Jeremia 40 - ÎVUKU RÎA ÛVORO MWARO

Jeremia nîwatûûranirie na Gedalia

¹ Kiugo nîgîakinyîre Jeremia kuuma kûrî Ngai-Mûnene vuva wa kûrekererua aume Rama nî Nebuzaradani mûnene wa arangîri a mûthamaki. Mûnene ûcio wa arangîri nîwocete Jeremia arî mwove na mvîngû vamwe na andû kuuma Jerusalemu na Juda arîa onthe maanyitîtwe mavirwe îthamîriorî Babuloni.

² Mûnene wa arangîri nîwocire Jeremia na akîmwîra atîrî, “Ngai-Mûnene Ngai waku nîwaugire atî nîagaacûkangia vandû ava,

³ na rîu nîwavingia ûndû ûcio, na eka wata ûrîa augire. Maûndû mama mekîkîte kûrî mue nîûndû nîmwevîrie Ngai-Mûnene na mûkîrega kûmwathîkîra.

⁴ Rîu, nîngûkwovora mvîngû njara. Ethîrwa nîûkwona kwagîrîte tûthiî nawe Babuloni, ûka tûthiî, na nîngûkûmenyerera waro. Nwatî ethîrwa ndûrona kwagîrîrîte tûthiî nawe Babuloni, ndûgaûke. Ûrîmwîtîkîrie kûthiî vandû wa vonthe ûngîenda vûrûrirî ûyû.

⁵ “Weciria gûtigwa gûkû, coka kûrî Gedalia mûvîcî wa Ahikamu, mûvîcî wa Shafani. Gedalia nîwathuurirwe nî mûthamaki wa Babuloni atuîke wa kwatha matûûra ma Juda. Îkaraniani nake na mûtûûranie na andû acio engî, kana ûthiî varîa ûkwona vakwagîrîrîte.” Kwoguo mûnene wa arangîri nîwavere Jeremia kîveo na irio na akîmûrekia athiî.

⁶ Jeremia nîwacokire akîthiî Mizipa kûrî Gedalia mûvîcî wa Ahikamu na magîkara nake vamwe na andû arîa maatigirwe kûu vûrûrirî.

Gedalia, mûnene wa Juda

⁷ Anene onthe a athigari a mbaara vamwe na andû ao nîmegwire atî mûthamaki wa Babuloni nîwathuurîte Gedalia mûvîcî wa Ahikamu atuîke mûnene wa vûrûri. Wana nîmegwire atî nîwamûtuîte mûrûngamîrîri wa arûme, aka, na ciana na andû arîa athîni arîa mataavirwa îthamîriorî Babuloni.

⁸ Kwoguo anene acio nîmaathiîre Mizipa kwona Gedalia. Nao maarî: Ishumaeli mûvîcî wa Nethania, Johanani mûvîcî wa Kareya, Seraia mûvîcî wa Tanihumethi, avîcî a Efai kuuma Netofa na Jezania mûvîcî wa Maaka.

⁹ Nake Gedalia nîwevîtire mbere yao na mbere ya athigari a mbaara na akiuga atîrî, “Mûtigetigîre gûtungatîra Akalidei. Tûûrani vûrûrirî ûyû na mûtungatîre mûthamaki wa Babuloni, na maûndû menyu monthe nîmakûvua.

¹⁰ Nie nîndûûra Mizipa na nûngame vandûrî venyu kûrî Akalidei arîa magaûka gûkû; nwatî mue ûnganiani ndivei, matunda, maguta na mûtûûre matûûrarî marîa mûtavîte.”

¹¹ Ayahudi onthe arîa maarî Moabu, Amori, na Edomu na mavûrûri mau meengî, nîmegwire atî mûthamaki wa Babuloni nîwatigîte andû amwe Juda, na atî nîwathuurîte Gedalia mûvîcî wa Ahikamu, mûvîcî wa Shafani atuîke mûnene wao.

¹² Kwoguo onthe nîmaumire mavûrûrirî monthe kûrîa maanyaganîtie, na makîthiî vûrûrirî wa Juda, kwa Gedalia kûu Mizipa. Nao nîmaaûnganirie ndivei na matunda meengî mûno.

Gedalia Nîwaûragirwe

¹³ Kwoguo Johanani mûvîcî wa Karea vamwe na atongoria a athigari a mbaara kuuma vûrûrirî ûtarî andû, nîmaathiîre Mizipa kûrî Gedalia,

¹⁴ na makîmwîra atîrî, “Ûrî mûmenyu atî Baalisi mûthamaki wa Aamori nîmûtûmu Ishumaeli mûvîcî wa Nethania aûke akûrage?” Nwatî Gedalia mûvîcî wa Ahikamu ndetîkia ûvoro ûcio.

¹⁵ Johanani mûvîcî wa Karea nîwacokire akîaria na Gedalia na nthitho kûu Mizipa na akîmwîra atîrî, “Tiga nthiî ngaûrage Ishumaeli mûvîcî wa Nethania na gûtirî mûndû wîngî ûkamenya. Nîndûî kîratûma ende gûkûûraga atî nîguo andû onthe a Juda arîa makûrigicîrîtie manyaganie na Ayahudi arîa maatigarire mathirue?”

¹⁶ Nwatî Gedalia mûvîcî wa Ahikamu nîwerire Johanani mûvîcî wa Karea atîrî, “Ndûgeke ûndû ûcio! Maûndû mau ûraria megiî Ishumaeli tî ma ma!”