezarû mûthamaki wa Babuloni na athigari ake arîa mendaga kûmaûraga. Vuvarî vûrûri wa Misiri nîûkaagîa na andû wata arîa maarî kuo mbere. Ûguo nîguo nie Ngai-Mûnene nîrauga.

Ngai-Mûnene nîakaavonokia andû ake

²⁷ “Nwatî we Jakovu ndungata yakwa ndûgetigîre, mue andû a Isiraeli mûtikamake; nîûndû nîngakûvonokia nîrî kûraca, nîngavonokia njiarwa ciaku kuuma vûrûri ûrîa maathamîrue. Jakovu nîagaacoka mûciî avurûke na agîe na thayû, na gûtirî mûndû wanarî ûmwe ûkaamwîguithia guoya.

²⁸ Ngai-Mûnene arauga atî: ndûgetigîre we Jakovu ndungata yakwa, nîûndû nîrî vamwe nawe. Nîngacûkangia mavûrûri monthe mathire, kûrîa kuonthe nakûnyaganîrie, nwatî we ndigaagûcûkangia ûthira. Nîngakûverithia ûrîa kwagîrîrîte, ndigaagûtiga ndakûverithîtie.”