Jeremia 25 - ÎVUKU RÎA ÛVORO MWARO

Nthû kuuma mwena wa rûgûrû

¹ Mwaka wa kana, Jehoiakimu mûvîcî wa Josia arî mûthamaki wa Juda, Ngai-Mûnene nîwavere Jeremia ndûmîrîri îgiî andû a Juda. Vîndî îo kwarî mwaka wa mbere wa Nebukadinezarû arî mûthamaki wa Babuloni.

² Jeremia nîwavere andû onthe a Juda na a Jerusalemu ndûmîrîri îo akîmera atîrî,

³ “Îvinda rîa mîaka mîrongo îîrî na îthatû (23) kuuma mwaka wa îkûmi na îthatû Josia mûvîcî wa Amoni, arî mûthamaki wa Juda nginya ûmûnthî, Ngai-Mûnene ethîrîtwe akîmbarîria. Vîndî îo yonthe mbîthîrîtwe ngîmûva ndûmîrîri îo ndagûtigithîrîria, nwatî mue nîmwaregire kûmîthikîrîria.

⁴ Mue mûtienda kûmîgua kana kûmîthikîrîria wana ethîrwa Ngai-Mûnene atûûraga amûtûmagîra arathi ndungata ciake atagûtigithîrîria.”

⁵ Maamwîraga atîrî, “Mûndû wa wonthe nîatigane na mîthiîre yake mîcûku na maûndû ma waganu; nîguo mûtûûre vûrûrirî ûrîa Ngai-Mûnene aamûveere vamwe na methe menyu ûtuîke wenyu tene na tene.

⁶ Mûtikarûmîrîre ngai ciîngî mûigooce kana mûitungatîre, wana kana mûndakarie nîûndû wa kûgooca mîvuanano îrîa mwerûthîre na njara cienyu. Mwathîkîra Ngai-Mûnene, ke ndakaamûverithia.

⁷ Kûnarî ûguo, Ngai-Mûnene arauga atî mue nîmwaregire kûmûthikîrîria. Nîmwamûrakaririe nîûndû wa mîvuanano îrîa mwerûthîîre na mûkîîretera thîna mue ene.”

⁸ Kwoguo Ngai-Mûnene mwene vinya wonthe arauga atîrî, “Nîûndû nîmûregete kwathîkîra ciugo ciakwa,

⁹ nîngûtûma mîvîrîga yonthe ya mwena wa rûgûrû, na Nebukadinezarû mûthamaki wa Babuloni, ndungata yakwa matharîkîre vûrûri ûyû na atûûri a guo vamwe na mavûrûri monthe marîa mamarigicîrîtie. Nîngamacûkangia viû na ndûme megue guoya, manyararwe na matûûre na gîconoko.

¹⁰ Nîngakiria arîa onthe makethîrwa makîanîrîra marî na gîkeno na macanjamûkîte wana arîa makethîrwa makinîra mûviki na mûvikania. Mîgambo ya ithîi ndîkeguîka na taa nîikavorua.

¹¹ Vûrûri ûyû wonthe nîûkomomorwa ûtuîke îganjo na mavûrûri marîa mariganîtie naguo nîmagaatungatîra mûthamaki wa Babuloni îvinda rîa mîaka mîrongo mûgwanja.

¹² Mîaka mîrongo mûgwanja yathira nîngaverithia mûthamaki wa Babuloni na vûrûri ûcio. Nîngacûkangia vûrûri ûcio wa Akalidei nîûndû wa mevia mao na ndûme ûtûûre ûrî îganjo tene na tene.

¹³ Nîngatûma ciugo irîa naririe ciîgiî vûrûri ûyû na maûndû monthe marîa mandîkîtwe îvukuurî rîîrî marîa Jeremia aarathîte îgûrû rîa mavûrûri monthe mavinge.

¹⁴ Andû a Babuloni nîmagaatuîka ngombo cia mavûrûri mengî na athamaki engî. Nîngamaverithia kûringana na maûndû macûku marîa meekire.”

Îtuîro rîa Ngai kûrî mavûrûri

¹⁵ Ngai-Mûnene, Ngai wa Isiraeli aambîrire atîrî, “Oca gîkombe gîkî Kîam ndivei kuuma njararî yakwa gîcûrîte marakara makwa, ûkîvire mavûrûrirî marîa ngûgûtûma, na ûmanengere manyue.

¹⁶ Nîmakaanyua, marîwe na matûgûgane nîûndû wa andû arîa ngaûraga gatagatîrî kao.”

¹⁷ Kwoguo nînocire gîkombe kîu kuuma njararî cia Ngai-Mûnene, ngîthiî gûkundia mavûrûri monthe kîrîa Kîamrî kuo.

