Jeremia 26 - ÎVUKU RÎA ÛVORO MWARO

Jeremia nîwacirithirue

¹ Vîndî îrîa Jehoiakimu mûvîcî wa Josia ûrîa warî mûthamaki wa Juda ambîrîrie kwathana, Ngai-Mûnene nîwerire Jeremia atîrî,

² “Rûngama nja ya hekarû na warîrie andû a matûûra ma Juda arîa maûkaga gûkû hekarûrî kûgooca, ûmeere maûndû monthe marîa ngûkwatha ûtagûtigîrîra wanarî kiugo.

³ Nwa kwîthîrwa nîmakûthikîrîria na matigane na maûndû mao macûku, nanie nwa nîricûkwe gwîka maûndû macûku marîa nîvarîrîtie kûmeka nîûndû wa waganu wao ûrîa mekaga.

⁴ Ûkamera Ngai-Mûnene arauga atî, ‘Ethîrwa tîmûnthikîrîria na mûrûmîrîre watho ûrîa nîmûvete,

⁵ na mûthikîrîrie ciugo cia arathi ndungata ciakwa arîa mbîthîrîtwe ngîmûtûmîra vîndî wa vîndî, wana ethîrwa mûtiamathikîrîria,

⁶ nîngacoka mbîke hekarû îno ta ûrîa nekire Shilo, na nîngatûma îtûûra rîîrî rîtuîke kîrumi kûrî mavûrûri monthe ma nthî.’ ”

⁷ Athînjîri-Ngai, arathi na andû onthe nîmegwire Jeremia akîaria maûndû mama monthe arî hekarûrî ya Ngai-Mûnene.

⁸ Na rîrîa Jeremia arîkirie kwaria maûndû monthe marîa Ngai-Mûnene aamwathîte eere andû onthe, athînjîri-Ngai, arathi, na andû onthe nîmaamûnyitire na makiuga atîrî, “Nîûgûkua!

⁹ Nîndûî gîatûma ûrathe ûkîgwetaga rîîtwa rîa Ngai-Mûnene ûkiugaga ‘hekarû îno îgekara ta Shilo, na îtûûra rîîrî nîrîgûcûkangua rîtuîke îganjo na rîtigwe gûtarî mûndû wa gûtûûra kuo.’ ” Nao andû onthe nîmaagomanire marigicîrîtie Jeremia kûu hekarûrî.

¹⁰ Rîrîa anene a Juda meegwire maûndû mama, nîmaumire nyombarî ya mûthamaki na makîthiî hekarûrî na magîkara nthî vandû vetagwa Mwîrîga Mûcerû.

¹¹ Athînjîri-Ngai na arathi nîmaacokire makîra anene na andû onthe atîrî, “Mûndû ûyû avatiî gûtuîrwa kûûragwa, nîûndû nîarathîte maûndû macûku megiî îtûûra rîîrî. Muonthe nîmweîguîra na matû menyu.”

¹² Jeremia nîwacokire akîarîria anene na andû onthe akîmeera atîrî, “Ngai-Mûnene nîwandûmire ndathîre hekarû îno na îtûûra rîîrî maûndû mau monthe mwegua.

¹³ Kwoguo rîu rûngariani mîthiîre yenyu na ciîko cienyu, na mwathîkîre mûgambo wa Ngai-Mûnene Ngai wenyu. Nake Ngai-Mûnene nîakwîricûkwa atige gwîka maûndû marîa augîte nîakûmwîka.

¹⁴ Nwatî vakwa nie, rîu nîrî njararî cienyu. Mbîkani ûrîa mûkwona ûrî mwaro na mwagîrîru kûrî mue.

¹⁵ Nwatî menyani nama atî mwambûraga, mue na îtûûra rîîrî rîonthe atî nîmûgûcokererwa nî nthakame ya mûndû ûtarî na mavîtia, nîûndû nama nî Ngai-Mûnene wandûmire mbarie ciugo ino mûkîgucaga.”

¹⁶ Nao anene na andû onthe nîmerire athînjîri-Ngai na arathi atîrî, “Mûndû ûyû ndagîrîrwe nî gûtuîrwa kûragwa nîûndû atwarîria na rîîtwa rîa Ngai-Mûnene Ngai wetû.”

¹⁷ Vuva wa ûguo atongoria amwe a vûrûri nîmarûngamire na makîarîria andû arîa magomanîte makîmeera atîrî,

¹⁸ “Mika wa Moreshethi nîwarathire vîndî îrîa Hezekia aarî mûthamaki wa Juda, na akîîra andû onthe a Juda atî, ‘Ngai-Mûnene mwene vinya wonthe augîte, Zayuni nîgûkaarîmwa ta ûrîa mûraû ûrîmaga mûgûnda, Jerusalemu gûgaatuîka îganjo, nakîo kîrîma varîa hekarû îtumîtwe gîtuîke mûtitû.’

¹⁹ “Mûthamaki Hezekia wa Juda na andû onthe a Juda nîmaamûragire? Kinthî tîkwa Hezekia etigîre Ngai-Mûnene na agîcaria wendi wake nake Ngai-Mûnene akîricûkwa gwîka maûndû macûku marîa augîte nîakûmeka? Nwatî tue nîkwa tûregîrîra ûndû mûcûku mûno.”

²⁰ Kwarî mûndû wîngî wetagwa Uria mûvîcî wa Shemaia kuuma Kiriathi Jearimu. Ke arathire ûvoro wîgiî îtûûra rîîrî na vûrûri ûyû akîgwetaga rîîtwa rîa Ngai-Mûnene na ciugo wata cia Jeremia.

²¹ Na rîrîa mûthamaki Jehoiakimu vamwe na athigari ake na anene onthe meegwire ciugo ciake, mûthamaki nîwavangire kûmûûraga. Nwatî rîrîa Uria eeguire ûvoro ûcio, nîwetigîre na akîûra akîthiî Misiri.

²² Mûthamaki Jehoiakimu nîwacokire agîtûma Elinathani mûvîcî wa Akibori vamwe na arûme engî mathiî Misiri nîguo magîre Uria.

²³ Nao nîmaamûnyitire, makîmûcokia kûrî mûthamaki Jehoiakimu. Nake mûthamaki nîwamûragire na rûviû na agikia kimba gîake mbîrîrarî kûrîa kûthikagwa andû onthe.

²⁴ Nwatî Jeremia ethagîrwa akîgitîrwa nî Ahikamu mûvîcî wa Shefani, nîguo ndakarekererue kûrî andû aûragwe.