Jeremia 39 - ÎVUKU RÎA ÛVORO MWARO

Kûgwa kwa Jerusalemu

¹ Mwerirî wa îkûmi mwaka wa kenda Zedekia arî mûthamaki wa Juda, Nebukadinezarû mûthamaki wa Babuloni na athigari ake onthe a mbaara nîmaarigicîrie îtûûra rîa Jerusalemu na makîrîtharîkîra.

² Mûthenya wa mûgwanja wa mweri, mwaka wa îkûmi na ûmwe wa ûthamaki wa Zedekia rûthingo rwa îtûûra nîrwatûrirwe mwanya.

³ Rîrîa Jerusalemu yatavirwe, anene onthe a mûthamaki wa Babulonia nîmatonyire îtûûrarî na magîkara kîvingorî gîa gatagatî. Anene acio marî: Nerigali-sharezeri, Samugari-nebo, Sarisekimu, Nerigali-sharezeri marî vamwe na anene arîa engî onthe a mûthamaki.

⁴ Rîrîa Zedekia mûthamaki wa Juda na athigari ake onthe maamonire, nîmaaumire kûu îtûûrarî ûtukû makîûra. Mavîtûkîrîre mûgûndarî wa maûa wa mûthamaki, matonyerete mûrangorî ûrîa warî gatagatî ka nthingo igîrî na makîthiî merekerete Araba.

⁵ Nwatî athigari a mbaara a Akalidei nîmaamarûmîrîre na magîkinyîra Zedekia vakuvî na Jeriko. Mamûnyita nîmaamûvirire kûrî mûthamaki Nebukadinezarû îtûûrarî rîa Ribula vûrûrirî wa Hamathi, nake mûthamaki nîwamûtuîrîre.

⁶ Mûthamaki wa Babulonia nîwaûragire avîcî a Zedekia marî Ribula, Zedekia akîonaga. Nebukadinezarû nîwacokire akîûraga atongoria onthe a Juda.

⁷ Nîwakûrire Zedekia metho na akîmwova na mvîngû nîguo avirwe Babulonia.

⁸ Nao Akalidei nîmaavîvirie nyomba ya mûthamaki, nyomba cia andû na makîomomora nthingo cia Jerusalemu.

⁹ Nake Nebuzaradani na mûnene wa arangîri nîwocire andû acio engî maatigarire kûu îtûûrarî na arîa meevecanîte kûrî mûthamaki na makîmavira Babuloni marî mîgwate.

¹⁰ Nebuzaradani mûnene wa arangîri a mûthamaki, nîwatigire andû onthe arîa maarî athîni na mataarî wanarî kîndû kûu Juda, na akîmava mîgûnda ya mîthavibu wa vamwe na mîgûnda ya kûrîma.

Jeremia Nîwarekererue

¹¹ Mûthamaki Nebukadinezarû wa Babuloni nîwathîte Nebuzaradani mûnene wa arangîri, ûvoro wîgiî Jeremia akîmwîra atîrî,

¹² “Mwoce, ûmûmenyerere waro na ndûkamwîke ûndû mûcûku, nwatî mûmwîke ûrîa wonthe akwenda.”

¹³ Kwoguo Nebuzaradani mûnene wa arangîri, Nebushazibani, Nerigali-sharezeri vamwe na anene onthe a mûthamaki wa Babulonia,

¹⁴ nîmaavirire Jeremia kûrî Gedalia mûvîcî wa Ahikamu, mûvîcî wa Shafani, nîguo amûvire gwake mûciî. Jeremia nîwekarire vamwe na andû arîa engî.

Ebedimeleku nîwagîre na kîîrîgîrîro

¹⁵ Vîndî îrîa Jeremia aarî kwa arangîri arî mwove, nîwakinyîrwe nî kiugo Kîam Ngai-Mûnene akîrwa atîrî,

¹⁶ “Thiî ûkeere Ebedimeleku ûrîa Mûethiopia atî Ngai-Mûnene mwene vinya wonthe, Ngai wa Isiraeli augîte atî: Taroria, nie nîngaavingia maûndû marîa neranîre megiî îtûûra rîîrî, maûndû macûku na tî maûndû maro. Maûndû mau makavinga mûthenya ûcio we mwene ûkîonaga.

¹⁷ Nwatî mûthenya ûcio nie mwene nîngakûvonokia, na ndûkarekererua kûrî arîa wîtigagîra.

¹⁸ Nîûndû nama nîngaakûgitîra na ndûkaûragîrwa mbaararî; nwatî nîûkavonokia mwoyo waku nîûndû wîthîrîtwe ûrî mwîvokeku mbere yakwa. Ûguo nîguo nie Ngai-Mûnene nauga.”