Jeremia 4 - ÎVUKU RÎA ÛVORO MWARO

Andû a Isiraeli nîmerirwe merire

¹ Ngai-Mûnene arauga atîrî, “Mue andû a Isiraeli mûngîenda kûnjokerera njokererani. Mûngîruta indo irîa irî mûgiro mbere yakwa na mûtuîke evokeku kûrî nie,

² na mûngîîvîta mûrî na ûûma, kîvooto na ûthingu, mûkiugaga, ‘wata ûrîa Ngai-Mûnene atûûraga mwoyo,’ vîndî îo mavûrûri nîmakaarathimwa, na magîe na riiri nîûndû wakwa.”

³ Ngai-Mûnene arera andû a Juda na atûûri a Jerusalemu atîrî, “Rîmani ngamba cienyu na mûtikavande mbegû mîguarî.

⁴ Mue andû a Juda na atûûri a Jerusalemu, îtherieni mûrî mbere yakwa nie Ngai-Mûnene, igani ngoro cienyu îrî ntheru mûrî mbere yakwa. Ethîrwa tî mwîka ûguo nîmbakanwa nî marakara, na gûtirî mûndû ûngîmavoria, nîûndû wa maûndû macûku marîa mwîkaga.”

Andû a Juda nîmerirwe nîmakûtharîkîrwa

⁵ Ugîrîria Juda na wanîrîre Jerusalemu uuge atîrî, “Vuvani tûrumbeta kûu vûrûrirî, anîrîrani mwîre andû magomane vamwe; mathiî matûûrarî marîa mairigîre.

⁶ Igani kîmenyithia njîrarî ya Zayuni! Vinyûrani mwîgitîre! Mûtigacererwe! Ngai-Mûnene nîakûrete mûthiro kuuma mwena wa rûgûrû, na gûcûkangua kûnene.

⁷ Ta ûrîa mûnyambû umagîra kîthakarî, mûcûkangia wa vûrûri nîweyumîria; nîwauma kûrîa ekaraga, athiî gûcûkangia vûrûri wenyu, matûûra menyu nîmomorwa viû, matigwe marî maganjo.

⁸ Nîûndû wa ûguo îkîrani nguo cia macakaya, mûrîre na mûcakae, nîûndû Ngai-Mûnene tîmûtigu kûrakara nîûndû wetû.”

⁹ Ngai-Mûnene arauga atîrî, “Mûthenya ûcio athamaki na anene nîmakaathirwa nî vinya na athînjîri-Ngai nîmakaamaka nao arathi mavavûke.”

¹⁰ Nînacokire ngiuga atîrî, “We Ngai-Mûnene, nama nîûveenetie andû a Jerusalemu viû na ûkaamera atî maûndû mao nîmakwîthîrwa marî maro, nwatî vîndî îo nîrîo marî ûgwatirî mûnene.”

¹¹ Vîndî îo andû a Jerusalemu nîmakerwa atîrî, “Rûkûngi rûrî na ûrugarî mûnene nîrûravurutana kuuma werûrî rûkîte kûrî andû akwa. Tî rûkûngi rwa kûgûrûkia macaki kana kûtheria.

¹² Rûkûngi rûnene ûguo rumîte kûrî Ngai-Mûnene. Rîu nînie Ngai-Mûnene nîramatuîra ciira!”

Juda nîyathiûrûrûkîrue nî nthû

¹³ Taroria nthû yûkîte ta matu, ikaari ciake cia mbaara nîta rûkûngi rûnene; mbarathi ciake irî na îvenya gûkira nderi, kaî tûrî na thîna-î, tûrî athirie!

¹⁴ We Jerusalemu, theria ngoro yaku îthirwe nî waganu, nîguo ûvonokue. Nî nginya rî ûgûtûûra wîciragia maûndû macûku ngororî?

