Jeremia 43 - ÎVUKU RÎA ÛVORO MWARO

Jeremia nîwavirirwe Misiri

¹ Rîrîa Jeremia arîkirie kwîra andû onthe ciugo cionthe irîa Ngai-Mûnene, Ngai wao amwathîte ameere,

² Azaria mwana wa Hoshaia, Johanani mûvîcî wa Karea na andû onthe etîi, nîmerire Jeremia atîrî, “Ngai-Mûnene Ngai wetû, ndaagûtûma ûtûîre tûtikathiî Misiri tûgatûûre kuo.

³ Baruku mûvîcî wa Neria nîke ûkûringîrîrîtie warie maûndû mama, nîguo twîkare gûkû tûcoke tûûragwe nî Akalidei, kana matûvire îthamîriorî Babuloni.”

⁴ Kwoguo Johanani mûvîcî wa Karea na anene onthe a athigari a mbaara vamwe na andû onthe, matiathîkîra mûgambo wa Ngai-Mûnene, atî mekare vûrûrirî wa Juda.

⁵ Nwatî Johanani mûvîcî wa Karea na anene onthe a athigari a mbaara nîmocire andû onthe a Juda arîa matigarîte na arîa maacokete kûu vûrûrirî wa Juda kuuma mavûrûrirî monthe kûrîa maanyaganîrîtue.

⁶ Andû acio maarî: Arûme, aka, ciana, erîtu a mûthamaki, na andû onthe arîa Nebuzaradani mûnene wa arangîri aatigîte na Gedalia mûvîcî wa Ahikamu, na ûmawe aarî Shafani; nîmoocire wana Jeremia na Baruku mûvîcî wa Neria.

⁷ Andû acio nîmaathiîre vûrûrirî wa Misiri, nîûndû nîmareganire na Ngai-Mûnene, na nîmaathiîre magîkinya îtûûrarî rîtagwa Tahifanihesi.

⁸ Marî kûu Tahifanihesi Ngai-Mûnene nîwaririe na Jeremia akîmwîra atîrî,

⁹ “Oca mathiga manene, na ûmathike gatagatî ka matuvarî marîa marî mwîrîgarî wa mûciî wa mûthamaki wa Misiri îtûûrarî rîa Tahifanihesi, andû a Juda makîonaga.

¹⁰ Nîûgacoka wîre andû a Juda atî: Ngai-Mûnene mwene vinya wonthe, Ngai wa Isiraeli augîte atî: nîngatûma ndungata yakwa mûthamaki Nebukadinezarû wa Babuloni, nake nîakaiga gîtî gîake Kîam ûthamaki îgûrû rîa mathiga mama nathika ava, na aige îgema rîake rîa ûthamaki îgûrû rîa mo.

¹¹ Nîagaaûka na acûkangie vûrûri wa Misiri. Arîa maavangîrîtwe kûûragwa na mîrimû nîmakaaûragwa nayo, arîa maavangîrîtwe gûtavwa mavirwe îthamîriorî nîmagaatavwa, arîa maavangîrîtwe kûragîrwa mbaararî nîmakaaûragîrwa kuo.

¹² Nîakaavîvia hekarû cia ngai cia Misiri na mwaki na acoke avîvie ngai cia mîvuanano na icio ciîngî aitave athiî nacio Babuloni. Ta ûrîa mûrîthi atoraga kavuti gake ndaa gakathera, nwa ta guo Nebukadinezarû akaûngania andû mathire vûrûrirî wa Misiri na aume kuo na ûvootani.

¹³ Nîakomomora itugî cia mathiga ma kîririkano irîa irî Heliopoli vûrûrirî wa Misiri na avîvie hekarû cia ngai cia mîvuanano cia Misiri.”