Jeremia 14 - ÎVUKU RÎA ÛVORO MWARO

Gûtura mbura îvinda îraca

¹ Ngai-Mûnene nîwaririe na Jeremia ûvoro wîgiî gûtura mbura, akîrwa atîrî,

² “Juda nîîracakaya, matûûra ma Juda mamamîte nthî magîcakaya, andû akuo maracakaya maturîtie maru mao, andû a Jerusalemu nî mararîra makîenda ûtethio.

³ Anene ao nîmatûmaga ndungata ciao manjî, mathiîcaga irikorî cia manjî nwatî mationaga manjî, macokaga na mîtûngi îtarî na kîndû, makunîkaga mothiû mao nî gûconoka na kûrwa nî vinya.

⁴ Arîmi marî na kîeva na magakunîka ciongo ciao, nîûndû wa kwona ûrîa nthî yûmagarîte.

⁵ Wana nginya nthiia ya nga îrî kîthakarî nîîtiganagîria koori ka yo, nîûndû gûtirî na nyaki.

⁶ Nyûmbû irûngamaga tûthûrûmûndûrî tûtarî na nyaki, ikîvevaga ta mbwe igîcaria rîera, metho ma cio matirona nîûndû wa gûtura irio.”

⁷ Nao andû akwa marauga atî: “Wana ethîrwa mevia metû nîmaratûcuka, we Ngai-Mûnene tûtethie nîûndû wa kwenda gwaku, twanagûtiganîria mavinda meengî, nîtûkûvîtîrîtie.

⁸ We nîwe mwîvoko wa Isiraeli, nîwe ûmavonokagia rîrîa marî thînarî, nîndûî gîtûmîte wîkare ta mûgeni vûrûrirî wetû, ta mûvîtûki ûrîa ûraragîrîra ûtukû ûmwe?

⁹ Nîndûî gîtûmîte wîkare ta mûndû mwagagu, mûndû ûrî na vinya nwatî ndangîvonokia mûndû? Nwatî we Ngai-Mûnene ûrî gatagatî getû; twîtanîtue na rîîtwa rîaku ndûgatûtiganîrie.”

¹⁰ Îgûrû rîgiî andû aya Ngai-Mûnene arauga atîrî: “Mendaga gûtûûra maûrûraga, mativurûkaga, kwoguo Ngai-Mûnene ndametîkagîra, na rîu nîakûririkana waganu wao, na amaverithie nîûndû wa mevia mao.”

¹¹ Ngai-Mûnene nîwambîrire atîrî, “Ndûkanthaithe ndethie andû aya.

¹² Wana ethîrwa nîmarenyerekia, nie ndikegua mathaithana mao, na wana ethîrwa nîmarandutîra matega ma kûvîvua, na ma irio cia mûgûnda; ndikamamûkîra. Îthenya rîa ûguo, nîkwa ngamaûraga mathire na njîra ya mbaara, yûra na mîrimû.”

¹³ Nînacokire ngiuga atîrî, “Ûûi, Ngai-Mûnene, ta thikîrîria ûrîa arathi marameera, ‘Mûtikaagîa na mbaara, kana yûra, nwatî mûkethagîrwa mûrî na thayû mûrî vûrûrirî ûyû.’ ”

¹⁴ Nake Ngai-Mûnene nîwanjokerie atîrî, “Arathi maratûmîra rîîtwa rîakwa kwaria maveeni; nie ndianamatûma kana nîmatha, wana kana mbaria nao. Maramûrathîra cioneki cia maveeni, woni ûtarî na vata na maûndû marîa mecirîtie o ene.

¹⁵ Kwoguo, nie Ngai-Mûnene nîngûmwîra ûrîa ngwîka arathi aya. Nie ndiamatûma, nwatî methîrîtwe makîaria maûndû mambîgiî, makiugaga atî mbaara, na yûra itingîtharîkîra vûrûri ûyû: nîngaathiria arathi aya na njîra ya mbaara na yûra.

¹⁶ Nao andû arîa marathîra maûndû mama nîmakaûragwa na njîra wata îo. Ciimba ciao nîigaatewa njîrarî cia Jerusalemu, na gûtirî mûndû ûkaithika, aka ao, avîcî ao na erîtu ao, nîngaamaverithia nîûndû wa waganu wao.

¹⁷ Nî ûkaamera ciugo ino: ‘Tiga metho makwa metûrûre methori ûtukû na mûthenya, matagûtigithîria, nîûndû andû akwa nîagurarie na magativua mûno.

¹⁸ Nîngiumagara nthiî mûgûndarî, monaga ciimba cia andû arîa maûragîrîtwe mbaararî, nathiî matûûrarî monaga andû magîkua nî yûra! Nîûndû arathi na athînjîri-Ngai methîrîtwe makîruta wîra wao vûrûrirî, matarî na ûmenyo.’ ”

Andû nîmaathaithire Ngai-Mûnene

¹⁹ Ngai-Mûnene nîkwa ûtiganîrîtie Juda viû? Nîkwa ngoro yaku îthûrîte andû a Zayuni? Nîndûî gîtûmîte ûtûgurarie naaî ûguo, ûndû tûtangîvona? Twacaragia thayû nwatî gûtirî ûndû mwaro twonire, twerîgîrîrîte nîtûkûvona nwatî twonire mathîna.

²⁰ Nîtwîtîkîrîte waganu wetû we Ngai-Mûnene, wana mevia ma methe metû, nîûndû we nîwe twîvîtie.

²¹ Nîûndû wa rîîtwa rîaku ndûgatûtiganîrie, ndûkananyararithie gîtî gîaku Kîam ûthamaki, ririkana kîrîkanîro gîaku na andû a Isiraeli.

²² Kûrî ngai cia mîvuanano mavûrûri ingiurithia mbura? Kana îgûrû rîo rîene riurithie mbura, kinthî tîwe Ngai-Mûnene Ngai wetû? Twigîte mwîvoko wetû kûrî we, nîûndû nîwe wîkaga maûndû mama monthe.