Jeremia 19 - ÎVUKU RÎA ÛVORO MWARO

Nyûngû nguû

¹ Ngai-Mûnene ambîrire atîrî, “Thiî, ûgûre nyûngû ya yûmba na woce atongoria amwe a andû a Isiraeli na athînjîri-Ngai arîa akûrû,

² ûcoke ûthiîcanie nao Kîamndarî Kîam mûvîcî wa Hinomu ûtonyerete mwîrîgarî wa Vigae. Wakinya kuo, wanîrîre maûndû marîa nîrakwatha.

³ Nîûkauga atîrî, ‘Mue athamaki a Juda na atûûri onthe a Jerusalemu ta thikîrîriani ûrîa Ngai-Mûnene, mwene vinya wonthe na Ngai wa Isiraeli arauga; nama nîngûrete mûthiro mûnene mûno vandû ava, nîguo mûndû ûrîa ûkegua ûvoro wake akamaka mûno.

⁴ Nîmbîka ûguo nîûndû andû onthe nîmandiganîrîtie na makagwatia vandû ava mûgiro na njîra ya kûvîvîria ngai ciîngî ûbani, irîa o wana methe mao kana athamaki a Juda mataicî. Nîmecûrîtie nthamake ya andû matarî na mavîtia gûkû.

⁵ Nîmaatumîre ngai ya Baali metha ya kîgongoona nîguo mavîvîrie ciana ciao irî îtega rîa kûvîvua kûrî Baali; ûndû ûrîa nie ndaamatha meke, wana kana nîwîciria.

⁶ Kwoguo menyani atî, mîthenya nîgûkinya rîrîa vandû ava vatagetwa Tofethi rîngî, kana vetwe Kîamnda Kîam mûvîcî wa Hinomu, nwatî vagetagwa Kîamnda gîa kûraganîra. Nînie Ngai-Mûnene nauga guo.

⁷ Vandû ava nîvo ngaacûkangîria mîvango yonthe ya andû a Juda na Jerusalemu. Nîngatûma mavootwe nî nthû ciao marî mbaararî na imaûrage. Nîngatûma ciimba ciao irîwe nî iconi na nyamû cia kîthaka.

⁸ Nîngatûma îtûûra rîîrî rîtuîke vandû va kûvavûra andû na kûmamakia nîûndû wa mîthiro îrîa rîkethîrwa nayo. Mûndû wa wonthe ûkavîtûkîrîra vakuvî narîo nîakaamaka.

⁹ Nthû nîikaarigicîria îtûûra rîu na kûgeria kûûraga arîa matûûraga kuo. Nîmagaatûma kûgîe na thîna nene mûno kûu îtûûrarî rîu, na andû mambîrîrie kûrîcana o ene; andû nîmakaarîcaga ciana ciao cia anake na cia erîtu.’

¹⁰ “Nawe nîûgacoka ûrage nyûngû andû onthe arîa mwathiîte nao makîonaga,

¹¹ na ûmeere Ngai-Mûnene mwene vinya wonthe augîte atî: nîngaûraga andû aya na îtûûra rîîrî, wata ûrîa mûndû aûragaga nyûngû na ndîngîrûthwa îgatuîka nyûngû ng'ima rîngî. Andû nîmakaathika ciimba ciao Tofethi nîûndû gûtikethîrwa na kûndû kwîngî gwa kûmathika.

¹² Ûguo nîguo nie Ngai-Mûnene ngeka vandû ava vamwe na arîa matûûraga vo; nîngatûma îtûûra rîîrî rîkare ta Tofethi.

¹³ Nyomba cia Jerusalemu na nyomba cia athamaki a Juda, na nyomba cionthe irîa îgûrû rîa cio kwavîvagîrua ûbani kûrî njata irîa îtûûraga îgûrû na gûkarutîrwa matega ma ndivei kûrî ngai ciîngî, nîgûkaagwatwa nî mûgiro wata Tofethi.”

¹⁴ Nake Jeremia nîwacokire akiuma Tofethi kûrîa Ngai-Mûnene aamûtûmîte akanîrîre ndûmîrîri yake, na akîthiî akîrûgama nyombarî ya Ngai-Mûnene na akîîra andû onthe atîrî,

¹⁵ “Ngai-Mûnene mwene vinya wonthe, Ngai wa Isiraeli arauga atî, ‘Nîngûretera îtûûrarî rîîrî, na matûûrarî monthe maûndû monthe macûku marîa naugire nîngeka kuo, nîûndû nîmaûmîtie ciongo na makarega kwîgua ciugo ciakwa.’ ”