Jeremia 23 - ÎVUKU RÎA ÛVORO MWARO

Kîîrîgîrîro kîa Vuvarî

¹ Ngai-Mûnene arauga atîrî, “Arîthi arîa maûragaga ng'ondu cia ndîthia yakwa, kaî marî na thîna-î!”

² Kwoguo, ûvoro wîgiî arîthi arîa mamenyagîrîra andû akwa, Ngai-Mûnene Ngai wa Isiraeli arauga atîrî, “Mue nîmûnyaganîtie andû akwa, mûkamengata na mûkarega kûmatungatîra. Rîu nîngûmûverithia nîûndû wa maûndû macûku marîa mwîkîte.

³ Nîngaacoka nyûnganie matigari ma ng'ondu ciakwa kuuma mavûrûrirî monthe kûrîa nîinyaganîrîtie, na nîicokie ndîthiarî ciacio. Nîigaacoka iciarane na ciongerereke.

⁴ Nîngaiva arîthi a kûimenyerera, nacio itigetira rîngî kana imaka, na gûtirî wanarî îmwe îkaaûra. Ûguo nîguo Ngai-Mûnene arauga.

⁵ “Taroria, îvinda nîrîgakinya, rîrîa ngaathuura mûndû mûthingu wa rûciaro rwa Daudi atuîke mûthamaki, nake nîakaathana ecûrîtwe nî ûûgî. Nîakoonania kîvooto na waragania vûrûrirî wonthe.

⁶ Îvindarî rîake andû a Juda nîmakavonokua, nao andû a Isiraeli matûûre marî na thayû. Agetagwa, ‘Ngai-Mûnene nîke ûthingu wetû.’

⁷ “Kwoguo ta roria, Ngai-Mûnene arauga îvinda nîrîgûkinya rîrîa andû matakevîta makiugaga atî, ‘Wata ûrîa Ngai atûûraga mwoyo ûrîa warutire andû a Isiraeli vûrûrirî wa Misiri,’

⁸ nwatî makevîtaga makiugaga, ‘Wata ûrîa Ngai-Mûnene atûûraga mwoyo, ûrîa watongoririe andû a Isiraeli kuuma mavûrûrirî marîa marî mwena wa rûgûrû na akîmaruta mavûrûrirî monthe kûrîa aamanyaganîrîtie.’ Nao nîmagacoka matûûre vûrûrirî wao kîûmbe.”

Ndûmîrîri ya Jeremia îgiî Arathi

⁹ Ûvoro wîgiî arathi acio nie nîregua nthînîkîte ngororî, mavîndî makwa monthe nîmarainaina, mbîkariî ta mûrîu, ta mûndû mûvote nî ndivei, nîûndû wa Ngai-Mûnene, na nîûndû wa ciugo ciake ntheru.

¹⁰ Nîûndû vûrûri wîcûrîtwe nî itharia nîûndû wa irumi, vûrûri nî ûracakaya, na nyaki ya kûrîthia werûrî nî nyûmû. Mîthiîre yao nî îno mîcûku, matûmagîra vinya wao na njîra îtagîrîrîte.

¹¹ Ngai-Mûnene arauga atîrî, “Arathi na athînjîri-Ngai matirî na ûngai, nîrîmwonu magîka maûndû ma waganu nyombarî yakwa.

¹² Kwoguo njîra ciao ikethîrwa irî ndenderû kûrî na nduma, kûrîa makaavirwa na magwe, na nîngamaretithîria mûthiro rîrîa mwaka wa kûmaverithia ûgakinya.” Ûguo nîguo nie Ngai-Mûnene nîrauga.

¹³ Gatagatîrî ka arathi a Samaria, nîmonete ûndû ûtarî mwaro; maarathaga na rîîtwa rîa Baali, na makîvîtithia andû akwa a Isiraeli.

¹⁴ Nwatî gatagatîrî ka arathi a Jerusalemu, nîmonete magîka ûndû mûcûku mûno; mekaga ciîko cia ûtharia na makaveenania. Mekagîra andû arîa marî ciîko njûku vinya nîguo matikagarûrûke matiga waganu, onthe kûrî nie matuîkîte ta Sodomu, na atûûri a kuo matuîkîte ta Ngomora.

¹⁵ Kwoguo, ûvoro wîgiî arîthi acio Ngai-Mûnene arauga atîrî: “Nîngûmava kîndû kîrûrû ta nyongo, na nîmakundie manjî marî na ûrogi manyue. Nîûndû kuuma kûrî arathi a Jerusalemu, kûregana na Ngai gûtambîte vûrûrirî wonthe.”

¹⁶ Ngai-Mûnene nîwerire andû a Jerusalemu atîrî, “Mûtikathikagîrîrie arathi arîa mamûrathagîra, makîmûvecaga ciîrîgîrîro itavingaga, maragia ûvoro wa cioneki cia gwîciirîria na tî maûndû marîa nîmerîte maarie.

¹⁷ Vîndî cionthe meraga andû arîa mareganîte na kiugo Kîam Ngai-Mûnene atî, ‘Maûndû maku monthe nî maro tî macûka.’ Nake mûndû ûrîa wîthagîrwa arî na ngoro nyûmû maugaga atîrî, ‘Ndûkagîa na ûndû mûcûku.’

¹⁸ “Nîûndû, nî ûrîkû gatagatîrî kao wanarûngama mbere ya Ngai-Mûnene, nîguo amenye na ataûkîrwe nî maûndû marîa augîte. Na nî ûrîkû wanarûmbûyania na kiugo gîake na agîkîanîrîra?