¹⁵ Mûgambo ûrauma îtûûrarî rîa Dani, ûkanîrîra maûndû macûku kuuma kîrîmarî Kîam Efiraimu.

¹⁶ Ûrera mavûrûri na ûkanîrîra Jerusalemu atî: “Atharîkîri maumîte vûrûrirî wa kûraca, makiugagîrîria ûrîa makûtharîkîra matûûra ma Juda.

¹⁷ Mathiûrûrûkîrîtie Jerusalemu ta arangîri a mûgûnda, nîûndû andû a kuo nîmareganîte nanie. Ûguo nîguo Ngai-Mûnene arauga.

¹⁸ Ciîko cienyu na mîthiîre yenyu, nîyo îkûreterete maûndû mama; ûcio nîguo mûthiro na nî mûrûrû; ûtonyete nginya ngororî yaku ndaarî.”

¹⁹ Ruuo, ruuo! Nînîraturwa mûno! Ngoro yakwa îratuma na vinya, ndingîvota gûkira; nîûndû mûgambo wa karumbeta, na kîng'ora Kîam mbaara.

²⁰ Mûthiro ûrarûmîrîra mûthiro wîngî, vûrûri wonthe nîmûcûkangie viû. Magema metû nîmacûkangua wa rîmwe; mbathia cietû igatarûrangwa wa rîmwe.

²¹ Nîmona vendera îno ya mbaara nginya-rî, na mbîgue mûgambo wa karumbeta?

²² Ngai-Mûnene arauga atîrî, “Andû akwa nî irimû matimbicî, o nî ciana nditu itarî na ûmenyo. Methagîrwa na wara wa gwîka maûndû macûku, nwatî matiîcî gwîka maûndû maro.”

Kîoneki kîa Jeremia kîgiî kwomomorwa kwa Juda

²³ Nînaroririe nthî, na ngîona kûndû gûcûku na gûtarî kîndû, na ngîroria îgûrû ngîona gûtarî na ûtheri.

²⁴ Nînaroririe irîmarî na ngîona ikinaina, wana tûrîma tuonthe tûkinaina.

²⁵ Nînaroririe na ngîona gûtarî wanarî mûndû, wana iconi cionthe ciarî ngûrûku.

²⁶ Nînaroririe na ngîona vûrûri ûrîa mûnoru ûtuîkîte werû, na matûûra ma kuo marî momomore, nîûndû wa marakara meengî ma Ngai-Mûnene.

²⁷ Ngai-Mûnene arauga atîrî, “Vûrûri wonthe ûgaatuîka ta werû, nwatî ndigaûcûkangia viû.

²⁸ Kwoguo nthî nîgacakaya; nakuo îgûrû kûgîe nduma, nîûndû ûguo nîguo mbugîte na ngatua; ndingîricûkwa kana ngarûrûka.

²⁹ Rîrîa mûkegua mûgambo wa athigari, marî na mbarathi na engî marî na moota, andû onthe nîmakaavinyûra maûre. Amwe magaatonya mûtitûrî engî matwe mathigarî; matûûra monthe nîmagaatiganîrua na gûtirî mûndû ûgatigwa kuo.

³⁰ We Jerusalemu kaî wî na thîna-î! Wîkagîra nguo îno ndune nîkî? Wîgemagia ûthiû na ûgekîra mathaga ma thaabu nîkî? Kwîgemia gwaku nîkwa mana. Arîa makwendete nîmarakûnyarara, na magacaria ûrîa mangîkûûraga.

³¹ Nie nîneguire kîrîro ta Kîam mûndûmûka arî na ûrûrû wa gûciara, mûcao ta wa mûndûmûka agîkivîra mwana wa îrikithathi, Kîamrî kîrîro gîa Zayuni akîvevûka agîcaragia mîvevû, agîtambûrûkagia njara akiugaga atîrî, ‘Kaî nîrî na thîna-î! Nîmaûkîte kûmbûraga!’ ”