Jeremia 27 - ÎVUKU RÎA ÛVORO MWARO

Jeremia nîwekîrire îcoki ngingo

¹ Kîambîrîriarî Kîam wathani wa Zedekia mûvîcî wa Josia mûthamaki wa Juda, kiugo nîgîakinyîre Jeremia kuuma kûrî Ngai-Mûnene.

² Ngai-Mûnene aambîrire atîrî, “Jeremia, rûtha îcoki na mîkwa yarîo na ûrîkîre ngingorî yaku.

³ Ûcoke ûtûme ndûmîrîri kûrî mûthamaki wa Edomu, Moabu, Amoni, Turo, Sidoni na njîra ya aarîrîria a thirikari arîa maûkîte Jerusalemu kûrî Zedekia mûthamaki wa Juda.

⁴ Atha arîrîria acio a thirikari makeere anene ao atî nie Ngai-Mûnene mwene vinya wonthe, Ngai wa Isiraeli nîramera atî:

⁵ Nînie naûmbire nthî na ngîûmba andû na nyamû cionthe irîa irî kuo na ûvoti na vinya wakwa na nîmîvecaga mûndû wa wonthe ûrîa ngwona agîrîrîte.

⁶ Rîu nîmvecanîte mavûrûri mama monthe kûrî Nebukadinezarû, mûthamaki wa Babuloni, ndungata yakwa, wana nînîmûvete nyamû cia kîthaka imûtungatagîre.

⁷ Mavûrûri monthe nîmakaamûtungatîra na matungatîre mûvîcî wana matungatîre mwana wa mûvîcî nginya rîrîa vûrûri wake ûkaagwa. Vûrûri wake nîûgacoka ûtungatîre mavûrûri mengî na athamaki marî îgweta.

⁸ “Nwatî vûrûri wa wonthe kana ûthamaki ûngîkarega gûtungatîra Nebukadinezarû mûthamaki wa Babuloni na kûmwathîkîra, nîngaverithia vûrûri ûcio na mbaara, yûra na mîrimû na nîûthirie viû na njîra ya mûthamaki Nebukadinezarû.

⁹ Kwoguo mûtikathikîrîrie arathi enyu, aringi a mbûgû enyu, aroti enyu kana arogi enyu. Andû aya onthe mamwîraga mûtigatungatîre mûthamaki wa Babuloni.

¹⁰ Methagîrwa makîmûveenia na nîmagaatûma mûthamue mûvirwe kûraca na vûrûri wenyu. Nie Ngai-Mûnene nîngamwîngata na nîmûgaacûkangua.

¹¹ Nwatî andû a vûrûri wa wonthe ûrîa ûkathîkîra na ûtungatîre mûthamaki wa Babuloni, nîngareka mekare vûrûrirî wao na maûrîmage na matûûre kuo. Ûguo nîguo nie Ngai-Mûnene nauga.”

¹² Nie Jeremia, nînerîte Zedekia mûthamaki wa Juda maûndû wata mau namwîrîte atîrî, “Athîkagîra mûthamaki wa Babuloni, ûmûtungatîre vamwe na andû ake na nîûgûtûûra mwoyo.

¹³ Nîndûî gîgûtûma we na andû aku mûkua nî mbaara, yûra na mîrimû? Maûndû mama nîmo Ngai-Mûnene aaugîte nîmagekîka kûrî vûrûri wa wonthe ûrîa ûtagatungatîra mûthamaki wa Babuloni.

¹⁴ Mûtikathikîrîrie arathi arîa mamwîraga mûtikathîkîre mûthamaki wa Babuloni, nîûndû methagîrwa makîmûveenia.

¹⁵ Ngai-Mûnene augîte: tî nie ndûmîte arathi acio, nwatî maramûrathîra maûndû ma maveeni magîtûmagîra rîîtwa rîakwa. Nîngûmwîngata mûthiî mûkaûragwe, mue vamwe na arathi acio maramwîra maûndû ma maveeni.”

¹⁶ Nînacokire ngîra athînjîri-Ngai vamwe na andû onthe atî Ngai-Mûnene arauga atîrî, “Mûtikathikîrîrie arathi enyu arîa marathaga makiugaga atî indo cia hekarû nîigûcokua kuuma Babuloni kavinda gakuvî, nîûndû nîkwa maramûveenia.

¹⁷ Mûtikamathikîrîrie; tungatîrani mûthamaki wa Babuloni na nîmûgûtûûra mwoyo. Îtûûra rîîrî nîrîtuîka maganjo nîkî?

¹⁸ Ethîrwa o nî arathi na marî na ndûmîrîri ya Ngai-Mûnene, nî makaîre Ngai-Mûnene mwene vinya wonthe nîguo indo irîa ciatigarire hekarûrî ya Ngai-Mûnene na nyombarî ya mûthamaki wa Juda na Jerusalemu itikavirwe Babuloni.”

¹⁹ Nîûndû Ngai-Mûnene mwene vinya wonthe arauga atîrî ûvoro wîgiî itugî na indo icio ciîngî irîa itigîtwe îtûûrarî rîîrî,

²⁰ irîa Nebukadinezarû mûthamaki wa Babuloni atakuuwa rîrîa ocire Jekonia mûvîcî wa Jehoiakimu mûthamaki wa Juda na andû arîa atîîkanu onthe a Juda na Jerusalemu kuuma Jerusalemu na akîmavira îthamîriorî.

²¹ “Tathikîrîriani ûrîa nie Ngai-Mûnene mwene vinya wonthe, Ngai wa Isiraeli nîrauga ûvoro wîgiî indo irîa ciatigirwe hekarûrî, nyombarî ya mûthamaki wa Juda na Jerusalemu.

²² Nîigaakuwa ivirwe Babuloni na ciîkare kuo nginya rîrîa ngeciria ûvoro wacio. Nîngaacoka nîicokie rîngî na nîcige gûkû. Nie Ngai-Mûnene nînie nauga ûguo.”