Jeremia 44 - ÎVUKU RÎA ÛVORO MWARO

Ndûmîrîri ya Ngai-Mûnene kûrî andû a Isiraeli arîa maarî Misiri

¹ Kiugo Kîam Ngai-Mûnene nîgîakinyire kûrî Jeremia kîgiî Ayahudi onthe arîa maatûûraga Misiri matûûrarî ma Migidoli, Tahifanihesi, Memufisi na gîcunjî Kîam Pathirosi.

² “Ngai-Mûnene, mwene vinya wonthe, Ngai wa Isiraeli arauga atî: We nîwonete maûndû monthe macûku marîa mbîkîte îtûûrarî rîa Jerusalemu na matûûra monthe ma Juda. Taroria, nginya ûmûnthî matûûra mau nî maganjo, na gûtirî mûndû ûtûûraga kuo.

³ Mbîkîte ûguo nîûndû wa maûndû macûku marîa mekire na magîtûma ndakare. Nîmaavîvîrie ngai cia mîvuanano ûbani na makîgooca ngai irîa o, we kana methe mao mataaicî.

⁴ Mavinda meengî nînatûmire arathi ndungata ciakwa kûrî mue, ngîmwîra atî, ‘Mûtigeke maûndû mama macûku ûguo nthûrîte!’

⁵ Nwatî gûtirî mûndû wambîguire kana akînthikîrîria nîguo matigane na waganu na kûvîvîria ngai ng'eni ûbani.

⁶ Kwoguo nînakanirwe mûno nî marakara na mang'ûrîka na ngîmetûrûra matûûrarî ma Juda na njîrarî cia Jerusalemu. Nakuo gwatuîkire maganjo, kûndû gûtatûûragwa nî andû nginya ûmûnthî.

⁷ “Na rîu Ngai-Mûnene, Ngai mwene vinya wonthe, Ngai wa Isiraeli arakûûria atî: Nîndûî gîtûmîte mwîreterera maûndû macûku ûguo, na mwîcûkangia mue ene? Gûtirî mûndû wanarî ûmwe wenyu ûtigarîte Juda, mûndûmûrûme kana mûndûmûka, ngenge na ciana.

⁸ Mûrandakaria nîkî mûkîgooca ngai irîa mwîrûthîrîte mue ene, na kûvîvîria ngai cia mîvuanano ûbani Misiri kûrîa mûraûkire gûtûûra? Mûrenda gwîcûkangia mue ene na gûtuîka kîrumi na gîconoko mbere ya mavûrûri monthe ma nthî?

⁹ Nîkwa mûriganîrîtwe nî waganu wa methe menyu, waganu wa athamaki a Juda, wa aka ao, waganu wenyu na wa aka enyu ûrîa mwekire matûûrarî ma Juda na njîrarî cia Jerusalemu?

¹⁰ Nginya ûmûnthî mûtianenyivia kana mwîndigîra wana mûrûmîrîra watho wakwa na maathani makwa marîa namûveere na ngîva methe menyu.”

¹¹ Kwoguo Ngai-Mûnene mwene vinya wonthe, Ngai wa Isiraeli arauga atîrî, “Taroria, nîngûmûgarûrûkîra na nîmûretere mûthiro nthirie andû a Juda.

¹² Nîndiga nona atî andû a Juda arîa matigarîte na arîa matuîte atî nîmathiî gûtûûra Misiri nîmathira onthe, anene na anini. Nîmakuîra gûkû Misiri, marî mbaararî na makue nî yûra. Nîmagaatuîka gîko, kîndû gîa kûmakania, kîrumi na gîconoko.

¹³ Nîngaverithia arîa matûûraga Misiri wata ûrîa naverithirie Jerusalemu na mbaara, yûra na mîrimû mîcûku.

¹⁴ Kwoguo gûtirî mûndû wanarî ûmwe wa arîa matigarîte Juda, na mathiîte gûtûûra Misiri, ûkavonoka kana atûûra mwoyo kana acoka vûrûrirî wa Juda kûrîa meriragîria gûcoka gûtûûra. Matigacoka kuo tiga andû amwe arîa matûûraga maûrûraga.”

¹⁵ Nao arûme onthe arîa maamenyire atî aka ao maarî avîvîriu ngai ng'eni ûbani na aka onthe arîa maarûngamîte vau, gîkundi kînene Kîam andû vamwe na andû a Isiraeli arîa maatûûraga Pathirosi vûrûrirî wa Misiri nîmaacokerie Jeremia atîrî,

¹⁶ “Tue tîtûthikîrîria ndûmîrîri îo watûva kuuma kûrî Ngai-Mûnene.

