Jeremia 29 - ÎVUKU RÎA ÛVORO MWARO

Maarûa ya Jeremia kûrî Ayahudi arîa maarî Babulonia

¹ Îno nîo maarûa îrîa mûrathi Jeremia aatûmîre atongoria, athînjîri-Ngai, arathi na andû arîa Nebukadinezarû aavirîte îthamîriorî Babulonia kuuma Jerusalemu.

² Jeremia aandîkire maarûa îo vuva wa mûthamaki Jekonia, mûthamaki mûndûmûka, andû ngaramba, anene a Juda na Jerusalemu, mavundi na aturi kûvirwa îthamîriorî.

³ Elasa mûvîcî wa Shafani, na Gemaria mûvîcî wa Hilikia, nîo Zedekia mûthamaki wa Juda aatûmire mavirîre Nebukadinezarû mûthamaki wa Babulonia maarûa îo Jeremia andîkîte akauga atîrî:

⁴ “Ngai-Mûnene, mwene vinya wonthe, Ngai wa Isiraeli arera andû onthe arîa etîkîrire mavirwe îthamîrio Babulonia kuuma Jerusalemu atî,

⁵ ‘Tumani nyomba na mûtûûre kuo; vandani mîgûnda na mûrîe kîrîa gîkauma kuo.

⁶ Vikaniani na mûgîe na ciana cia anake na cia erîtu; anake enyu nîmavikanie na erîtu enyu mavikue na magîe na ciana cia anake na cia erîtu: ongererekani mûrî kûu na mûtikanyive.

⁷ Caragiani thayû wa îtûûra rîrîa natûmire mûthamîrue na mûvoyage Ngai-Mûnene nîûndû warîo, nîûndû maûndû mao nîmagûtuîka maro.

⁸ Nîûndû Ngai-Mûnene mwene vinya wonthe, Ngai wa Isiraeli arauga atî mûtigetîkîre kûveenua nî arathi na aragûri arîa marî gatagatîrî kenyu na mûtikathikîrîrie iroto ciao.

⁹ Nîûndû marathaga maûndû ma maveeni magîtûmagîra rîîtwa rîakwa. Ûguo nîguo nie Ngai-Mûnene nauga.’

¹⁰ “Ngai-Mûnene arauga atî, rîrîa mîaka mîrongo mûgwanja (70) mûrî Babuloni îkathira nîngamwîciria na mvingie kîîranîro gîakwa namue na nîmûcokie gûkû.

¹¹ Nîûndû, nie Ngai-Mûnene nîmbîcî mîvango îrîa nîrî nayo kûrî mue, mîvango ya maûndû maro na tî maûndû macûku nîguo mûtûûrîre wenyu wa vîndî îrîa îgaûka wîthîrwe ûrî na kîîrîgîrîro.

¹² Nîmûgaacoka mûmbîte, na mûmvoe na nîngamûthikîrîria.

¹³ Nîmûkaanjaria na mûmone, rîrîa mûkanjaria na ngoro yenyu yonthe,

¹⁴ nîmûkaamona, na nîngamûcokeria mûnyaka wenyu na nîmûcokanîrîrie kuuma mavûrûri monthe na kûndû kuonthe kûrîa namûvirithirie. Nîngamûcokia kûrîa namûrutire ngîmûvira îthamîriorî.” Ûguo nîguo Ngai-Mûnene arauga.

¹⁵ “Mue mûrauga atî, Ngai-Mûnene nîamûveu arathi vûrûrirî wa Babuloni.

¹⁶ Tathikîrîriani ûrîa Ngai-Mûnene arauga îgûrû rîgiî mûthamaki ûrîa ûrathana kûrîa Daudi aarî mûthamaki, na îgûrû rîgiî andû onthe arîa matûûraga îtûûrarî rîîrî, na andû enyu arîa matavirwa îthamîriorî nao.

¹⁷ Ngai-Mûnene mwene vinya wonthe arauga atî, ‘Nîngûmaretere mbaara, yûra na mîrimû, na ndûme matuîke ta ngûû mboru na njûku mûno ûndû itangîrîka.

¹⁸ Nîngamarûmîrîria na mbaara, yûra na mîrimû na ndûme mothamaki monthe ma nthî mamakage mamoona. Nîmagaatuîka kîrumi, na meguithie andû guoya, macivagwe na manyararagwe nî mavûrûri monthe kûrîa namanyaganirie.

