Jeremia 41 - ÎVUKU RÎA ÛVORO MWARO

¹ Mweri wa mûgwanja, Ishumaeli mûvîcî wa Nethania, na ûmawe Elishama wa nyomba ya ûthamaki, ûmwe wa atongoria arîa anene a mûthamaki nîmaathiîre Mizipa kwa Gedalia marî andû îkûmi. Vîndî îrîa marîcaga irio kûu Mizipa,

² Ishumaeli mûvîcî wa Nethania vamwe na andû arîa îkûmi, nîmaatharîkîre Gedalia mûvîcî wa Ahikamu na makîmûraga. Gedalia nîke wathuurîtwe nî mûthamaki wa Babuloni atuîke mûnene wa vûrûri ûcio.

³ Ishumaeli nîwaûragire Ayahudi onthe arîa maarî na Gedalia Mizipa, vamwe na athigari a Akalidei arîa maarî vau.

⁴ Mûthenya ûcio wîngî vuva wa Gedalia kûûragwa, na mbere ya andû mamenya ûrîa gwîkîkîte,

⁵ andû anana maumîte Shekemu, Shilo na Samaria nîmaakinyire. Nao menjetwe nderu, na marî na nguo ndembûkangu na metemangîte mîîrî nîguo monanie atî nîmarenyerekia. Maakuîte matega ma irio cia mîgûnda na ûbani mavirîte hekarûrî ya Ngai-Mûnene.

⁶ Nake Ishumaeli mîvîcî wa Nethania nîwaumire Mizipa na agîûka kûmatûnga akîrîraga. Nake amatûnga nîwamerire atîrî, “Ûkani mûkone Gedalia mûvîcî wa Ahikamu.”

⁷ Rîrîa maatonyire îtûûrarî, Ishumaeli mûvîcî wa Nethania, na arûme arîa maarî nake nîmaûragire andû acio, na magikia ciimba ciao kîrikorî Kîam manjî.

⁸ Nwatî gatagatî ka andû acio vaarî na arûme îkûmi arîa merire Ishumaeli atîrî, “Ndugatûrage nîûndû tûrî na ngano, cairi, maguta na ûûkî tûthithîte mîgûndarî.” Kwoguo Ishumaeli ndaamaûraga.

⁹ Kîriko Kîam manjî kîrîa Ishumaeli aikirie ciimba cia andû arîa aûragîte, Kîamrî kînene na kîenjîtwe nî mûthamaki Asa, akîîgitîra kuuma kûrî mûthamaki Baasha wa Isiraeli. Ishumaeli nîwecûririe îrima rîu na ciimba irîa aaûragîte.

¹⁰ Ishumaeli nîwacokire agîtava erîtu a mûthamaki na andû acio engî maatigarîte marî Mizipa, arîa Nebuzaradani mûnene wa arangîri aatuîte Gedalia mûmenyereri wao. Ishumaeli mûvîcî wa Nethania nîwamatavire na akîringa nao vûrûri wa Aamoni.

¹¹ Johanani mûvîcî wa Karea na atongoria onthe a athigari a mbaara nîmegwire maûndû monthe macûku marîa Ishumaeli mûvîcî wa Nethania eekîte.

¹² Kwoguo nîmoocire arûme ao onthe na makîthiî kûrûa na Ishumaeli mûvîcî wa Nethania. Maamwîthîre ndiarî nene îrîa îrî Gibeoni.

¹³ Rîrîa andû onthe arîa maarî na Ishumaeli moonire Johanani mûvîcî wa Karea na atongoria ake onthe a ikundi cia mbaara, nîmaakenire mûno.

¹⁴ Kwoguo andû onthe arîa matavîtwe nî Ishumaeli kuuma Mizipa, nîmaagarûrûkire na magîcoka makîthiî kûrî Johanani mûvîcî wa Karea.

¹⁵ Nwatî Ishumaeli mûvîcî wa Nethania, vamwe na andû anana nîmaaûrire kuuma kûrî Johanani na makîthiî vûrûrirî wa Aamoni.

¹⁶ Nake Johanani mûvîcî wa Karea na atongoria onthe a athigari a mbaara arîa maarî nake nîmocire andû onthe arîa Ishumaeli mûvîcî wa Nethania aatavîte kuuma Mizipa vuva wa kûraga Gedalia mûvîcî wa Ahikamu. Andû acio maarî athigari, aka, ciana na ngaramba. Johanani nîwamacokirie onthe kuuma Gibeoni.

¹⁷ Nao nîmaathiîre kwao, na magîkara kûu Geruthi Kimuhamu vakuvî na Bethilehemu magîciria kûthiî Misiri,

¹⁸ nîûndû nîmetigagîra Akalidei kuuma vîndî îrîa Ishumaeli mûvîcî wa Nethania aaûragire Gedalia mûvîcî wa Ahikamu ûrîa wathuurîtwe atuîke mûnene wa vûrûri ûcio.