¹⁷ Nwatî ûrîa wonthe twîvîtîte nîtûgwîka, nîguo tûgwîka. Nîtûkûvîvîria ngai yetû îrîa îtagwa mûthamaki wa mûndûmûka wa kûu îgûrû, na twîtûrûre ndivei nthî îrî îgongoona kûrî ke wata ûrîa twekaga methe metû, athamaki etû, na atongoria etû tûrî matûûrarî ma Juda na njîrarî cia Jerusalemu. Vîndî îo twarî na irio cia kwîgana, twarî athatûke, na tûtiarî na thîna.

¹⁸ Nwatî kuuma twatiga kûvîvîria mûthamaki wa mûndûmûka wa îgûrû na gwîtûrûra ndivei nthî îrî îgongoona kûrî ke, twîthîrîtwe tûtarî na kîndû, na tûkathirua nî mbaara na yûra.”

¹⁹ Nao aka nîmaaugire atîrî, “Rîrîa twavîvîrie mûthamaki mûndûmûka wa kûu îgûrû ûbani na tûgîtûrûra ndivei nthî îrî îgongoona kûrî ke, twavetwe rûtha nî athuuri etû. Wana nîtwamûrugîre tûmîgate tûcoretwe mbica yake na tûgîtûrûra ndivei nthî îrî îgongoona kûrî ke.”

²⁰ Nake Jeremia nîwacokire akîra andû onthe, arûme wana aka, arîa maamûcokeretie ûguo atîrî,

²¹ “Mue, methe menyu ma tene, athamaki na atongoria enyu, vamwe na andû a vûrûri, nîmaarutire magongoona matûûrarî ma Juda, na varavararî cia Jerusalemu. Nwatî Ngai-Mûnene nîwamenyire maûndû mau na ndaariganîrwa.

²² Ngai-Mûnene ndangîavotire kûmîrîria rîngî maûndû macûku na marî mûgiro marîa mwekîte. Kwoguo kîu nîkîo gîtûmîte vûrûri wenyu ûtuîka îganjo, werû, kîrumi na kûndû gûtatûûraga andû nginya ûmûnthî.

²³ Maûndû mama macûku ûguo mekîkîte kûrî mue nîûndû nîmwîvîrîtie Ngai-Mûnene na njîra ya kûrutîra ngai ciîngî magongoona na kûrega kwathîkîra watho wake, kûrega kwathîkîra maathani make.”

²⁴ Jeremia nîwerire andû onthe na aka onthe atîrî, “Tathikîrîriani ndûmîrîri ya Ngai-Mûnene mue andû onthe a Juda na mûtûûraga vûrûrirî wa Misiri.

²⁵ Ngai-Mûnene mwene vinya wonthe, Ngai wa Isiraeli arauga atî: Mue vamwe na aka enyu nîmwarîtie na mûkavingia mûkiugaga atî, ‘Nwanginya tûvingie maûndû marîa twevîtire tûkiuga nîtûgwîka, kûvîvia ûbani na kûrutîra mûthamaki mûndûmûka wa îgûrû magongoona ma ndivei.’ Thiîni na mbere kûvingia mîvîtwa yenyu.

²⁶ Kwoguo ta thikîrîriani kiugo Kîam Ngai-Mûnene mue andû Juda na mûtûûraga vûrûri wa Misiri: nevîta na rîîtwa rîakwa rînene atî, ndigetîkîria mûndû wana ûmwe gatagatîrî kenyu evîta na rîîtwa rîakwa akiugaga atî, ‘wata ûrîa Ngai-Mûnene atûûraga mwoyo.’

²⁷ Nîngûroria mone atî ngakûretagîra maûndû macûku na ndûkona maûndû maro. Andû onthe a Juda arîa marî Misiri nîmagacûkangua na yûra na mbaara mathire viû.

²⁸ Nwatî andû anini enyu nîmakavonoka gîkuû na maume Misiri macoke Juda. Na andû onthe a Juda arîa maatigarîte na maathiîte gûtûûra Misiri, nîmakaamenya nî ciugo ciao kana nî ciakwa ciama.

²⁹ Ngai-Mûnene arauga atî nîguo mûmenye atî maûndû macûku marîa naririe îgûrû rîenyu nîmavinga, nîngaamûverithîria gûkû. Gîkî nîkîo gîgatuîka kîmenyithia kûrî mue.

³⁰ Nîngaarekereria Hofira mûthamaki wa Misiri kûrî nthû ciake na kûrî arîa mamûcaragia mamûûrage, wata ûrîa naarekererie Hezekia mûthamaki wa Juda kûrî Nebukadinezarû mûthamaki wa Babuloni ûrîa warî nthû yake na wendaga kûmûûraga.”