Jeremia 2 - ÎVUKU RÎA ÛVORO MWARO

Andû a Isiraeli nîmagitagîrwa nî Ngai

¹ Ndûmîrîri ya Ngai-Mûnene nîyanginyîre ngîrwa atîrî,

² “Thiî wanîrîre andû onthe a Jerusalemu makîgucaga ûmeere Ngai-Mûnene arauga atî, “Nînîraririkana ûrîa warî mwîvokeku vîndî îrîa warî mwîthî, na ûrîa wamendete rîrîa warî mûviki, wana ûrîa warûmanagîrîra nanie werûrî, vûrûrirî ûrîa ûtaanavandwa kîndû.

³ “Isiraeli, nie nînakwamûrîte, warî maciaro ma mbere ma maketha makwa, arîa onthe maagwîkire naaî nînamaverithirie, ngîtûma magwatwe nî maûndû macûku, ûguo nîguo nie Ngai-Mûnene nîrauga.”

Wîvia wa methe ma tene ma Isiraeli

⁴ Thikîrîriani ndûmîrîri ya Ngai-Mûnene, mue njiarwa cia Jakovu na mîvîrîga yonthe ya Isiraeli.

⁵ Ngai-Mûnene arauga atîrî, “Methe menyu mamonire na mavîtia marîkû, nîguo magarûrûke na mandiganîrie, na makîrûmîrîra mîvuanano îtarî na vata, magîtuîka andû matarî na vata?

⁶ Matieyûria atîrî, ‘Arîkû Ngai-Mûnene, ûrîa watûrutire vûrûri wa Misiri, na agîtûtongoria werûrî, vûrûri warî mûmagaru na warî na marima, kûndû gûtaarî manjî na kwarî nduma nene, vûrûri ûtavîtûkagîrîrwa nî mûndû, kana ûgatûûrwa nî andû?’

⁷ Nînamûretire vûrûrirî mûnoru, mûkenerere matunda ma guo, na maûndû mengî maro ma guo. Nwatî mwakinya kuo, nîmwaûgwatirie gîko, na mûkîgwatia vûrûri ûrîa namûveere mûgiro.

⁸ Athînjîri-Ngai matiaûria atîrî, ‘Ngai-Mûnene arî kû?’ Arîa maarî na ûûgî wa Watho matiamenya, athani nîmareganire nanie. Arathi maarathire na rîîtwa rîa Baali na makîgooca mîvuanano îrîa îtarî vata.”

Ciira wa Ngai na andû ake

⁹ Kwoguo nie Ngai-Mûnene nîrî na ciira namue, na nîngacirithia njiarwa cienyu.

¹⁰ Ringani mûringo wa îria rîa Kuporo mûkoone kana mûtûme andû kendari magaûtuîrie waro; na moone kana kwanethîrwa na ûndû ta ûcio.

¹¹ Kûrî vûrûri wanakûranania ngai ciao na ciîngî, wana ethîrwa ngai icio tî cia ma? Nwatî andû akwa nîmandiganîrîtie nie Ngai ûrîa ûrî riiri, makegîra na ngai itangîmatethia.

¹² Mue îgûrû tamakuani nî ûndû ûyû, îtigîreni na mûvavûke mûno, ûguo nîguo nie Ngai-Mûnene nîrauga.

¹³ Nîûndû andû akwa nîmekîte mavîtia maîrî; nîmandiganîrîtie nie îtherûkîro rîa manjî ma mwoyo, na makeînjîra iriko ciao cia manjî; iriko mbatûkangu itangiga manjî.

Maciaro ma andû a Isiraeli gûtura wîvokeku

¹⁴ Isiraeli nî ngombo kana nîkwa aaciarîrwe ûkomborî? Nîndûî gîtûmîte atuîka ta nyamû ya kûguîmwa?

¹⁵ Nthû ciake ciîthîrîtwe ikîmûraramîra ta mûnyambû, matuîte vûrûri wake werû, matûûra nî maganjo matitûragwa.

¹⁶ Îgûrû rîa ûguo andû a Memufisi na Tahifanihesi, nîmaunangîte nthûmbî yake.

¹⁷ Isiraeli na kinthî tî we wîreterete maûndû mama monthe, nîûndû wa kûndiganîria nie Ngai-Mûnene Ngai waku, rîrîa nagûtongoreretie tûrî njîrarî?

¹⁸ Nîûgîa na umithio ûrîkû wathiî Misiri kûnyua manjî ma rûnjî rwa Nilo? Kana nî ûgîa na umithio ûrîkû wathiî Asîria, kûnyua manjî ma Rûnjî ma Efarati?

¹⁹ Ûkaverithua nî waganu waku, na ûcirithue nî ûndû wa kûregana nanie. Menya na wone atî ûcio nî ûndû mûcûku na mûrûrû, kûregana na Ngai-Mûnene Ngai waku. We ndûnîtigagîra. Ûguo nîguo Ngai-Mûnene mwene vinya wonthe arauga.

