Jeremia 38 - ÎVUKU RÎA ÛVORO MWARO

Jeremia nîwaikirue kîthimarî kîa manjî

¹ Shefatia mûvîcî wa Matani, Gedalia mûvîcî wa Pashuri, Jehukali mûvîcî wa Shelemia, Pashuri mûvîcî wa Malikia nîmegwire ciugo irîa Jeremia eeraga andû onthe atî,

² Ngai-Mûnene augîte atî, “Mûndû wa wonthe ûgatigwa vûrûri ûyû nîakaaûragîrwa mbaararî, aûragwe nî yûra na mîrimû. Nwatî ûrîa ûkaumîra na evecane kûrî Akalidei nîagaatûûra mwoyo na avonokie mwoyo wake.

³ Ngai-Mûnene arauga atî nama îtûûra rîîrî rîa Jerusalemu nîrîkavecanwa kûrî athigari a mûthamaki wa Babuloni na marîtave.”

⁴ Nao anene nîmeerire mûthamaki atîrî, “Mûndû ûyû nîwagîrîrwe nî kûragwa nî ûndû nîathirîtie athigari arîa matigîtwe gûkû îtûûrarî vinya vamwe na andû onthe nîûndû wa kwaria ciugo ta icio. Mûndû ûyû ndacaragia wagîrîru wa andû aya, nwatî amacaragîria maûndû macûku.”

⁵ Mûthamaki Zedekia nîwaugire atîrî, “Ethîrwa nîguo mûkwona kwagîrîrîte, mwîkeni wa ûrîa mûkwona, nie ndingîmûgiria.”

⁶ Kwoguo nîmocire Jeremia makîmwova na mîkanda na makîmwikia kîrikorî Kîam manjî Kîam Malikia mûvîcî wa Mûthamaki kîrîa Kîamrî kûrîa arangîri meekaraga. Kîriko kîu gîtiarî na manjî, Kîamrî na ndaka ntheri. Maamûnyûrûrûkirie mamwovete na mîkanda, nake Jeremia nîwavorokere ndakarî.

⁷ Nwatî Ebedimeleku, ûrîa warî ngaramba kuuma Ethiopia na wekaraga nyomba kwa mûthamaki nîweguire atî nîmaikîtie Jeremia kîrikorî Kîam manjî kîrî na ndaka. Vîndî îo mûthamaki ekarîte kîvingorî Kîam Benjamini.

⁸ Kwoguo Ebedimeleku nîwathiîre kûrî mûthamaki na akîmwîra atîrî,

⁹ “Mwathi wakwa mûthamaki andû aya nîmekîte ûndû mûcûku mûno. Nîmaikîtie mûrathi Jeremia kîrikorî Kîam manjî; na nîagûkuîra kuo nî yûra, nîûndû mîgate nî mîthiru îtûûrarî.”

¹⁰ Mûthamaki nîwacokire akîatha Ebedimeleku, Mûethiopia atîrî, “Oca andû athatû kuuma gûkû na mûthiî nao mûkarute mûrathi Jeremia kîrikorî Kîam manjî atanakuîra kuo.”

¹¹ Kwoguo Ebedimeleku nîwocire arûme athatû na makîthiî nao nyomba kwa mûthamaki, na akîthiî kûrîa kwaigagwa nguo na magîoca nguo irîa ngûrû na irîa ndarûkangu na makîinyûrûrûkîria Jeremia kûu kîrikorî na mûkanda.

¹² Nake Ebedimeleku Mûethiopia nîwerire Jeremia atîrî, “Îkîra matangari na nguo icio ngavûarî, ûcoke ûvîtûkîrie mûkanda ûcio îgûrû rîa matangari mau.” Jeremia nîwekire guo.

¹³ Nao nîmaagucirie Jeremia na mîkanda na makîmûruta kûu kîrikorî Kîam manjî. Nîmacokire makîmûcokia kanyombarî ka arangîri.

Zedekia nîwaûririe ûtaro kûrî Jeremia

¹⁴ Mûthamaki Zedekia nîwacokire agîtûmanîra mûrathi Jeremia na akiuga avirwe macemanie nake mûrangorî wa kathatû wa hekarû ya Ngai-Mûnene. Nake mûthamaki nîwerire Jeremia atîrî, “Nîngûkûria kîûria na ndûkanthithe wanarî ûndû.”

