Jeremia 17 - ÎVUKU RÎA ÛVORO MWARO

Andû a Juda nîmeevirie na makîverithua

¹ Ngai-Mûnene augîte atîrî, “Mevia ma andû a Juda mandîkîtwe na karamu ga cuuma; macoretwe ngororî ciao na mûthiia mûûgî wa îthiga rîa goro, na magacorwa mîthiiarî yenyu ya metha cia magongoona.

² Andû enyu magoocagîra metharî cia kîgongoona, na mîvuanano ya ngai cia Ashera, îrîa iigîtwe mîtîrî îrîa mîruru na tûrîmarî,

³ na îgûrû rîa irîma irîa irî kûndû kwaraganu. Nîngarekereria ûtonga wenyu na mîthithû yenyu îtavwe rîrî îrîvi rîa mevia marîa mwîkîte vûrûrirî wonthe wenyu.

⁴ Nwa nginya mûtiganîrie vûrûri ûrîa namûveere, na nîngatûma mûtungatîre nthû cienyu mûrî vûrûrirî ûrîa mûtaicî, nîûndû marakara makwa makanîte ta mwaki ûrîa wakanaga tene na tene.”

Mîario mwanya mwanya

⁵ Ngai-Mûnene arauga atîrî, “Kûgwatwa nî kîrumi nî mûndû ûrîa wîvokaga mûndû, na akevoka vinya wake wa mwîrî, na ûrîa ngoro yake îreganîte na Ngai-Mûnene.

⁶ Ekariî ta kamûtitû kanini werûrî, na ndakoona ûndû mwaro ûgîûka kûrî ke, agaatûûraga kûrîa gûtangîkûra kîndû werûrî, kûndû kûrî cumbî gûtatûûragwa nî andû.

⁷ Kûrathimwa nî mûndû ûrîa wîvokete Ngai-Mûnene, ûrîa wigîte mwîvoko wake kûrî Ngai-Mûnene.

⁸ Ke ekariî ta mûtî ûvandîtwe rûtere rwa rûnjî, mîri yaguo îtambîte manjîrî. Rîrîa kwagîa na ûrugarî mûtî ûcio ndûmakaga, nîûndû mathangû maguo methagîrwa marî maigû vîndî cionthe. Ndûmakaga rîrîa gûtarî na mbura, nîûndû nîûthiîcaga na mbere gûciara.

⁹ Ngoro ya mûndû nîîvenanagia gûkîra indo cionthe, nîkuo kuumaga waganu wonthe, gûtirî mûndû ûtaûkagîrwa nîyo.

¹⁰ Nie Ngai-Mûnene nî nie nduîragia meciria ma andû, na ngathima ngoro ciao. Kwoguo mvecaga mûndû kîrîa kîringanîte na mûtûûrîre wake, na kûringana na ciîko ciake.”

¹¹ Mûndû ûrîa ûgîcaga na ûtonga na njîra îtagîrîrîte, ekariî ta gîconi kîrîa kîgumbagîra matumbî gîtaciarîte, gatagatî ga ûkûrû wake ûtonga ûcio nîûkaathira, na mûthiiarî akethîrwa arî kîrimû.

¹² Kûrî na gîtî Kîam ûthamaki kîrî na riiri, Kîamigirwe kîrî gîtûûgîru kuuma wa Kîammbîrîria, kûu nîkuo gwetû kûrîa kûtheru.

¹³ Ûi Ngai-Mûnene we nîwe mwîrîgîrîro wa Isiraeli, arîa onthe magûtiganagîria nîmagaconorithua; arîa mareganaga nawe marîîtwa mao mandîkîtwe mûtheturî, nîûndû nîmatiganîrîtie Ngai-Mûnene, na nîke îtherûkîro rîa manjî ma mwoyo.

Jeremia nîwavoire Ngai-Mûnene ûtethio

¹⁴ Ûi Ngai-Mûnene, mvonia nanie nîngûvona, mvonokia na nîngûvonoka, nîûndû we nîwe ngumagia.

