Jeremia 21 - ÎVUKU RÎA ÛVORO MWARO

Jeremia nîwarathire kûvotwa kwa Jerusalemu

¹ Îno nîo ndûmîrîri îrîa yakinyîre Jeremia yumîte kûrî Ngai-Mûnene, rîrîa mûthamaki Zedekia aatûmire Pashuri mûvîcî wa Malikia, na Zefania mûthînjîri-Ngai mûvîcî wa Maseia, makamwîre atîrî,

² “Ûria ûvoro wetû kûrî Ngai-Mûnene, nîûndû mûthamaki Nebukadinezarû wa Babuloni nîevarîrîtie gûtûtharîkîra, nwa kwîthîrwa Ngai-Mûnene nîagûtûringîra Kîamma nîguo Nebukadinezarû atigane natue.”

³ Nake Jeremia nîwamerire

⁴ mathiî makeere Zedekia atî Ngai-Mûnene Ngai wa Isiraeli arauga atîrî, “Taroria, nîngwoca indo cionthe cia mbaara, irîa athigari aku maratûmîra kûrûa na mûthamaki wa Babuloni na Akalidei arîa marigicîrîtie îtûûra rîaku. Nîngaciûngania cionthe nîcige gatagatî ka îtûûra rîîrî.

⁵ Nie mwene nîngarûa nawe na vinya wakwa wonthe, nîrî na marakara, mang'ûrîka na ûrûrû mwîngî.

⁶ Nîngaûraga andû onthe arîa matûûraga îtûûra rîîrî; andû wana nyamû. Ngaamaûraga na mûrimû mûcûku mûno.

⁷ Nie Ngai-Mûnene nîrauga atî vuva wa ûguo, nîngaavecana Zedekia mûthamaki wa Juda, ndungata ciake, na andû a îtûûra rîîrî, arîa magatigarua nî mîrimû, mbaara na yûra kûrî mûthamaki Nebukadinezarû wa Babuloni na nthû cienyu irîa ciendaga kûmûraga. Nebukadinezarû akamaûraga na rûviû na gûtirî mûndû ûgaatigara kana arekererue wana kana eguîrwa ntha.”

⁸ Nawe Jeremia nîûgacoka wîre andû aya atî Ngai-Mûnene arauga atîrî, “Taroria, nîmbigîte mbere yaku gûtûûra mwoyo na gûkua.

⁹ Mûndû wa wonthe ûgatigwa îtûûrarî rîîrî nîakaaûragîrwa mbaararî nî yûra na mûrimû. Nwatî ûrîa ûkaumîra na enenganîre kûrî Akalidei arîa mamûrigicîrîtie, nîakaavonokia mwoyo wake.

¹⁰ Nînduîte meciriarî makwa kûthiria îtûûra rîîrî na kûrîcûkangia. Nîrîkanenganîrwa kûrî mûthamaki wa Babuloni, nake nîakaarîvîvia na mwaki.”

Andû a nyomba ya mûthamaki wa Juda nîmaatuîrîrwe

¹¹ Nî ûkeera andû a nyomba ya mûthamaki wa Juda atîrî, “Thikîrîriani kiugo Kîam Ngai-Mûnene,

¹² Mue andû a nyomba ya Daudi! Ngai-Mûnene arauga atîrî: Tucagani ciira na kîvooto mîthenya yonthe, na onthe arîa macunîtwe indo ciao ûmavonokie, kuuma kûrî arîa mamavinyagîrîria. Ethîrwa tîmwîka guo marakara makwa nîmakana ta mwaki ûrîa ûtavorekagia, nîûndû wa maûndû menyu macûku marîa mwîkaga.”

¹³ Taroria nie nîrarûa namue mue mûtûûraga Kîamndarî, “Mue mûtûûraga rûnyanjararî rwa îthiga, mue mûragia atî nû ûngînyûrûrûka gûtûtharîkîra, nîûrîkû ûngîtonya kûrîa tûtûûraga?

¹⁴ Nîngamûverithia kûringana na ciîko cienyu, nîngagwatia mûtitû wenyu mwaki, na ûvîvie kîndû kîonthe kîrîa kîûthiûrûrûkîrîtie. Ûguo nîguo nie Ngai-Mûnene nîrauga.”