Jeremia 3 - ÎVUKU RÎA ÛVORO MWARO

Andû a Isiraeli tî evokeku

¹ Mûndû mûrûme angîta mûka, na athiî akînagûrwa nî mûndûmûrûme wîngî, mûndû mûrûme ûrîa wamûvikîtie mbere, nwa acokerere mûndûmûka ûcio rîngî? Na kinthî gwîka ûguo tî kûgwatia vûrûri wonthe mûgiro? Nwatî we Isiraeli nî ûvûrîte ûmaraa na anyanya engî, rîu we ûrenda kûnjokerera? Ûguo nîguo Ngai-Mûnene arauga.

² Taroriani îgûrû rîa tûthûrûmûndû twa irîma na mwone! Kûrî vandû mûtanagoocera ngai ng'eni? Wîkaraga mûkîrarî wa njîra wetererete arûme a gûkwenda, ta ûrîa mwarabu akavagîra andû werûrî. Nîûtûmîte vûrûri ûgîe na gîko, nîûndû wa ciîko ciaku cia ûmaraa.

³ Kwoguo mbura nene nîmvingîrîrie, wana îrîa nini nîndigu kuura; kûnarî ûguo we wîigaga ta îraa; na ndwîgucaga nthoni.

⁴ Kinthî ndwarîkia kûmbîta wauga atî: “We nîwe vava wamendire kuuma nîrî mwana.

⁵ We nîûtûûra ûndakarîrîte tene na tene, nîûtûûra ûrî na mang'ûrîka tene tene? Isiraeli ûguo nîguo we ûraugire, nwatî nîwîkîte mevia monthe marîa ûngîavotire gwîka.”

Nwa nginya Isiraeli na Juda merire

⁶ Vîndî îrîa Josia aarî mûthamaki, Ngai-Mûnene nîwambîrire atîrî, “Wî mwonu ûrîa Isiraeli, ûcio ûtarî mwîvokeku ekîte? Ke nîathiîte tûrîmarî tuonthe na akathiî rungu rwa mîtî mîruru na akavûûrîra ûmaraa kuo.

⁷ Nie neciririe atî, ‘Vuva wa Isiraeli gwîka maûndû mau monthe, nîakûnjokerera;’ nwatî nîwaregire kûnjokerera, na Juda mwarwang'ina ûrîa mûthani nîwonire ûndû ûcio.

⁸ Juda nîwonire atî naveere Isiraeli maarûa ya kûmûta nîûndû ndaarî mwîvokeku na nîwekîte mevia meengî ma ûtharia. Kûnarî ûguo, Juda mwarwang'ina ûrîa mûthaani ndetigîra, nwatî wanake nîwathiîre kûvûûra ûmaraa.

⁹ Ndoonaga ûmaraa ûrî ûndû mûnene, kwoguo nîwatûmire vûrûri ûgîe na mûgiro na agîka wîvia wa ûtharia na njîra ya kûgooca mathiga na mîtî.

¹⁰ Kûnarî ûguo, mwarwang'ina Juda ûrîa warî mûthaani, ndanjokerera na ngoro yonthe; nwatî aarî na ûvinga. Ûguo nîguo Ngai-Mûnene arauga.”

¹¹ Ngai-Mûnene nîwacokire akîmbîra atîrî, “Isiraeli ûrîa ûtarî mwîvokeku, nîwonanîtie atarî na mevia mengî ta Juda ûrîa mûthani.

¹² Thiî wanîrîre ndûmîrîri îno kûrî andû a rûgûrû, na ûmeere atî: Njokererani mue andû a Isiraeli mûtarî evokeku; ûguo nîguo Ngai-Mûnene arauga. Nie tînîmûroria nîrî na marakara, nîûndû nîrî ntha; tîndûûra ndakarîte nîwe. Ûguo nîguo Ngai-Mûnene arauga.

¹³ Îtîkîrani tu mevia menyu, atî nîmwareganire na Ngai-Mûnene Ngai wenyu; na atî rungu rwa mîtî yonthe mîruru, nîwonanîtie wendo waku kûrî ngai ciîngî; na warega kwathîkîra mûgambo wakwa, ûguo nîguo Ngai-Mûnene arauga.”

¹⁴ Ngai-Mûnene arauga atîrî, “Njokererani, mue ciana ciakwa mûtarî evokeku; nîûndû nînie mwathi wenyu; nîngamwoca ûmwe kuuma îtûûrarî rîmwe, na andû aîrî kuuma wa mûciî; na nîmûvire Zayuni.

¹⁵ “Nîngamûva arîthi arîa makambathîkagîra, arîa makamûrîthagia marî na ûûgî na ûmenyo.

¹⁶ Vîndî îrîa mûkethîrwa mwongererekete na mûkengîva vûrûrirî, andû matigekaraga matakûgweta îthandûkû rîakwa rîa kîrîkanîro. Andû matikagweta, kana marîririkana rîngî, matikarîvatara kana marûtha rîngî.

¹⁷ Vîndî îo îtûûra rîa Jerusalemu rîgetwa, ‘Gîtî Kîam ûthamaki Kîam Ngai-Mûnene,’ na mavûrûri monthe nîmakaagomana na mangooce. Matigatongorua rîngî nî maûndû macûku ma ngoro ciao.

¹⁸ Vîndî îo andû a Juda nîmakaanyitanîra na andû a Isiraeli, na marî vamwe nîmakauma vûrûri ûrîa ûrî mwena wa rûgûrû na macoke vûrûri ûrîa naveere methe menyu ûrî îgai rîao.”

Andû a Ngai kûvoya mîvuanano

¹⁹ Ngai-Mûnene arauga atîrî, “We Isiraeli, nîciragia ûrîa nîngîkwamûkîra ta mwana wakwa, na ngûve vûrûri mwaro, îgai rîaro gûkîra mavûrûri monthe ma nthî. Neciragia atî we nwa ûmbîte vava na ndûgatigana nanie rîngî.

²⁰ Nama, wata ûrîa mûndûmûka ûtarî mwîvokeku atigaga mûthuuri wake, ûguo nwa guo mwîthîrîtwe mûtarî evokeku kûrî nie mue andû a Isiraeli. Ûguo nîguo Ngai-Mûnene arauga.”

²¹ Mûgambo nîwîguîtwe tûthûrûmûndûrî twa irîma andû a Isiraeli makîrîra na makîîthaithanîra, nîûndû nîmacûkîtie mîthiîre yao, na nîmariganîrîtwe nî Ngai-Mûnene Ngai wao.

²² Njokererani mue ciana ciakwa mûtarî evokeku nîngamûvonia na nîmûtue evokeku. Taroria nîtwaûka kûrî we; nîûndû we nîwe Ngai-Mûnene Ngai wetû.

²³ Nama tûrî aveenie mûno rîrîa tûragooca tûrî îgûrû rîa irîma; nama ûvonokio wa Isiraeli; umaga kûrî Ngai-Mûnene Ngai wetû.

²⁴ Nwatî kuuma tûrî andû ethî, ûndû ûyû wa gîconoko nîûcûkangîtie indo cionthe irîa methe metû maacaririe na nthithina: ng'ondu, ng'ombe anake ao na erîtu ao.

²⁵ Twagîrîrwe nî kûmama nthî tûthithîte mothiû metû nîûndû wa ûrîa tûconokete, tûreke gîconoko gîetû gîtûkunîkîre nîûndû tue, vamwe na methe metû tûtwîre twîvagia Ngai-Mûnene, Ngai wetû, na tûtianathîkîra mûgambo wake.