Jeremia 32 - ÎVUKU RÎA ÛVORO MWARO

Jeremia nîwagûrire mûgûnda

¹ Ngai-Mûnene nîwarîrie Jeremia mwaka wa îkûmi vîndî îrîa Zedekia aarî mûthamaki wa Juda, na nwaguo warî mwaka wa îkûmi na înana wa mûthamaki Nebukadinezarû.

² Vîndî îo athigari a mbaara a mûthamaki wa Babuloni nîmaathiûrûrûkîrie îtûûra rîa Jerusalemu. Nake mûrathi Jeremia aavingîrîtwe kanyombarî ka arangîri kûu mûciî kwa mûthamaki wa Juda.

³ Zedekia mûthamaki wa Juda nîke wavingîrîte Jeremia, akîmûragia atîrî, “Nîndûî gîtûmîte ûrathe maûndû ûkiugaga Ngai-Mûnene augîte atî, ‘Nîngûvecana îtûûra rîîrî kûrî mûthamaki wa Babuloni na nîakûrîîgwatîra.

⁴ Zedekia mûthamaki wa Juda ndakaûra aume njararî cia Akalidei, nwatî nîakwonana nake ûthiû kwa ûthiû na maranîrie nake ke mwene.

⁵ Zedekia nîakaavirwa Babuloni na nîagaatûûra kûu nginya rîrîa ngatua ûrîa ngeeka nake. Wana arûa na andû a Babuloni, ndakavootana. Ûguo nîguo nie Ngai-Mûnene nauga.’ ”

⁶ Nake Jeremia nîwaugire atîrî, “Ciugo cia Ngai-Mûnene nîcianginyîre ngîrwa atî;

⁷ Hanameli, mamaguo mûvîcî wa Shalumu nîagûka kûrî we akwîre atîrî, ‘Gûra kîthaka gîakwa kîrîa kîrî Anathothi, nîûndû we nîwe ûrî na kîvooto gîa gûûkûûra ûûgûre.’ ”

⁸ Kwoguo, Hanameli mûvîcî wa mama nîwaûkire na akîmbîthîrîria kîvingorî kîu Kîam arangîri wata ûrîa Ngai-Mûnene augîte, na akîmbîra atîrî, “Gûra mûgûnda wakwa ûcio ûrî Anathothi vûrûrirî wa Benjamini, nîûndû kîvooto gîa kûûgaa nî gîaku; ûgûre ûtuîke waku.” Vîndî îo nîrîo namenyire atî nî Ngai-Mûnene wambaragîria.

⁹ Nînagûrire mûgûnda ûcio warî Anathothi kuuma kûrî Hanameli mûvîcî wa mama na ngîmûrîva mbeca mwîgana wa sîlûva îkûmi na mûgwanja.

¹⁰ Nînekîrire kîrore maarûarî ya mûgûnda na ngîmîvinga mbere ya aira a ûndû ûcio na ngîrîva mûgûnda makîonaga.

¹¹ Nînacokire ngîoca maarûa îo yarî mvinge îrîa yonanagia ûrîa nagûrîte mûgûnda vamwe na maarûa îngî îtaarî mvinge.

¹² Nînanenganîre maarûa îo ya ûgûri wa mûgûnda kûrî Baruku mûvîcî wa Neria; Neria ararî mûvîcî wa Mahiseia. Namûnengeere maarûa îo mbere ya Hanameli mûvîcî wa mama, na mbere ya aira aîrî arîa meekîrîte kîrore maarûarî îo ya kûgûra mûgûnda na mbere ya Ayahudi onthe arîa maarî vau nja ya kîvaro Kîam arangîri.

¹³ Nînerire Baruku andû acio onthe marî vo atîrî,

¹⁴ “Ngai-Mûnene mwene vinya wonthe, Ngai wa Isiraeli nîakwathîte na agakwîra woce maarûa ya kûgûra mûgûnda na maarûa îrîa mvinge wana îrîa îtarî mvinge na ûciige nyûngûrî nîguo ciîkare kavinda karaca.

¹⁵ Nîûndû Ngai-Mûnene, mwene vinya wonthe na Ngai wa Isiraeli augîte atî andû nîmakaagûra rîngî nyomba, ithaka na mîgûnda ya mîthavibu vûrûrirî ûyû.”

Îvoya rîa Jeremia

¹⁶ Vuva wa kûnengera Baruku mûvîcî wa Neria maarûa cia kûgûra mûgûnda nînavoire ngiuga atîrî,

¹⁷ “We Ngai-Mûnene! We nîwe waûmbire îgûrû na nthî na vinya waku mûnene na ûvoti waku mûnene. Gûtirî ûndû ûngîkûrema.

¹⁸ We nîwonanagia wendo ûtathiraga kûrî andû ngiri na ngiri nyîngî, nwatî nîûverithagia andû nîûndû wa mevia ma methe. We ûrî Ngai ûrî vinya na ûvoti na rîîtwa rîaku nî Ngai-Mûnene Mwene Vinya Wonthe.

¹⁹ We nîûvangaga maûndû na ûûgî na ûgeka maûndû ma vinya. Nîwonaga mîthiîre ya andû onthe na ûvecaga mûndû kûringana na wîra wake.

²⁰ Nîwaringire ciama na ûgîka maûndû manene Misiri, na nîûthiîte na mbere kûmeka Isiraeli nginya ûmûnthî na ûndû ûcio ûgatûma ûmenyakane.

²¹ Nîwarutire andû aku a Isiraeli vûrûrirî wa Misiri na njîra ya kûringa ciama na ûgîka maûndû ma magegania na vinya na ûvoti mwîngî na ûkîmakia andû a Misiri.

