Jeremia 28 - ÎVUKU RÎA ÛVORO MWARO

Jeremia na Mûrathi Hanania

¹ Mwaka wa ûcio, mweri wa gatano mwaka wa kana Zedekia arî mûthamaki wa Juda, Hanania mûvîcî wa Azuri, mûrathi kuuma îtûûra rîa Gibeoni, nîwaririe nanie nîrî hekarûrî, na mbere ya athînjîri-Ngai na andû onthe na akiuga atîrî,

² “Ngai-Mûnene Mwene Vinya Wonthe, Ngai wa Isiraeli arauga atî: Nîmunîte îcoki rîa mûthamaki wa Babulonia.

³ Îvinda rîa mîaka îrî nîngwîthîrwa njoketie indo cia hekarû gûkû irîa mûthamaki Nebukadinezarû wa Babulonia oocire gûkû akîivira Babuloni.

⁴ Wana nîngûcokia Jekonia mûvîcî wa Jehoiakimu gûkû, vamwe na andû onthe a Juda arîa maatavîtwe makîvirwa Babulonia. Nîngaunanga îcoki rîa mûthamaki wa Babulonia. Ûguo nîguo nie Ngai-Mûnene nauga.”

⁵ Nake mûrathi Jeremia nîwacokire akîarîria mûrathi Hanania mbere ya athînjîri-Ngai na andû onthe arîa maarûngamîte hekarûrî;

⁶ na akîmwîra atîrî, “Ameni! Ngai-Mûnene aroîka guo. Ngai-Mûnene arovingia maûndû marîa waratha na acokie indo cionthe cia hekarû kuuma Babuloni, airete gûkû vamwe na andû arîa onthe maatavîtwe makavirwa îthamîriorî.

⁷ Nwatî rîu thikîrîria ûrîa nîrakwîra we na andû onthe.

⁸ Arathi arîa maarî kuo mbere yaku na mbere yakwa mavinda ma tene, nîmaarathire atî mbaara, yûra na mîrimû nîgaûka kûrî mavûrûri meengî na mothamaki marî vinya.

⁹ Nwatî mûrathi ûrîa ûrathaga kûrî na thayû, angîmenyekana atûmîtwe nî Ngai-Mûnene vîndî îrîa ndûmîrîri îrîa arathîte îkaavinga.”

¹⁰ Nake mûrathi Hanania nîwacokire agîoca îcoki kuuma ngingorî ya mûrathi Jeremia na akîriunanga.

¹¹ Hanania nîwaririe arî mbere ya andû onthe na akiuga atî, Ngai-Mûnene arauga atîrî, “Ûguo nîguo ngaunanga îcoki rîrîa Nebukadinezarû mûthamaki wa Babuloni aigîrîrîte mavûrûri monthe. Ngeka ûguo îvindarî rîa mîaka îîrî îgûka.” Vuva wa ûguo mûrathi Jeremia nîwacokire akînethiîra.

¹² Vuva wa mûrathi Hanania kunanga îcoki kuuma ngingorî ya mûrathi Jeremia, ndûmîrîri ya Ngai-Mûnene nîyakinyîre Jeremia akîrwa:

¹³ Thiî, ûkeere Hanania Ngai-Mûnene arauga atîrî, “We nîunangîte îcoki rîa mûtî, nwatî nie nîngûrûtha rîngî rîa cuuma.

¹⁴ Ngai-Mûnene, mwene vinya wonthe Ngai wa Isiraeli augîte atî nîagwîkîra andû a mavûrûri monthe îcoki rîa cuuma, na atî magatungatagîra Nebukadinezarû Mûthamaki wa Babulonia. Augîte atî nginya nyamû cia kîthaka igaatungatagîra Nebukadinezarû.”

¹⁵ Nake mûrathi Jeremia nîwerire mûrathi Hanania atîrî, “Hanania, tathikîrîria! Ngai-Mûnene ndaagûtûma, na nîûtûmîte andû aya metîkie maûndû ma maveeni.

¹⁶ Kwoguo Ngai-Mûnene arauga atî nîagûkûthengutia gûkû nthî. Mwaka ûyû ûtanathira nîûgûkua nîûndû nîwîrîte andû maregane na Ngai-Mûnene.”

¹⁷ Mwaka wa ûcio, mweri wa mûgwanja mûrathi Hanania nîwakwire.