Jeremia 20 - ÎVUKU RÎA ÛVORO MWARO

Ngucanio ya mûrathi Jeremia na Mûthînjîri-Ngai Pashuri

¹ Pashuri mûthînjîri-Ngai, mûvîcî wa Imeri, na mûrûngamîrîri mûnene wa nyomba ya Ngai-Mûnene, nîweguire Jeremia akîratha maûndû mau.

² Pashuri nîwacokire akîriva mûrathi Jeremia, akîmûthaîka na mvîngû, na akîmwiga kîvingorî Kîam mwena wa îgûrû wa Benjamini kûu nyombarî ya Ngai-Mûnene.

³ Mûthenya ûcio wîngî kîraûko, Pashuri ovora Jeremia mvîngû, Jeremia nîwamwîrire atîrî, “Ngai-Mûnene ndagûcoka gûgwîta Pashuri, nwatî agawîtaga, ‘Guoya kûndû kuonthe.’

⁴ Nîûndû Ngai-Mûnene arauga atîrî, ‘Ta roria nîngatûma ûtuîke kiumo Kîam guoya kûrî we mwene na kûrî arata aku onthe. O nîmakaûragîrwa mbaararî nî nthû ciao ûkîonaga. Nîngavecana vûrûri wonthe wa Juda kûrî mûthamaki wa Babuloni. Nake nîakamoca amavire Babuloni marî mîgwate na nîakamaûraga.

⁵ Îgûrû rîa ûguo, ûtonga wonthe wa îtûûra, umithio warîo, indo cionthe ciarîo cia goro, vamwe na igîîna cia mûthamaki wa Juda, nîngairekereria itavwe nî nthû ciao na vinya, maivire vûrûrirî wa Babuloni.

⁶ Nawe Pashuri, na andû onthe arîa matûûraga nyomba gwaku, nîmûgaatavwa mûvirwe Babuloni mûrî ngombo. Kûu nîkuo we na arata aku onthe arîa wavecaga ûrathi wa maveeni mûgakuîra na mûthikwe.’ ”

Mateta ma Jeremia kûrî Ngai-Mûnene.

⁷ We Ngai-Mûnene nîûmveenetie nanie ngaveeneka, we ûrî na vinya kûngîra na wî mûmvootu. Mûthenya mûgima nduîkîte kîndû gîa kûthekererwa, nthekagîrîrwa nî andû onthe.

⁸ Nîûndû rîrîa ngwaria ûndû nîkwa ndetaga, na ngaugîrîria atî: “Mbaara na gûcûkangia!” Nîûndû kiugo Kîam Ngai-Mûnene kûrî nie gîtuîkîte gîa kûmenereria na kûnyararithia mûthenya wonthe.

⁹ Nînacokire ngiuga atî: “Ndikamûgweta, kana mbaria rîngî ngîgwetaga rîîtwa rîake,” ngororî yakwa îthagîrwa îgîakana ta mwaki, ûvingîrîtwe mavîndîrî makwa. Nîngeragia mûno ndûkaume kuo nwatî nînemagwa.

¹⁰ Mbîgucaga andû engî makîaria na kîvwe, makiugaga atî: “Guoya ûrî kûndû kuonthe!” Engî marauga: “Nîtûmûthitange! Nîtûmûthitange!” Wana arata akwa onthe arîa mambicî waro metererete kwona ngîgwa. Marauga atî: “Nwa kûvoteke aveenue, tûcoke tûmûvoote na twîrîvîrîrie.”

¹¹ Nwatî we Ngai-Mûnene ûrî vamwe nanie, kûrî nie we ûrî mûthigari njamba ya kûmakania; kwoguo arîa manyariraga matikamvoota, nîmagaconoka mûno nîûndû matikavootana. Gîconoko Kîamo nîgîtûûra tene na tene gîtikariganîra.

¹² We Ngai-Mûnene mwene vinya wonthe, we ûthimaga andû arîa athingu, we wonaga ngoro na meciria ma andû, ndethia mone ûkîndîvîrîria kûrî nthû ciakwa, nîûndû mbigîte mwîvoko wakwa kûrî we.

¹³ Inîra Ngai-Mûnene; Kumiani Ngai-Mûnene! Nîûndû nîavonoketie mwoyo wa athîni kuuma kûrî aganu.

¹⁴ Kûgwatwa nî kîrumi nî mûthenya ûrîa naciarirwe, mûthenya ûrîa nyanya anjiarire ndûkaagîa na kîrathimo.

¹⁵ Kûgwatwa nî kîrumi nî mûndû ûrîa waretere vava ndûmîrîri akîmwîra atî: “Wî mûciarîre kavîcî,” Agîtûma ecûrwe nî gîkeno.

¹⁶ Mûndû ûcio arotuîka ta matûûra, marîa Ngai-Mûnene omomorire atarî na ntha. Mûndû ûcio nîegue kîrîro kîraûko, na mûthenya egue înegene rîa mbaara,

¹⁷ nîûndû ndambûraga nîrî îvurî rîa nyanya; nyanya angîatuîkire mbîrîra yakwa, îvu rîake rîngîtûûraga rîrî înene.

¹⁸ Nîndûî gîatûmire njiarwe? Naciarirwe nîguo monage mathîna na kîeva, na njonorithague ûtûûrorî wakwa wonthe?