¹⁹ Ngaameka ûguo nîûndû nîmaaregire kûthikîrîria ndûmîrîri yakwa îrîa namatûmagîra maita meengî na njîra ya arathi ndungata ciakwa, na makîrega kûnthikîrîria. Ûguo nîguo nie Ngai-Mûnene nîrauga.’ ”

²⁰ Mue muonthe arîa narutire Jerusalemu na ngîmûvira Babuloni îthamîriorî, tathikîrîriani ûrîa nie Ngai-Mûnene nîrauga.

²¹ “Ngai-Mûnene mwene vinya wonthe, Ngai wa Isiraeli nîarîtie ûvoro wîgiî Ahabu mûvîcî wa Kolaia na Zedekia mûvîcî wa Maaseia, arîa mararatha maûndû ma maveeni na rîîtwa rîakwa: Nîngûmanenganîra kûrî Nebukadinezarû Mûthamaki wa Babuloni nake nîakamaûraga mûkîonaga.

²² Na nîûndû wa maûndû mau makamanyita, andû onthe arîa maathamîrue Babuloni kuuma Jerusalemu nîmakaagwetaga ciugo ino rîrîa makûrumana: Ngai-Mûnene aromwîka ta ûrîa ekire Zedekia na Ahabu, arîa mûthamaki wa Babulonia avîvirie na mwaki.

²³ Ngameka ûguo nîûndû nîmekire ûndû wa nthoni vûrûrirî wa Isiraeli. Nîmaatharirie na aka a andû arîa maariganîtie nao, na nîmaririe maveeni makîgwetaga rîîtwa rîakwa, na ndiamathîte meke guo. Nie mwene nîmbicî na nîrî mûira wa maûndû mau. Ûguo nîguo nie Ngai-Mûnene nîrauga.”

Maarûa ya Shemaia

²⁴ Ngai-Mûnene nîwambathire mbîre Shemaiya mûvîcî wa Nehelamu atîrî,

²⁵ “Ngai-Mûnene mwene vinya wonthe, Ngai wa Isiraeli augîte atî, we nîûtûmîte maarûa na rîîtwa rîaku kûrî andû onthe arîa marî Jerusalemu na kûrî mûthînjîri-Ngai Zefania mûvîcî wa Maaseia, na kûrî athînjîri-Ngai arîa engî onthe ûkiugaga atî:

²⁶ ‘Ngai-Mûnene nîwagûtwire mûthînjîri-Ngai vandûrî va mûthînjîri-Ngai Jehoiada, na rîu nîwe mûtongoria hekarûrî. Nî wîra waku kwona atî mûndû wa wonthe wa ngoma, wîtucaga atî nî mûrathi hekarûrî ya Ngai-Mûnene nîwanyitwa na ovwa na mvîngû na aikua njeera.

²⁷ Nî ndûî vi kîgirîtie ûkaania Jeremia wa kuuma Anathothi ûrîa wîthîrîtwe agîkûrathîra?

²⁸ Ke nîwagîrîrwe nî kûgirua kûratha nîûndû ethîrîtwe akîrathîra andû arîa marî Babuloni atî nîmatûûra marî îthamîriorî kavinda karaca, na nîmagîrîrwe nî gûtuma nyomba na matûûre kuo, na marîme mîgûnda na marîe maketha ma mîgûnda yao.’ ”

²⁹ Zefania mûthînjîri-Ngai nîwathomire maarûa îno Jeremia akîonaga.

³⁰ Nake Ngai-Mûnene nîwacokire akîra Jeremia atîrî,

³¹ “Tûmîra andû onthe arîa marî îthamîriorî ndûmîrîri îno îgiî Shemaia wa Nehelamu: Nie Ngai-Mûnene nîrauga atî, Shemaia nîamûrathîrîte maûndû marîa nie ndamûtûmîte, na agîtûma mwîtîkia maûndû matarî ma ma.

³² Kwoguo nie Ngai-Mûnene nîrauga atî nîngûverithia Shemaia mûvîcî wa Nehelamu vamwe na rûciaro rwake. Gûtirî mûndû wanarî ûmwe wa arîa metanîtue nake ûgatigara arî mwoyo nîguo one maûndû maro marîa ngeka andû akwa, nîûndû ethîrîtwe akîra andû maregane nanie Ngai-Mûnene. Ûguo nîguo nie Ngai-Mûnene nauga.”