Isiraeli nîmeevirie na makîgooca Baali

²⁰ Kwa îvinda îraca nîwaunangire îcoki rîaku, na ûgîtucanga nyororo ciaku; na ûkiuga atîrî, “Tîngûtungatîra.” Nama karîmarî wa konthe, rungu rwa mûtî wa wonthe watuîkire ta îraa, wînamagîrîre ngai cia mîvuanano.

²¹ Nwatî nînakûvandire ta mûthavibu mûthuure mbegû mbaro kuuma mûthavibu ûrîa mwaro. Nî ndûî gîtûmîte ûgarûrûke ûtuîke ta kîndû gîcûku, kana ta mûthavibu wa kîthakarî?

²² Wana ûngîîthambia na thabuni ûrî na vinya atîa, maroro ma mevia maku matingîthira. Ûguo nîguo Ngai-Mûnene arauga.

²³ Nwa uuge atî, “Nie ndirî na mûgiro, na nie ndianagooca Baali? Taroria mîthiîre yaku kûu Kîandarî, ta menya ûrîa wekire kuo; we wîkariî ta mori ya ngamîîra, îvinyûraga ava na vaarîa îrî na mûruke.

²⁴ Wîkariî ta nyûmbû ya werûrî, îrîa îkaraga îkînunganungagîra îrî na mûruke. Nî ûrîkû ûngîthiria ngumba yayo? Nyûmbû ya njamba îngîmîcaria ndîngîmîtura; kavinda ka yo gakinya nîo îyumagîria.

²⁵ Isiraeli ndûkanogie magûrû maku, kana ûng'aria mîmero yaku. Nwatî ugaga atî: ‘Gûtirî na kîîrîgîrîro, nîûndû nînendire ngai ng'eni, icio nîcio ngagoocaga.’ ”

Isiraeli avatiî kûverithua

²⁶ Wata ûrîa mwîi aconokaga agwatwa, nwata guo andû a Isiraeli magaconoko; o ene, athamaki ao, anene ao, athînjîri-Ngai na arathi ao.

²⁷ Acio nîo meraga mûtî atî: “We nîwe vava,” na makeera îthiga atî: “We nîwe wanjiarire,” nîûndû nîmandiganîrîtie. Nwatî mavinda ma thîna maugaga atîrî, “Ûkîra na ûtûvonokie!”

²⁸ Nwatî irîkû ngai cienyu icio mwîrûthîrîte? Nîciûkîre, ethîrwa nwa ivote kûmûtethia, vîndî îrîa mûrî thînarî. We Juda mwîgana wa ngai ciaku nîta mwîgana wa matûûra maku.

²⁹ Mûrareta mateta menyu kûrî nie nîkî? Muonthe nîmûreganîte nanie, ûguo nîguo Ngai-Mûnene arauga.

³⁰ Narutire wîra wa mana kûverithia ciana cienyu, itietîkîra kûrûngwa; ta ûrîa mûnyambû ûûragaga kîndû, nwa ta guo mwaûragire arathi enyu.

³¹ Mue rûciaro rûrû, thikîrîriani ciugo cia Ngai-Mûnene. Nîkwa mbîthîrîtwe mbîkariî ta werû kûrî andû a Isiraeli, kana vûrûri ûrî na nduma nene? Nîndûî vi gîtûmaga andû akwa mauga atî, “Tûrî na wîathi na tûtigaûka kûrî we rîngî?”

³² Mwîrîtu nwa ariganîrwe nî mathaga make, kana mûviki ariganîrwe nî nguo yake ya ûviki? Nwatî andû akwa nîmariganîrîtwe nînie, îvinda rîa mîthenya îtangîtarîka.

³³ Nama we nîwîcî gûcaria andû a kwendana nao, wana nginya aka arîa aganu nîûmathomithîtie mîthiîre yaku.

³⁴ Nguo ciaku irî na nthakame ya athîni matarî na mevia, ndwanamethîrîria makîvunja nyomba yaku, nwatî kûnarî ûguo,

³⁵ we ugaga atî: “Nie ndirî na mevia, nama marakara ma Ngai-Mûnene marî varaca nanie.” Taroria nîngûkûverithia nîûndû wa kuga atî ndûrî mwîvia.

³⁶ Wocaga ûvoro wa kûgarûrûka na ûvûthû nîkî ûkagarûrîra mîthiîre yaku? We nîûgûconorithua nî andû a Misiri, wata ûrîa waconorithirue nî andû a Sîria.

³⁷ Nîmûkauma kûu Misiri, mwîkîrîte njara ciongo nî nthoni. Nie Ngai-Mûnene nîndeganîte na andû arîa wîvokete, na ûtethio wao ndûgatûma maûndû maku mavue.