Jeremia 42 - ÎVUKU RÎA ÛVORO MWARO

Andû nîmaaûririe Jeremia amavoere

¹ Atongoria onthe a athigari a mbaara, Johanani mûvîcî wa Karea, na Azaria mûvîcî wa Hoshaia na andû onthe anene na anini,

² nîmaathiîre kûrî Jeremia na makîmwîra atîrî, “Wenda tu thikîrîria ûrîa tûrakûria! Îtîkîra gûtûthaithanîra kûrî Ngai-Mûnene Ngai waku, nîûndû wa andû aya matigarîte, (nîûndû twarî andû engî nwatî rîu tûtigarîte tûrî anini tu, wata ûguo ûrona).

³ Tûvoere nîguo Ngai-Mûnene Ngai wetû atwonie njîra îrîa arenda tûrûmîrîre na ûrîa arenda twîke.”

⁴ Nake Jeremia nîwamacokerie atîrî, “Nîwaro nînegua; rîu nîngûvoya Ngai-Mûnene Ngai wenyu wata ûrîa mwambûria, na ûrîa wonthe akanjokeria nîngûmwîra, ndikamûthitha wanarî ûndû.”

⁵ Nao andû nîmaacokire makîra Jeremia atîrî, “Ngai-Mûnene arotuîka mûira wa ma na mwîvokeku wa kwonania ûcûku wetû, ethîrwa tûtigeeka kûringana na ûrîa Ngai-Mûnene, Ngai waku agûkwatha ûtwîre.

⁶ Ethîrwa nî ûndû mwaro kana mûcûku, tue nîtûkwathîkîra mûgambo wa Ngai-Mûnene Ngai wetû, ûrîa tûragûtûma kûrî ke nîguo maûndû metû magîre twathîkîra Ngai-Mûnene Ngai wetû.”

Ngai-Mûnene nîwacokirie îvoya rîa Jeremia

⁷ Vuva wa mîthenya îkûmi kiugo Kîam Ngai-Mûnene nîgîakinyîre Jeremia.

⁸ Jeremia nîwacokire agîta Johanani mûvîcî wa Karea na atongoria onthe a athigari a mbaara vamwe na andû onthe, anene na anini, na akîmeera atîrî,

⁹ “Ngai-Mûnene Ngai wa Isiraeli ûrîa mwandûmire ngamûthaithanîre kûrî ke, augîte atî:

¹⁰ Ethîrwa nîmûgwîkara gûkû vûrûrirî ûyû, nie nîngûmwaka na tînîmwomomora, nîngûmûvanda na tînîmûkûûra; nînîrirîte nîûndû wa maûndû macûku marîa mbîkîte mbere yenyu.

¹¹ Mûtigetigîre mûthamaki wa Babuloni ûrîa mwîtigagîra; mûtikamwîtigîre wana vanini; ûguo nîguo Ngai-Mûnene arauga. Nie nîrî vamwe namue nîguo nîmûvonokie na nîmûtethûre kuuma kûrî ke.

¹² Nîngamwîguîra ntha na ndûme mûthamaki wana ke amwîguîre ntha na amûrekie mûtûûre vûrûrirî wenyu.

¹³ “Nwatî mûngîkauga atî, ‘Tî twîkara vûrûrirî ûyû,’ na mûcoke mûtige kûrûmîrîra Ngai-Mûnene, Ngai wenyu,

¹⁴ na muge atî mûrenda kûthiî gûtûûra Misiri, kûrîa mûtagaacemania na mbaara kana mwîgua mûgambo wa tûrumbeta, kana mûtura irio;

¹⁵ kwoguo, ta thikîrîriani mue arîa mwatigirwe Juda ûrîa Ngai-Mûnene mwene vinya wonthe, Ngai wa Isiraeli arauga: Ethîrwa nîmûtuîte kûthiî gûtûûra Misiri,

¹⁶ mbaara îrîa mwîtigagîra nîikaamwîthîrîria kuo, na yûra rîrîa mwîtigagîra nîmûgaacemania narîo kûu Misiri na nîmûgaakuîra kuo.

¹⁷ Andû onthe arîa meriragîria kûthiî Misiri nîmagaakuîra kuo nî mbaara, yûra na mîrimû mîcûku. Gûtirî mûndû wanarî ûmwe ûgatigara, kana avonoke kuumana na mûthiro ûrîa ngamaretera.

¹⁸ “Ngai-Mûnene mwene vinya wonthe, Ngai wa Isiraeli arauga atî: wata ûrîa marakara na mang'ûrîka makwa makinyîre andû arîa matûûraga Jerusalemu, nwa ta guo marakara makwa makamûkinyîra, ethîrwa nîmûkûthiî Misiri. Mûgaatuîka ta kîndû gîa kûmenwa, kîndû gîa kûmakania, kîrumi, na gîconoko. Mûtikona gûkû tûrî rîngî.”

¹⁹ Jeremia nîwathiîre na mbere kwîra andû atîrî, “Mue andû a Juda arîa mwatigarire, Ngai-Mûnene aramwîra mûtikathiî Misiri. Menyani atî ûmûnthî nînamûkania

²⁰ namwîra atî mûrî aûru, na mûtûûrîre wenyu ûrî ûgwatirî nîûndû nîmwandûmire kûrî Ngai-Mûnene Ngai wenyu na mûkîmbîîra atî, ‘Tûvoere kûrî Ngai-Mûnene Ngai wetû, na ûrîa wonthe Ngai-Mûnene Ngai wetû akauga, nîtûgeka.’

²¹ Ûmûnthî nie nînamwîra ûrîa wonthe Ngai-Mûnene Ngai wenyu andûmire kûrî mue, namue mwarega gwîtîkia.

²² Kwoguo, rîu menyani nama atî kûndû kûu mwîrirîrîtie kûthiî gûtûûra, nîmûgaakuîra kuo nî mbaara, yûra na mîrimû.”