Jeremia 18 - ÎVUKU RÎA ÛVORO MWARO

Jeremia arî nyombarî kwa mûmbi wa nyûngû

¹ Ngai-Mûnene nîwerire Jeremia atîrî,

² “Ûkîra, na ûnyûrûke kwa mûmbi wa nyûngû, na ûrî kûu nîngakûva ndûmîrîri yakwa.”

³ Kwoguo nînanyûrûrûkire mûciî kwa mûmbi wa nyûngû, na ngîthîrîria akîruta wîra wake wa ûmbi.

⁴ Nîgwatuîkire atî kîndû kîrîa aûmba gîacûka, nîwakîûmbûraga agacoka kûmba kîngî nîguo gîkare ûrîa kîngîmûkenia.

⁵ Ngai-Mûnene nîwacokire akîmbîra atîrî,

⁶ “Mue andû a Isiraeli, anga ndingîmwîka wata ûrîa mûmbi ekire nyûngû? Taroria, wata ûrîa mûmbi ocaga ndaka ya kûûmba kîndû kîrîa akwenda, ûguo nîguo mwîthagîrwa mwîkariî mûrî njararî ciakwa.

⁷ Vîndî îrîa nîngîkauga ûndû wîgiî vûrûri kana ûthamaki atî nîngaûkûûra, nîunange na nîûcûkangie viû,

⁸ naguo vûrûri ûcio narîtie ûvoro waguo ûgarûrûke ûtigane na maûndû macûku, nîngericûkwa ndige gûûcûkangia wata ûrîa navangîte.

⁹ Na vîndî wa yonthe îrîa nîngîkera vûrûri kana ûthamaki atî nîngatûma wîvande na wîkindîrie,

¹⁰ nwatî vûrûri kana ûthamaki ûcio ûgarûrûke na wambîrîrie gwîka maûndû macûku mbere yakwa, nîngericûkwa ndige kûwîka maûndû maro marîa navangîte gûwîka.

¹¹ Kwoguo rîu, îra andû a Juda na atûûri a Jerusalemu atî nie Ngai-Mûnene, nînîravanga maûndû macûku îgûrû rîao. Nînîravanga ûrîa ngûmaverithia. Garûrûkani muonthe, wa mûndû atigane na mîthiîre yake mîcûku, mûrûngarie mîthiîre yenyu na ciîko cienyu.

¹² Nwatî o maugaga atî, ‘Tûtingîka ûguo! Nîtûthiî na mbere na mîvango yetû, na wa mûndû nî athiî na mbere gwîka maûndû macûku kûringana na ûûmû na waganu wa ngoro yake.’ ”

Andû nîmareganire na Ngai-Mûnene

¹³ Kwoguo Ngai-Mûnene arauga atîrî, “Ta ûria mavûrûrirî monthe kana kûrî mûndû wanegua ûndû ta ûyû? Isiraeli nîwîkîte ûndû mûcûku mûno.

¹⁴ Kûrî vîndî mbaravu îthiraga tûcûmbîrî twa irîma cia Lebanon? Tûrûnjî tûrî na manjî makiru mvevo kuuma kuo nîtûvûcaga?

¹⁵ Nwatî andû akwa nîmariganîrîtwe nî nie, mavîvagîria ngai cia mîvuano ûbani, nîmavîngîcîtwe njîrarî ciao, matirûmagîrîra njîra ciao cia tene, mathiîcagîra tûcangiri vandû va varavara îrîa nene.

¹⁶ Nîmatûmîte vûrûri wao ûtuîka kîndû gîa kûmakania, ûtuîke kîndû gîa kûnyararwa tene na tene. Andû onthe arîa mavîtûkagîrîra vakuvî naguo, mamakaga makainainia ciongo ciao.

¹⁷ Ngaamaûmbûra mbere ya nthû ciao ta rûkûngi rwa mwena wa îrathîro, nîngamavuvatîra vandû va kûmatethia, vîndî îrîa makethîrwa marî thînarî.”

Mûvango wa kûûraga Jeremia

¹⁸ Nao andû nîmaacokire makiuga atîrî, “Ûkani tûvange ûrîa tûkûraga Jeremia. Tûtigatura athînjîri-Ngai a gûtûthomithia kana andû aûgî a gûtûtaara na arathi a kwanîrîra ndûmîrîri ya Ngai-Mûnene. Ûkani tûmûthitange na ciugo ciake ke mwene na tûtikathikîrîrie ûrîa arauga.”

¹⁹ Nthikîrîria, we Ngai-Mûnene, na wîgue mathaithana makwa.

²⁰ Ûndû mwaro nîûrîvagwa na ûndû mûcûku? Nwatî o maramînjîra îrima ngwe, ririkana ûrîa narûngamire mbere yaku ngîkwîra ûrîa marî aro, nîguo ûthirie marakara maku kûrî o.

²¹ Kwoguo rekereria ciana ciao irîwe nî yûra, tiga maûragîrwe mbaararî, aka ao marokuîrwa nî ciana ciao na athuuri ao. Arûme ao maroûragwa nî mîrimû mîcûku, na anake ao maûragîrwe mbaararî.

²² Kîrîro nî kîguwe mîciîrî yao, rîrîa ûkamaretera gîkundi gîa acunani wa rîmwe! Nîûndû nîmamînjîrîte îrima nîguo ngwe, na magatega mîtego nîguo ngwatue.

²³ Nwatî we Ngai-Mûnene nîwîcî mîvango yao yonthe ya kûmbûraga, ndûkamarekere maûndû mao macûku, kana ûthirie wîvia wao methorî maku. Tiga magwe nthî mbere yaku, marive ûrî na marakara.