¹⁵ Nake Jeremia nîwerire mûthamaki Zedekia atîrî, “Nîngîkwîra ûûma, kinthî ndûkûmbûraga? Na nîngîgûtaara, we tîûnthikîrîria.”

¹⁶ Nake mûthamaki Zedekia nîwevîtire mbere ya Jeremia na nthitho akiugaga atîrî, “Wata ûrîa Ngai-Mûnene atûûraga mwoyo, Ngai ûrîa watûveere mwoyo, ndigaakûûraga, kana ngûrekereria kûrî andû aya marenda gûkûûraga.”

¹⁷ Jeremia nîwacokire akîra Zedekia atîrî, “Ngai-Mûnene Ngai wa Isiraeli augîte atî, ûngîtîkîra we mwene kwîvecana kûrî atongoria a mûthamaki wa Babuloni, nîûkwîvonokia we mwene na ûvonokie îtûûra rîîrî rîtikavîvue na mwaki, na we vamwe na andû a mûciî waku nîmûgûtûûra mwoyo.

¹⁸ Nwatî ûngîrega kwîvecana kûrî atongoria a mûthamaki wa Babuloni, îtûûra rîîrî nîrîkûvecanwa kûrî Akalidei na marîvîvie na mwaki, na ndûkavota kwîvonokia kuuma kûrî o.”

¹⁹ Nake mûthamaki Zedekia nîwerire Jeremia atîrî, “Nînîretigîra Ayahudi arîa maaumire gûkû makîthiî gîtûûra gwa Akalidei, nîûndû navota kûnenganîrwa kûrî o, nao mamverithie.”

²⁰ Jeremia nîwacokirie atîrî, “Ndûkanenganîrwa kûrî o. Athîkîra mûgambo wa Ngai-Mûnene, wata ûrîa nîrakwîra, na maûndû maku nîmagûtuîka maro na ûvonokie mwoyo waku.

²¹ Nwatî ûngîrega kwîvecana kûrî o, Ngai-Mûnene nîamvete kîoneki.

²² Kîonekirî kîu, nînonire aka arîa maatigirwe mûciî kwa mûthamaki wa Juda makîvirwa kûrî anene a mûthamaki wa Babuloni. Nao maathiîte makiugaga atî, ‘Arata aku arîa wetîkîtie mûno nîmakûveenetie na nîmakûvootete, nîûndû magûrû maku nîmavorokeru ndakarî, nîmareganîte nawe magagûtiganîria.’

²³ “Aka aku wana avîcî aku nîmakaavirwa gwa Akalidei, na we mwene ndûkavonoka ume njararî ciao, nwatî nîûkanyitwa nî mûthamaki wa Babuloni na îtûûra rîîrî rîvîvue na mwaki.”

²⁴ Zedekia nîwacokerie Jeremia atîrî, “Ndûkanareke mûndû wana ûrîkû amenye maûndû mama, nawe ndûkaûragwa.

²⁵ Anene mangîkegua atî nîmbarîtie nawe, na macoke makwîre atî, ‘Tatwîre ûrîa mûraririe na mûthamaki na aragûcokerie atîa na tîtûkûûraga,’

²⁶ nawe ûgacoka ûmeere atî, ‘Nîkwa nîrathaithaga mûthamaki na njîra ya wînyivia mwîngî atî ndigacokue nyomba kwa Jonathani nîguo ndigakuîre kuo.’ ”

²⁷ Nao atongoria onthe nîmaathiîre kûrî Jeremia na makîmûria ûvoro wa maûndû mau, nake nîwamacokerie wa ûrîa mûthamaki aamûtaarîte. Kwoguo nîmaatigire kwaria nake nîûndû gûtirî mûndû weguîte ûrîa marîtie na mûthamaki.

²⁸ Jeremia nîwekarire kûrîa arangîri meekaraga nginya mûthenya ûrîa îtûûra rîa Jerusalemu rîatavirwe.