Jeremia 34 - ÎVUKU RÎA ÛVORO MWARO

Ndûmîrîri kûrî Zedekia

¹ Mûthamaki Nebukadinezarû wa Babuloni nîwaûkire na athigari ake a mbaara kuuma mavûrûri monthe marîa aathanaga na akîtharîkîra îtûûra rîa Jerusalemu vamwe na matûûra marîa mengî ma Juda. Vîndî îo ndûmîrîri kuuma kûrî Ngai-Mûnene nîyakinyîre Jeremia akîrwa atîrî,

² “Thiî kûrî Zedekia Mûthamaki wa Juda ûmwîre Ngai-Mûnene Ngai wa Isiraeli arauga atî: Nîrî vakuvî kûnenganîra îtûûra rîîrî kûrî Mûthamaki wa Babuloni, nake nîakaarîvîvia na mwaki.

³ We ndûkaavota kûra, nwatî nîûkaanyitwa na ûvirwe kûrî ke; nîûkonana na Mûthamaki wa Babuloni na mwaranîrie nake metho kwa metho, vuva wa ûguo nîûkaathiî Babuloni.

⁴ Nwatî we Zedekia Mûthamaki wa Juda, tathikîrîria ûrîa nie Ngai-Mûnene nîrauga îgûrû rîaku: We ndûkaûragîrwa mbaararî.

⁵ Ûgaakua na thayû, na wa ta ûrîa ûbani wavîvirue vîndî îrîa methe menyu, athamaki arîa maathanaga mbere yenyu makîthikwa, nwa ta guo andû makavîvia ûbani nîûndû waku na macakae makiugaga atîrî, ‘Ûûi, Mûthamaki wetû nî mûkuû!’ Ûguo nîguo nie Ngai-Mûnene nauga.”

⁶ Nake mûrathi Jeremia nîwacokire akîîra Zedekia mûthamaki wa Juda maûndû mau monthe, arî kûu Jerusalemu,

⁷ vîndî îrîa athigari a mbaara a Babuloni maatharîkagîra Jerusalemu na matûûra ma Juda marîa maatigarîte marî mairigîre ma Lakishi na Azeka.

Ngombo nîciaveenagua nî athani a cio

⁸ Gîkî nîkîo kiugo kîrîa gîakinyîre Jeremia kuuma kûrî Ngai-Mûnene, vuva wa mûthamaki Zedekia kûrûtha kîrîkanîro na andû onthe a Jerusalemu atî marekererie

⁹ ngombo ciao cia Ahibirania cia arûme na aka nîguo gûtikagîe mûndû ûgûtua Mûisiraeli ûrîa wîngî ngombo.

¹⁰ Nao andû onthe na atongoria ao arîa marûthire kîrîkanîro kîu nîmetîkanirie kûrekereria ngombo icio cia arûme na cia aka, na gûtikethîrwe na mûndû ûkamatua ngombo rîngî. Nao nîmaamarekererie wata ûrîa metîkanirie.

¹¹ Nwatî vuvarî nîmaacokire makîricûkwa, na makînyita arûme na aka acio makîmatua ngombo.

¹² Nake Ngai-Mûnene Ngai wa Isiraeli nîwacokire akîra Jeremia atîrî,

¹³ “Rîrîa narutire methe menyu vûrûrirî wa Misiri kûrîa maarî ngombo, nînarûthire kîrîkanîro nao ngîmera:

¹⁴ ‘Wa mîaka mûgwanja yathira, nwa nginya mûrekagîrîrie Mûhibirania ûcio wendetue arî ngombo na ûgûtungatîte mîaka îtandatû. Mwagîrîrwe nî kûmarekereria matikarute wîra kwenyu rîngî.’ Nwatî methe menyu matianthikîrîria kana mambîgua.

¹⁵ Nwatî kavinda gakuvî mue nîmwaverire na mûgîka maûndû marîa magîrîrîte na mûkîrekereria andû enyu a Isiraeli na mûkîrûtha kîrîkanîro mbere yakwa mûrî hekarûrî yakwa kûrîa ngocagîrwa.

¹⁶ Nwatî nîmwacokire mûkîgarûrûka, na mûkîgwatia rîîtwa rîakwa mûgiro, vîndî îrîa mue muonthe mwacokire gwoca rîngî ngombo cia aka na arûme irîa mwarekereretie mûrî na wendi, na mûkîmatua ngombo cienyu rîngî.

¹⁷ Kwoguo nie Ngai-Mûnene nîrauga atî, mue mûtiambathîkîra na njîra ya kûrekereria andû enyu a Isiraeli. Kwoguo nie nîngûmûrekereria mûragwe nî mbaara, mîrimû na yûra. Nîngatûma mothamaki monthe ma nthî mamake nîûndû wa maûndû marîa ngûmwîka.

¹⁸ Nao andû arîa maunire kîrîkanîro gîakwa na makîrega kûrûmîrîra mawatho ma kîrîkanîro kîrîa marûthire mbere yakwa, ngamarûtha ta njaû îrîa maatûranirie maita maîrî na makîvîtûkîrîra gatagatî ga icunjî icio.

¹⁹ Andû acio nîo: atongoria a Juda, atongoria a îtûûra rîa Jerusalemu, andû arîa ngaramba, athînjîri-Ngai na andû onthe arîa maavîtûkîrîre gatagatî ga icunjî icio igîrî cia njaû îo.

²⁰ Andû acio nîngamarekereria kûrî nthû ciao, na kûrî andû arîa mendaga kûmaûraga. Ciimba ciao nîikaarîwa nî iconi cia rîerarî na nyamû cia kîthaka.

²¹ Nîngaarekereria Zedekia mûthamaki wa Juda na anene ake kûrî nthû ciao, na matharîkîrwe nî arîa mamacaragia mamaûrage na nîmarekererie kûrî athigari a mbaara a Babuloni arîa matigîte kûmatharîkîra.

²² Tathikîrîria, nie Ngai-Mûnene nîngaatha mûthamaki wa Babuloni na athigari ake na nîngamacokia îtûûrarî rîîrî. Nîmakaarîtharîkîra, marîtave na marîvîvie na mwaki. Nîngatûma matûûra ma Juda matuîke maganjo na kûndû gûtatûûragwa nî andû. Nie Ngai-Mûnene nînie nauga ûguo.”