Jeremia 33 - ÎVUKU RÎA ÛVORO MWARO

Ngai nîwavecanire kîîrîgîrîro kîngî

¹ Kiugo Kîam Ngai-Mûnene nîgîakinyîre Jeremia rîngî wa arî mûvingîre nyombarî ya arangîri atî:

² Ngai-Mûnene ûrîa waûmbire nthî, ûrîa wamîrûthire na akîmîvanda, ûrîa wîtagwa Ngai-Mûnene arauga atîrî,

³ “Mbîta na nîngûgwîtîka na ngwîre maûndû manene marî nthithorî marîa ûtaicî.

⁴ Nîûndû Ngai-Mûnene Ngai wa Isiraeli arauga atî, nyomba cia îtûûra rîa Jerusalemu, na nyomba cia athamaki a Juda nîikomomorwa nîûndû îtûûra rîu nîrîrigicîrie na rîkatharîkîrwa.

⁵ Andû nîmaakageria kûrûa na Akalidei, nwatî matikavota nîûndû marima ma kwîthitha nî magecûra ciimba cia andû arîa ngaûraga nîrî na marakara na mang'ûrîka. Nîngamatiganîria nîûndû wa wîvia ûcio wonthe mekîte.

⁶ Taroria, nîngavonia îtûûra rîîrî, na njokerie andû a rîo ûgima wa mwîrî. Nîngatûma mathatûkwe mûno na magîe na ûgitîri.

⁷ Nîngatûma andû a Juda na Isiraeli mekindîrie wata ûrîa mekariî mbere.

⁸ Nîngamatheria mevia monthe na nîmovere maûndû monthe macûku marîa manambîka na kûregana nanie.

⁹ Îtûûra rîîrî nîrîgatûma ngîe na gîkeno, ngumo na mbere ya mavûrûri monthe ma nthî marîa makegua ûvoro wîgiî maûndû monthe maro marîa nîmekaga. Mavûrûri nîmagetigîra na mainaine nîûndû wa maûndû maro na wagîrîru ûrîa ndeterete îtûûra rîîrî.”

¹⁰ Ngai-Mûnene arauga atîrî, “Îtûûra rîîrî rîtuîkîte ta werû, kûndû gûtatûûragwa nî andû kana nyamû. Matûûrarî ma Juda na njîrarî cia Jerusalemu irîa ciatiganîrue nî andû na nyamû, nîgûkeguua rîngî

¹¹ andû makiugîrîria macanjamûkîte nî gûkena, andû makiugîrîria marî kîrugorî Kîam ûviki. Nîmûkegua andû makina makenete makîrete maketha ma gûcokia ngatho hekarûrî ya Ngai-Mûnene makiugaga, ‘Kumiani Ngai-Mûnene mwene vinya wonthe, nîûndû nî mwaro, nîûndû wendo wake ûtathiraga nîwa tene na tene.’ Nîngatûma vûrûri ûyû ûgîe na maûndû maro wata ûrîa wekariî mbere. Ûguo nîguo nie Ngai-Mûnene nîrauga.”

¹² Ngai-Mûnene mwene vinya wonthe arauga atîrî, “Kûndû gûkû gûtarî andû kana nyamû cia kîthaka, matûûrarî ma kuo monthe nîgûgaatuîka kûndû kwaro gwa kûrîthia ng'ondu ciao.

¹³ Matûûrarî ma vûrûri ûrîa ûrî irîma, matûûrarî ma Shefela, na matûûrarî marîa marî werûrî wa Negebu, vûrûrirî wa Benjamini, icunjî irîa ithiûrûrûkîrîtie Jerusalemu na matûûra ma Juda, nîgûgaatuîka kûndû kwaro gwa kûrîthia ng'ondu. Ûguo nîguo nie Ngai-Mûnene nîrauga.”

¹⁴ Ngai-Mûnene arauga atîrî, “Kavinda nîgagûkinya, rîrîa ngavingia kîîranîro gîakwa na andû a Isiraeli na a Juda.

¹⁵ Mîthenya îo na îvinda rîu, nîngatûma kûgîe na mûndû mûthingu kuuma rûciaro rwa Daudi atuîke mûthamaki; nake nîakaathana na ûûma na kîvooto gûkû nthî.

¹⁶ Îvindarî rîu Juda nîîkavonokua na îtûûra rîa Jerusalemu rîgîe na thayû. Îtûûra rîu rîgetagwa, ‘Ngai-Mûnene nîke ûthingu wetû.’

¹⁷ Nîûndû nie Ngai-Mûnene nîrauga atî, gûtigatura mûndû wa rûciaro rwa Daudi wa kwathana Isiraeli,

¹⁸ na gûtigatura mûthînjîri-Ngai wa mûvîrîga wa Alawi wa kûruta matega ma kûvîvua, matega ma irio cia mîgûnda na wa kûruta magongoona tene na tene.”

¹⁹ Kiugo Kîam Ngai-Mûnene nîgîakinyîre Jeremia akîrwa atîrî,

²⁰ “Ethîrwa nwa ûvote kûgarûra kîrîkanîro kîrîa naarûthire na mûthenya na ûtukû nîguo gûtikagîe mavinda ma mûthenya na ma ûtukû,

²¹ nwaguo ndangîgarûra kîrîkanîro gîakwa na Daudi ndungata yakwa, nîguo vîndî cionthe kwîthagîrwe kûrî na mûndû ûrathana kuuma rûciaro rwa Daudi na kîrîkanîro gîakwa na athînjîri-Ngai a mûvîrîga wa Lawi arîa mandungatagîra.

²² Wata ûrîa njata cia îgûrû na mûthanga ûrîa ûrî ndeererî cia îria ûtangîtarîka, nwa ta guo ngaatûma njiarwa cia Daudi na athînjîri-Ngai a mûvîrîga wa Lawi arîa mandungatagîra mongerereke.”

²³ Kiugo Kîam Ngai-Mûnene nîgîakinyîre Jeremia akîrwa atîrî,

²⁴ “Nîkwa ûtarî mwîgu ûrîa andû marauga, atî Ngai-Mûnene nîmûreganu na nyomba igîrî irîa aathuurire, na nîcio Isiraeli na Juda. Andû acio nîmanyararîte andû akwa na matimonaga ta vûrûri.

²⁵ Ngai-Mûnene arauga atîrî: Nînarûthire kîrîkanîro kîgiî mûthenya na ûtukû na ngîrûtha mawatho ma îgûrû na nthî.

²⁶ Kwoguo, nîngûtûûra mbigîte kîrîkanîro gîakwa na rûciaro rwa Jakovu na Daudi ndungata yakwa. Nîngathuura ûmwe wa rûciaro rwa Daudi atuîke mûthamaki wa njiarwa cia Iburahimu, Isaka na Jakovu. Nîûndû nîngeguîra andû akwa ntha na ndûme mathatûkwe.”