Jeremia 30 - ÎVUKU RÎA ÛVORO MWARO

Ciîranîro cia Ngai-Mûnene kûrî andû ake

¹ Ndûmîrîri nîyakinyîre Jeremia kuuma kûrî Ngai-Mûnene îkîmwîra atîrî,

² “Nie Ngai-Mûnene, Ngai wa Isiraeli nîrakwîra wandîke maûndû monthe marîa nakwîra îvukuurî.

³ Nîûndû îvinda nîrîgûkinya rîrîa ngatûma andû akwa a Isiraeli na a Juda arîa matwîre marî atave, magîe na mûtûûrîre mwaro na nîmacokie rîngî vûrûrirî ûrîa naveere methe mao mawîgwatîre ûtuîke wao. Nie Ngai-Mûnene nînie nauga ûguo.”

⁴ Ino nîcio ciugo irîa Ngai-Mûnene aririe ciîgiî Isiraeli na Juda:

⁵ “Nie Ngai-Mûnene mbugîte atî: Nîkwîguîtwe kîrîro gîa kûmakania, na mûgambo wa gwîkanîra guoya na tî thayû.

⁶ Rîu ta îyûrieni na mwîcirie: mûndûmûrûme nwa aciare mwana? Nîndûî kîratûma mone wa mûndûmûrûme, aigîrîrîte njara îvu ta mûndûmûka arî na ûrûrû wa gûciara? Nîndûî gîtûmîte mothiû ma andû onthe mathite?

⁷ Nama mûthenya ûcio nî mûnene, gûtirî mûthenya wîngî ta guo, nî mûthenya wa kîeva kûrî andû a Jakovu; kûnarî ûguo nîmakavonokua kuuma thînarî ûcio.”

⁸ Ngai-Mûnene mwene vinya wonthe arauga atîrî, “Rîrîa îvinda rîu rîgakinya, nîngaunanga îcoki rîrîa rîrî ngingorî na nducange mînyororo yao. Matigatuîka ngombo cia andû ageni rîngî.

⁹ Nwatî nîmakaandungatîra nie Ngai-Mûnene Ngai wao, na matungatîre ûmwe wa njiarwa cia mûthamaki Daudi, ûrîa ngamathuurîra atuîke mûthamaki.

¹⁰ “Nie Ngai-Mûnene nîramwîra mue ndungata ciakwa andû a Jakovu mûtigetigîre, kana mue andû a Isiraeli mûgwatwa nî guoya; nîûndû nîngamûvonokia kuuma vûrûrirî wa kûraca, na njiarwa ciaku nîirute vûrûri ûrîa ithamîrîtue. Nîmûgaacoka na mûtûûre na thayû, na gûtirî mûndû ûgatûma mûgîa na guoya.

¹¹ Nîûndû nîngaûka nîmûvonokie, na njûkangie mavûrûri monthe viû, kûrîa namûnyaganirie, nwatî mue ndikamûcûkangia. Mue ndikamûrakereria ndamûverithîtie, ngamûverithia na njîra ya kîvooto. Nie Ngai-Mûnene nînie nauga Ûguo.”

¹² Ngai-Mûnene arauga atîrî, “Ngurara ciaku itingîvora, na ironda cienyu itingîthondekeka.

¹³ Gûtirî mûndû ûkarûmbûyania na maûndû menyu, gûtirî ndawa îngîvonia ironda cienyu, mue mûtingîvona.

¹⁴ Anyanya aku onthe nîmariganîrîtwe nîmue; matitindanagîrîra namue. Nîmûtharîkîrîte ta ûrîa mûndû atharîkagîra nthû, nîmûverithîtie ndakûmwîguîra ntha. Nîûndû mavîtia menyu nî manene, na mevia menyu nî meengî.

¹⁵ Mûrarîra nîûndû wa ngurara cienyu nîkî? Ruuo rwenyu rûtingîthira. Nîmwîkîte maûndû mama monthe, nîûndû mavîtia menyu nî manene, mevia menyu nî meengî mûno.

¹⁶ Kûnarî ûguo arîa onthe mamûcûkangagia nîmagaacûkangua, nacio nthû cienyu cionthe nîigaatavwa ivirwe îthamîriorî; arîa onthe mamûtavaga wanao nîmagaatavwa, na arîa onthe mamûvinyagîrîria wanao nîmakavinyîrîrua.

¹⁷ “Nîngamûcokeria vinya wenyu, na nîmûvonie ironda cienyu, wana ethîrwa mamwîtaga, ‘Mûru.’ ‘Îtûûra rîa Zayuni rîtarî mûndû wa kûrîmenyerera!’ Nie Ngai-Mûnene nînie nauga ûguo.”

¹⁸ Ngai-Mûnene arauga atîrî, “Nîngacokia andû a Jakovu vûrûrirî wao, na mbîguîre mîciî yao ntha. Îtûûra rîa Jerusalemu nîrîgaatumwa rîngî, na mûciî wa mûthamaki nîûvande varîa warî.

¹⁹ Atûûri a Jerusalemu nîmakaaina nyîmbo cia kûgooca, nîmakaugîrîria nî gûkena, nîngatûma mongerereke na matikanyiva; nîngatûma matîwe na matikairwa.

²⁰ Ciana ciao igekara wata ûrîa ciekaraga tene, na matuîke rûrîrî rwa kûngooca, na nîngaverithia arîa onthe mamavinyagîrîria.

²¹ Mûtongoria wao akethîrwa arî ûmwe wao, mwathi wao akauma gatagatîrî kao, nîngamwîta nake nîakanguvîvîria, nîûndû nû ûngîgeria kûnguvîvîria na vinya wake? Ûguo nîguo nie Ngai-Mûnene nîrauga.”

²² “Nîmagaatuîka andû akwa, na nie nduîke Ngai wao.”

²³ Taroria rûkûngi rûnene rwa Ngai-Mûnene! Marakara nîmanyûrûrûkîte, rûkûngi rûnene nîrûravurutana, nîrûgwa ciongorî cia andû arîa aganu.

²⁴ Ngai-Mûnene ndagaacokithia marakara make, nginya rîrîa akavingia ûrîa avangîte gwîka. Vuvarî nîmûgaataûkîrwa nî maûndû mau.