Jeremia 16 - ÎVUKU RÎA ÛVORO MWARO

Wendi wa Ngai-Mûnene ûtûûrorî wa Jeremia

¹ Ngai-Mûnene nîwambarîrie akîmbîra atîrî,

² “Ndûkavikie mûndûmûka, kana ûgîe na ciana ûrî gûkû.

³ Nîûndû ûvoro wîgiî ciana irîa iciarîrîtwe vûrûrirî ûyû, vamwe na aciari ao:

⁴ nîmakaûragwa nî mîrimû mîcûku na gûtirî mûndû ûkamacakaîra kana amathika, mîîrî yao îgaatuîka ta irûndo cia mai gûkû nthî. Makaûragîrwa mbaararî na maûragwe nî yûra. Ciimba ciao ikaarîwa nî iconi na nyamû cia kîthaka.

⁵ “Nîûndû Ngai-Mûnene arauga atî: ndûgatonye nyomba ya andû arîa maracakaya, kana ûthiî macakayarî, kana ûmarîrîre. Nîûndû nînthengutîtie thayû, wendo wakwa ûtathiraga, na ntha ciakwa kûrî andû akwa.

⁶ Itonga na athîni onthe nîmakuîra vûrûrirî ûyû, matikathikwa na gûtirî mûndû ûkamacakaîra, kana etemanga, kana enje kîrîa nîguo onanie atî nîaramacakaîra.

⁷ Gûtirî mûndû ûkaarîcanîra kana anyunyanîra na mûndû wa wonthe ûkuîrîrîtwe, nîguo amûmîrîrie. Wana gûtirî mûndû wana ûrîkû ûkaaringwa nî ntha nîûndû wa mûndû ûrîa ûkuîrîrîtwe nî îthe kana ng'ina.

⁸ “Ndûkathiî mûciî kûrîa kûrî na kîrugo nîguo mûnyunyanîre na ene mûciî ûcio.”

⁹ Nîûndû nie, Ngai-Mûnene Ngai wa Isiraeli nîrauga atîrî: “Nîngathiria mîgambo ya andû arîa marakena na magacanjamûka, na nthirie mîgambo ya gîkeno Kîam mûviki na mûvikania. Maûndû mama monthe ngeka mûrî mwoyo na mûkîmonaga.

¹⁰ “Rîrîa ûkeera andû acio maûndû mama monthe, nî magakûûria atîrî, ‘Nîndûî gîtûmîte Ngai-Mûnene atûtuîra gûtûverithia na ûndû mûcûku ûguo? Nî ûndû ûrîkû mûcûku twîkîte? Nî mevia marîkû twîvîtie Ngai-Mûnene, Ngai wetû?’

¹¹ We nîûgacoka ûmeere atîrî, ‘Ngai-Mûnene arauga atî, nîûndû methe menyu nîmandiganîrîtie na makambîrîria kûgooca na gûtungatîra ngai ciîngî, nîmandiganîrîtie na matiathîkagîra mawatho makwa.

¹² Mue nîmwîkîte naaî wana gûkîra methe menyu. Muonthe mûrûmagîrîra merirîria macûku, na ngoro cienyu nî nyûmû na mûtimbathîkagîra.

¹³ Kwoguo nîngûmwîngata kuuma vûrûri ûyû nîmûvire ûrîa mue wana kana methe menyu matanamenya. Mûrî kûu nîmûgaatungatîra ngai ciîngî ûtuku na mûthenya, na ndikamwîguîra ntha.’ ”

Gûcoka kuuma îthamîriorî

¹⁴ Ngai-Mûnene arauga atîrî, “Îvinda nîrîgûkinya rîrîa andû matakevîta na rîîtwa rîakwa nie Ngai ûrîa ûtûûraga mwoyo, ûrîa warutire andû a Isiraeli vûrûrirî wa Misiri.

¹⁵ Nwatî, makevîta nanie ta Ngai-Mûnene mûtûûra mwoyo, ûrîa warutire andû a Isiraeli vûrûrirî ûrîa ûrî mwena wa rûgûrû, na kuuma mavûrûri marîa mengî kûrîa natûmire manyaganîrie. Nîngûmacokia vûrûrirî wao ûrîa naveere methe mao.”

Îvera rîrîa rîgûûka

¹⁶ Ngai-Mûnene arauga atîrî, “Nîngwîta ategi eengî mûno a nthamaki nîguo matege andû aya. Nîngûcoka mbîte aguîmi eengî mûno, nîguo mamacarie irîmarî cionthe na tûrîmarî na ngurungarî cia mathiga.

¹⁷ Nie nîmonaga maûndû monthe marîa mekaga; gûtirî ûndû mangînthitha. Nîmonaga mevia mao monthe.

¹⁸ Nîngatûma marîve thirî wa mevia mao maita maîrî, nîûndû nîmagwatîtie vûrûri wakwa mûgiro na ngai cia mîvuano irîa itarî mwoyo na magecûria vûrûri wakwa na maûndû marî magigi.”

Îvoya rîa Jeremia kûrî Ngai-Mûnene

¹⁹ We Ngai-Mûnene nîwe ûngitagîra na ûmvecaga vinya; nîwe ûndethagia vîndî ya mathîna. Mavûrûri kuuma mîena yonthe ya nthî nîmagaûka kûrî we makwîre atîrî, “Gûtirî kîndû methe metû maagaire tiga ngai cia maveeni, na indo îtarî vata kana umithio.

²⁰ Mûndû nwa avote kwîrûthîra ngai? Icio tî ngai cia ma!”

²¹ Kwoguo Ngai-Mûnene arauga atîrî, “Rîîrî nîrîo îvinda rîrîa rîagîrîru rîa gûtûma mamenye vinya na ûvoti wakwa na mamenye atî, nie nînie Ngai-Mûnene.”