Jeremia 35 - ÎVUKU RÎA ÛVORO MWARO

Jeremia na njiarwa cia Rekabu

¹ Kiugo Kîam Ngai-Mûnene nîgîakinyîre Jeremia vîndî ya wathani wa Jehoiakimu mûvîcî wa Josia, mûthamaki wa Juda akîrwa atîrî,

² “Thiî mûciî kwa andû a Rekabu, warie nao na ûmarete nyombarî ya Ngai-Mûnene na ûmatonyie kanyombarî kamwe ka nyomba yakwa na ûmave ndivei manyue.

³ Kwoguo nînocire Jaazania mûvîcî wa Jeremia, mûvîcî wa Habazinia, na aa mûrwang'ina vamwe na ciana ciake cionthe na andû onthe a mbarî ya Rekabu.

⁴ Nînamavirire nyombarî ya Ngai-Mûnene, kûu kanyombarî ga ciana cia Hanani mûvîcî wa Igadalia, mûndû wa Ngai. Kanyomba kau kaarî vakuvî na nyomba ya atongoria îgûrû rîa nyomba ya Maaseia mûvîcî wa Shalumu, mûrangîri wa mûrango wa hekarû.”

⁵ Nînacokire ngîrete ikombe na mbakûri ciîcûrîte ndivei na ngîmeera atîrî, “Nyuani ndivei.”

⁶ Nwatî nîmaacokirie atîrî, “Tîtûnyua ndivei nîûndû Jonadabu mûvîcî wa Rekabu, îthe wetû nîwatwathire atî, ‘Mûtikanyua ndivei, mue wana njiarwa cienyu tene na tene.

⁷ Mûtigatuma nyomba, mûtikarîma mîgûnda na mûtikethîrwa na mûgûnda wa mîthavibu. Nwatî mûgatûûraga magemarî ûtûûrorî wenyu wonthe nîguo mûtûûre vîndî ndaca vûrûrirî ûyû mûtûûraga mûrî ageni.’

⁸ Nîtwathîkîrîte mûgambo wa Jonadabu mûvîcî wa Rekabu, îthe wetû, maûndûrî monthe marîa atwathîte. Tue tûtiananyua ndivei tue ene, aka etû, anake etû kana aarî etû,

⁹ na tûtianatuma nyomba cia gûtûûra. Tûtirî mîgûnda ya mîthavibu, kana mîgûnda ya kûrîma na kûvanda mbegû.

¹⁰ Tue tûtûûraga magemarî na nîtwathîkîrîte na tûgeka maûndû monthe marîa Jonadabu îthe wetû aatwathire.

¹¹ Nwatî rîrîa Nebukadinezarû mûthamaki wa Babuloni aakinyire vûrûrirî ûyû na akîûtharîkîra, nîtwatuire tûke Jerusalemu nîguo twîgitîre kuuma kûrî athigari a mbaara a Babuloni na a Sîria. Kîu nîkîo gîtûmîte tûtûûre gûkû Jerusalemu.”

¹² Nwatî kiugo Kîam Ngai-Mûnene nîgîakinyîre Jeremia akîrwa atîrî,

¹³ “Ngai-Mûnene mwene vinya wonthe, Ngai wa Isiraeli arauga atî: Thiî ûkeere andû a Juda na a Jerusalemu atî: Anga mue mûtingîvota kwamûkîra kîrîra gîakwa na kûthikîrîria ciugo ciakwa?

¹⁴ Maûndû marîa Jonadabu mûvîcî wa Rekabu aathire ciana ciake, atî matikanyue ndivei, nîmaamarûmîrîre, na nginya ûmûnthî matiananyua ndivei nîûndû nîmathîkîrîte watho wa îthe wao. Nwatî mbîthîrîtwe ngîaria namue mavinda kwa mavinda na mûtimbîgucaga.

¹⁵ Nînîmûtûmîrîte arathi ndungata ciakwa, na nîo arathi mavinda kwa mavinda nîguo meere wa ûmwe wa cienyu atigane na waganu wake, arûnge mîthiîre yake na atige kûgooca ngai cia mîvuanano nîguo mûtûûre na thayû vûrûrirî ûrîa namûveere mue wana methe menyu, nwatî mûtianthikîrîria kana mûmbîgua.

¹⁶ Anake a Jonadabu mûvîcî wa Rekabu nîmarûmîrîrîte watho ûrîa maveerwe nî îthe wao, nwatî mue mûtianthikîrîria.

¹⁷ Kwoguo nie Ngai-Mûnene Mwene vinya wonthe Ngai wa Isiraeli nîrauga atî, nîngûretera andû a Juda na andû onthe a Jerusalemu maûndû monthe macûku marîa naririe îgûrû rîao, nîûndû nîmbarîtie nao na nîmaregete kûnthikîrîria; nînametire, nao matiambîtîka.”

¹⁸ Nwatî Jeremia nîwerire njiarwa cia Rekabu atî Ngai-Mûnene mwene vinya wonthe, Ngai wa Isiraeli augîte atîrî, “Mue njiarwa cia Rekabu nîmwathîkîrîte maathani ma îthe wenyu, nîmûrûmîrîrîte kîrîra gîake na mûkavingia maûndû marîa monthe aamwathire.

¹⁹ Kwoguo Ngai-Mûnene mwene vinya wonthe, Ngai wa Isiraeli arauga atî, gûtigatura mûndû wa kûndungatîra kuuma kûrî njiarwa cia Jonadabu mûvîcî wa Rekabu.”