¹⁸ Nambîrîrie gûkundia Jerusalemu na matûûra ma Juda; ngîcoka gûkundia athamaki na anene a kuo, nîguo matuîke kûndû gûtarî kîndû, na werû na kûndû gwa kûnyararwa na kûndû kûrume, wata ûrîa gwîkariî ûmûnthî,

¹⁹ Faraû, mûthamaki wa Misiri, ndungata ciake, anene ake, vamwe na andû ake onthe;

²⁰ na ageni onthe arîa matûûraga Misiri. Athamaki onthe a vûrûri wa Uzi, athamaki onthe a vûrûri wa Filisiti na nîmo: Ashikeloni, Gaza, Ekironi na matigari ma Ashidodi.

²¹ Edomu, Moabu, Amoni;

²² athamaki onthe a Turo na Sidoni; athamaki a mavûrûri marîa marî rûtere rwa îria rîa Mediterania;

²³ andû arîa matûûraga Dedani, Tema, Buzi na andû onthe arîa menjagwa njuîrî igakuvîva;

²⁴ athamaki onthe a Arabia na athamaki onthe a mîvîrîga yonthe îrîa îtûûraga werûrî;

²⁵ athamaki onthe a Zimuri, athamaki onthe a Elamu na athamaki onthe a Media;

²⁶ na athamaki onthe a mwena wa rûgûrû, a kûraca na a gûkuvî marûmanîrîrîte vamwe, na mothamaki monthe ma nthî nîmaanyuîrîre gîkomberî kîu. Mûthiiarî, mûthamaki wa Babuloni nîagaakînyuîra.

²⁷ Ngai-Mûnene nîwacokire akîmbîra atîrî, “Îra andû atî nie, Ngai-Mûnene, mwene vinya wonthe, Ngai wa Isiraeli nîramera manyue marîwe na matavîke, magwe na maremwe nî gûkîra nîûndû wa mbaara îrîa ngûtûma îgîe gatagatîrî kao.

²⁸ Na mangîrega gwîtîkîra gîkombe kuuma njararî ciaku nîguo makînyuîre, nîûgacoka ûmeere atî, ‘Ngai-Mûnene mwene vinya wonthe augîte atî nwa nginya makînyuîre!

²⁹ Taroria! Rîu nîngwambîrîria kûverithia îtûûra rîrîa rîtanîtue nanie. Mûreciria nwa mûrege kûverithua? Nwa nginya mûverithue, nîûndû nîngûtûma kûgîe na mbaara kûrî andû onthe a nthî. Nînie Ngai-Mûnene mwene vinya wonthe nauga guo.

³⁰ “ ‘We Jeremia nîûkaaratha maûndû mama monthe îgûrû rîao na uuge atî: Ngai-Mûnene nîakaararama kuuma îgûrû, na arie mûgambo arî kûrîa kûtheru ekaraga, nîakaaruruma na vinya îgûrû rîgiî andû ake, nîakaaugîrîria ta andû arîa makinyangaga thavibu, îgûrû rîgiî atûûri onthe a nthî.

³¹ Înegene rîu nîrîkeguua nthî yonthe, nîûndû Ngai-Mûnene nîagaacirithia mavûrûri, nîagaatuîra andû onthe, na aûrage arîa onthe aganu. Ûguo nîguo Ngai-Mûnene arauga.’ ”

³² Ngai-Mûnene mwene vinya wonthe arauga atîrî, “Taroria mûthiro ûranyita vûrûri ûmwe kûthiî ûrîa wîngî, na rûkûngi rûnene nîrûravurutana, rumîte mîthiia ya nthî!”

³³ Mûthenya ûcio andû arîa makaûragwa nî Ngai-Mûnene makanyagania kuuma mûthiia ûmwe wa nthî kûthiî ûrîa wîngî. Matigacakaîrwa, matikaûnganua kana mathikwa; makanyagarûkua nthî ta irûndo cia thumu.

³⁴ Mue arîthi rîrani mugîrîrîtie, îgaragarieni mûurî mue atongoria a ng'ondu, nîûndû mîthenya yenyu ya kûthînjwa na kûnyaganua nîmîkinyu, mûkaûragwa ta ndûrûme irîa ithuurîtwe.

³⁵ Gûtikethîrwa kûrî na kûndû gwa kwîthitha, kana kwa arîthi kana atongoria a ng'ondu.

³⁶ Tathikîrîriani kîrîro Kîam arîthi na gûkaîrîria gwa atongoria a ng'ondu! Nîûndû Ngai-Mûnene nîaracûkangia kûndû kwao gwa kûrîthia,

³⁷ na ndîthia irîa irakirîrîrîtie nînjûkangie nîûndû wa marakara manene ma Ngai-Mûnene.

³⁸ Ngai-Mûnene nîatiganîrîtie andû ake, ta ûrîa mûnyambû ûtiganagîria ngurunga yaguo; vûrûri wao ûtuîkîte werû mûtheri, nîûndû wa mbaara ya arîa mavinyanagîrîria, na nîûndû wa marakara ma Ngai-Mûnene.