¹⁹ Ta roria, marakara kuuma kûrî Ngai-Mûnene maûkîte ta rûkûngi rûnene rwa kûringa kîongo Kîam andû arîa aganu.

²⁰ Marakara ma Ngai-Mûnene matikathira nginya rîrîa akethîrwa ekîte na akavingia wendi wa meciria make. Mûthiiarî, nî ûgataûkîrwa nîguo waro.”

²¹ Ngai-Mûnene arauga atîrî, “Ndianatûma arathi, nwatî nîmaavinyûrire na ndianameera wanarî ûndû nwatî nîmaarutire ûrathi.

²² Nwatî kethîrwa manamenya meciria makwa nîmangîanîrîre ndûmîrîri yakwa kûrî andû akwa na nîmangîatûmire magarûrûke matigane na mîtûûrîre yao mîcûku na matige gwîka maûndû macûku.”

²³ Ngai-Mûnene arauga atîrî, “Nie nî Ngai ûrî vakuvî, ndirî Ngai wî kûraca.

²⁴ Kûrî mûndû ûngîîthitha kûndû ndangîvota kûmwona? Nîkwa mûtaicî atî nie Ngai-Mûnene ndûraga kûndû kuonthe, îgûrû wana gûkû nthî?

²⁵ Nîmbîguîte maûndû ma maveeni marîa arathi arîa maaragia maveeni marîtie mambîgiî na njîra ya rîîtwa rîakwa makiugaga atî, ‘Nîrîmûrotu! Nîrîmûrotu!’

²⁶ Nîmatûûra mavîtithagia andû akwa nginya rî, na morathi ma maveeni marîa matungîte na ngoro ciao?

²⁷ Na njîra ya iroto icio ciao mavangîte ûrîa mangîtûma andû akwa mariganîrwe nînie wata ûrîa methe mao ma tene maariganîrwe nî nie, makîrûmîrîra Baali.

²⁸ Mûrathi ûrîa ûrotete nîavecane ûvoro wa kîroto gîake, nwatî mûrathi ûrîa ûrî na ndûmîrîri yakwa nîamîvecane na wîvokeku. Nie Ngai-Mûnene nîrauga atîrî, ‘Ngano tî ûndû ûmwe na rûûa.’

²⁹ Ngai-Mûnene arauga atî, kiugo gîakwa nîta mwaki; nîta nyondo îrîa yatûranagia mathiga magatuîka icunjî.

³⁰ Kwoguo nie Ngai-Mûnene nîngûrûa na arathi arîa mocaga ndeto kuuma kûrî arathi arîa engî na magaciaria ta yo ndûmîrîri yakwa.

³¹ Nama nie Ngai-Mûnene nîngûrûa na arathi arîa maîanaga ciugo ciao, magacoka makauga atî nî Ngai-Mûnene ugîte.

³² Tanthikîrîria! Nie Ngai-Mûnene nîrauga atî, nîndeganîte na arathi arîa marotaga iroto cia maveeni. Na njîra ya iroto ciao na mîario ya maveeni, nîmatûmîte andû akwa mauma njîrarî ya ma. Nie ndianamatûma, kana nîmera mathiî, kwoguo matirî na ûtethio kûrî andû akwa.”

Ndûmîrîri ndito ya Ngai-Mûnene

³³ Ngai-Mûnene aambîrire atîrî, “Mûrathi kana mûthînjîri-Ngai, kana mûndû ûmwe wa andû aya angîgakûûria atî, ‘Ndûmîrîri ndito ya Ngai-Mûnene nî ndûî?’ Nîûkaamûcokeria atî, ‘Mue nîmue mûrigo kûrî Ngai-Mûnene nake nîakûmûtecanîria.’

³⁴ Na mûrathi kana mûthînjîri-Ngai, kana ûmwe wa andû akwa angîkauga atî, ‘Ndûmîrîri ndito ya Ngai-Mûnene,’ nîngamûverithia vamwe na nyomba yake.

³⁵ Kwoguo wa mûndû agîrîrwe nî kûria ûrîa mariganîtie nake kana mûrwang'ina atî, ‘Ngai-Mûnene aracokirie atîa, kana Ngai-Mûnene araugire atîa?’

³⁶ Nwatî, ‘Ndûmîrîri ndito ya Ngai-Mûnene mûtikamîgwete rîngî,’ ciugo irîa mûndû aragia nîcio mûrigo wake ke mwene. Nîûndû andû nîmagarûranagia ciugo cia Ngai ûrîa ûtûûraga mwoyo, Ngai-Mûnene mwene vinya wonthe, Ngai wao.

³⁷ Nîmûkaûria mûrathi atî, ‘Ngai-Mûnene agûcokerie atîa?’ Kana ‘Ngai-Mûnene augîte atîa?’

³⁸ Nwatî mangîregana na watho wakwa na mauge atî, ‘Ndûmîrîri ndito ya Ngai-Mûnene,’ namakaanirie matikauge ndûmîrîri ndito ya Ngai-Mûnene, meere atî

³⁹ nîngamaûkîrîria na nîmate maume vakuvî nanie, o ene, îtûûra rîrîa namaveere wana methe mao.

⁴⁰ Nîngamaretera ûndû wa gûtûma matûûre marî anyarare na marî na gîconoko gîtakaariganîra.”