²² Nîwamavere vûrûri ûrîa wamerîre. Vûrûri ûrîa werîre methe metû, vûrûri ûrî îriia na ûûkî.

²³ Nao nîmaatonyire vûrûri ûcio makîwîgwatîra, nwatî matiakwathîkîra kana marûmîrîra watho waku. Matianeka ûndû wanarî ûmwe wa marîa wamaathire. Kwoguo nîûtûmîte manyitwe nî mathîna mama monthe.

²⁴ “Taroria, Akalidei nîmenjîte mûtaro ûrigicîrîtie îtûûra rîonthe nîguo marîtharîkîre na marîîgwatîre. Nayo mbaara, yûra na mîrimû nîigûtûma îtûûra rîîrî rînyitwe nî Akalidei arîa mararîtharîkîra. Nama maûndû marîa waririe nîmaravinga rîu ûkîonaga.

²⁵ Nwatî we Ngai-Mûnene, nîwe wambîrire ngûre mûgûnda na mbeca na mbige aira, wana ethîrwa îtûûra rîîrî rîrî vakuvî kûtharîkîrwa nî andû a Akalidei.”

²⁶ Ngai-Mûnene nîwacokire akîra Jeremia atîrî,

²⁷ “Taroria, nie nînie Ngai-Mûnene, Ngai wa andû onthe. Gûtirî ûndû ûngînema.

²⁸ Kwoguo, nie Ngai-Mûnene nîrauga atî nîngûvecana îtûûra rîîrî kûrî Akalidei na kûrî Nebukadinezarû Mûthamaki wa Babuloni na nîakûrîgwata.

²⁹ Akalidei arîa mararûa na îtûûra rîîrî nîmakaarîvîvia na mwaki. Nîmakavîvia nyomba kûrîa ngai cia Baali ivîvagîrua ûbani, na kûrîa ngai cia mîvuanano irutagîrwa matega ma ndivei, nîguo mbakanwe nî marakara.

³⁰ Gûtirî ûndû andû a Juda na a Isiraeli maneka kuuma marî ethî, tiga wa maûndû macûku. Ciana cia Isiraeli nîindakarîtie na maûndû marîa mekaga. Ûguo nîguo Ngai-Mûnene arauga.

³¹ Îtûûra rîîrî nîrîrurumûkîtie marakara na mang'ûrîka makwa kuuma rîrîa rîatumirwe nginya ûmûnthî. Kwoguo nîngûrîcûkangia,

³² nîûndû wa maûndû monthe macûku marîa andû a Isiraeli na Juda mekîte vamwe na athamaki, atongoria, athînjîri-Ngai na arathi.

³³ Nîmamvuvatîrîte vandû va kûngarûrûkîra. Wana ethîrwa mbîthîrîtwe ngîmathomithia, nîmaregete kûnthikîrîria na kwathîkîra kîrîra gîakwa.

³⁴ Nîmaaigire ngai cia mîvuanano hekarûrî îrîa ngoocagîrwa na makîmîgwatia mûgiro.

³⁵ Nîmatumîte metha cia kîgongoona cia Baali Kîamndarî Kîam Hinomu, nîguo marutîre ngai ya Moleku anake ao na erîtu ao marî magongoona. Tînie namaathire meke ûguo, na ûndû ûcio ndûngîatonyire meciriarî makwa, atî nwa meke ûndû ta ûcio ûrî mûgiro wa gûtûma andû a Juda mevia.”

Kîrîkanîro kîrî na mwîrîgîrîro

³⁶ Kwoguo rîu, Ngai-Mûnene Ngai wa Isiraeli arauga ûvoro wîgiî îtûûra rîîrî atîrî, “Jeremia, andû aya marauga atî na njîra ya mbaara, yûra na mîrimû vûrûri ûyû nîûkaarekerua kûrî mûthamaki wa Babuloni. Nwatî nie nîrauga atî,

³⁷ nîngaûngania andû onthe kuuma mavûrûrirî monthe kûrîa namanyaganirie nîûndû wa marakara na mang'ûrîka makwa. Nîngamacokia gûkû na ndûme matûûre kuo marî agitîre.

³⁸ Nao nîmagaatuîka andû akwa, nanie nduîke Ngai wao.

³⁹ Nîngamava mworoto ûmwe nîguo mavote gûtûûra mandîaga tene na tene nîûndû wa wagîrîru wao o ene na wa njiarwa ciao.

⁴⁰ Nîngarûtha kîrîkanîro gîa tene na tene nao atî, ndigatiga kûmeka maûndû maro na nîngatûma manîtigîre na ngoro ciao cionthe, nîguo matikandiganîrie rîngî.

⁴¹ Nîngakena ngîmeka maûndû maro, na ndûme mekindîrie vûrûrirî ûyû.”

⁴² Ngai-Mûnene arauga atîrî, “Wata ûrîa ndeterete andû aya maûndû manene na macûku, nwa guo ngamaretera maûndû monthe maro marîa nîmerîrîte.

⁴³ Andû nîmakaagûra mîgûnda vûrûrirî ûyû ûrîa mûrauga atî nî werû na gûtirî mûndû kana nyamû; na atî nîwavecanirwe njararî cia Akalidei.

⁴⁴ Andû nîmakaagûra mîgûnda îo na mbeca na mekîre irore maarûarî cia mîgûnda, na ivingwe na kûgîe na aira vûrûrirî wa Benjamini, vakuvî na Jerusalemu, vakuvî na îtûûra rîa Juda, matûûrarî marîa marî vûrûrirî ûrîa ûrî irîma, na matûûrarî ma Shefela na matûûra marîa marî werûrî wa Negebu. Nîûndû nîngamacokia rîngî vûrûrirî wao. Nie Ngai-Mûnene nînie nauga ûguo.”