¹⁵ Taroria, andû marambîra atîrî, “Mûgambo wa Ngai-Mûnene ûrî va? Tiga ûûke rîu!”

¹⁶ Ndiakûringîrîria ûmaretere thîna, kana ngerirîria mûthenya wa mûthiro, we Ngai-Mûnene nîwîcî; kîrîa Kîamumire kanyuarî gakwa nîûgicî.

¹⁷ Ndûgatûme ngîa na guoya, mbûkaga kwîthitha kûrî we vîndî ya mathîna.

¹⁸ Arîa manyariraga maroconorithua, nwatî ndûgatûme njonorithua, marogîa na guoya, nwatî ndûgatûme ngîa na guoya, ûrotûma makinyîrwe nî mavinda ma thîna, maretithîrie mûthiro ûmathirie viû.

Ûvoro wîgiî thavatû

¹⁹ Ngai-Mûnene nîwambîrire atîrî, “Jeremia thiî ûrûngame kîvingorî Kîam andû a Benjamini varîa athamaki a Juda matonyagîrîra na makaumîrîra, na ûthiî ivingorî cionthe cia îtûûra rîa Jerusalemu,

²⁰ na wîre athamaki onthe a Juda, andû onthe a Juda na andû onthe arîa matûûraga Jerusalemu, arîa matonyagîrîra ivingorî ûrîa Ngai-Mûnene arauga.

²¹ Meere Ngai-Mûnene arauga atî, mamenyerere mûtûûrîre wao na matigakuue mûrigo mûthenya wa thavatû, kana makuue kîndû magîtonyerie mîvîrîgarî ya îtûûra rîa Jerusalemu.

²² Na mûtigakuue mûrigo kuuma nyombarî cienyu mûthenya wa thavatû, kana mûrute wîra wanarî ûrîkû. Kûngûagîrani mûthenya ûcio na mûwamûrage, wata ûrîa nie Ngai-Mûnene naathire methe menyu.

²³ Kûnarî ûguo, methe menyu ma tene matianthikîrîria kana mambîgua. Vandû va ûguo, nîmaûmirie ciongo nîguo matikegue kana marûmîrîra kîrîra gîakwa.”

²⁴ Ngai-Mûnene arauga atîrî, “Mûngînthikîrîria na mûrege gûkuua kîndû mûthenya wa thavatû mûkîvîtûkîrie ivingorî cia îtûûra rîa Jerusalemu, nwatî mûririkanage mûthenya wa thavatû mûwamûrage na mûtikarute wîra mûthenya ûcio,

²⁵ athamaki na anene, arîa magekarîra gîtî Kîam ûnene Kîam ûthamaki Kîam Daudi, nîmagaatonya na mîvîrîga ya Jerusalemu mekarîrîte ikaari cia mbaara, na mbarathi na mathiî vamwe na andû a Juda, na atûûri a Jerusalemu, îtûûra rîîrî rîa Jerusalemu rîtûûrage andû tene na tene.

²⁶ Nao andû nîmakauma îtûûrarî rîa Juda na matûûra marîa mathiûrûrûkîrîtie Jerusalemu kuuma îtûûrarî rîa Benjamini, Shefela, kuuma vûrûri ûrîa ûrî irîma na kuuma Negebu, na nîmakaaruta matega ma kûvîvua, na magongoona, na matega ma irio cia mûgûnda na ûbani mûnungi waro, vamwe na matega ma gûcokia ngatho. Makarete indo ino cionthe hekarûrî ya Ngai-Mûnene.

²⁷ Nwatî mûngîrega kûmbathîkîra na mûririkanage mûthenya wa thavatû na mûwamûrage; mûrege gûkuua mûrigo mûvîtûkîrîre mûvîrîgarî wa Jerusalemu mûthenya wa thavatû, nîngakania mwaki ivingorî cia îtûûra, na nîûgacûkangia nyomba cia athamaki Jerusalemu na ndûkavorekia.”