Jeremia 13 - ÎVUKU RÎA ÛVORO MWARO

Thuruvarî ya gîtambaa kîa goro

¹ Ngai-Mûnene nîwambîrire atîrî, “Thiî ûgûre thuruvarî ya gîtambaa Kîam goro na wîkîre, nwatî ndûkamîrinde manjîrî.”

² Kwoguo nînagûrire thuruvarî, wata ûrîa Ngai-Mûnene ambîrire na ngîmîkîra.

³ Nake Ngai-Mûnene nîwambarîrie rîngî atîrî,

⁴ “Oca thuruvarî îo wîkîrîte na ûthiî rûnjîrî rwa Farati na ûmîthithe vau mwatûkarî wa îthiga.”

⁵ Kwoguo nînathiîre na ngîmîthitha rîteere rwa rûnjî rwa Farati wata ûrîa Ngai-Mûnene ambathîte.

⁶ Vuva wa mîthenya mîîngî, Ngai-Mûnene nîwambîrire atîrî, “Ûkîra na ûthiî rûnjîrî rwa Farati ûgoce thuruvarî îrîa nakwathire ûkathithe vo.”

⁷ Kwoguo nînathiîre rûnjîrî rwa Farati, ngîmîcaria na ngîmîona îrî wa varîa namîthithîte. Nayo thuruvarî îo yarî ndembûkangu na ndîngîatûmîrirwe rîngî.

⁸ Ngai-Mûnene nîwacokire akîmbîra rîngî atîrî,

⁹ “Ûguo nîguo ngathiria mwîtîîo wa andû a Juda na mwîtîîo mûnene wa Jerusalemu.

¹⁰ Andû aya aganu nîmaregete kûmbathîkîra. Nî aremi na nî aûmû ngoro. Matungatagîra na makagooca ngai ng'eni. Kwoguo matuîkîte ta thuruvarî îno ndembûkangu na îtangîtûmîrwa, nî ya mana.

¹¹ Wata ûrîa thuruvarî îganagîra mûndû kîûnûrî, nîguo nendete andû onthe a Juda na Isiraeli megucage meganîrîte menyitithanîtie nanie. Nekire ûguo nîguo matuîke andû akwa, matûmage rîîtwa rîakwa rîkumue na rîvewe riiri, nwatî nîmaaregire kûnthikîrîria, nie Ngai-Mûnene.”

Nyûngû ya ndivei

¹² Ngai-Mûnene, Ngai wa Isiraeli nîwambîrire atîrî, “Jeremia, îra andû a Isiraeli atî nyûngû cionthe nîigeecûrua na ndivei. Nao nîmagacokia atî, ‘Kinthî tûtiîcî atî nwa nginya inya cionthe ciîcûrue na ndivei?’

¹³ Nîûgacoka ûmeere atî, Ngai-Mûnene arauga nîagaatûma andû a vûrûri ûyû marîwe nî ndivei, athamaki onthe arîa maatuîkire athani vandûrî va Daudi, athînjîri-Ngai, arathi na atûûri onthe a Jerusalemu.

¹⁴ Nîngamaringithania mûndû na mûndû ûrîa wîngî, methe nîaringithanie na avîcî ao. Ndikamakirîrîria, ndikamarekia, ndikameguîra ntha, nwatî nîngamacûkangia.”

Jeremia nîwakanirie andû a Isiraeli gwîtîîa

¹⁵ Mue andû a Isiraeli tegani matû mwîgue, mûtigetîîe ûguo nîguo Ngai-Mûnene augîte.

¹⁶ Kumiani Ngai-Mûnene Ngai wenyu mbere ya areta nduma, na mbere ya mûvîngwa nî nduma îrîa îrî irîmarî. Mûkerirîria kwona ûtheri, nwatî agaatûma ûtuîke nduma nene.

¹⁷ Nwatî ethîrwa tîmûnthikîrîria, nîngûrîra nîîthithîte nîûndû wa mwîtîîo wenyu; nîndîra na ûrûrû mwîngî ngîtûrûraga methori nîûndû andû a Ngai-Mûnene nîatave.

¹⁸ Ngai-Mûnene nîwambîrire atîrî, “Îra mûthamaki na ng'ina maume itîîrî cia ûthamaki, nîûndû nthûmbî ciao irîa nthaka, nînyumu ciongorî ciao.

¹⁹ Matûûra monthe ma Negebu nîmarigicîrie, gûtirî mûndû ûngîtonya kuo. Andû onthe a Juda nîatave makavirwa îthamîriorî.”

²⁰ Jerusalemu taroria wone andû arîa maumîte mwena wa rûgûrû, irîkû ndîthia îrîa waveerwe ûrîthagie, ndîthia îrîa wetîaga nayo îrî kû?

²¹ Ûkaauga atîa îgûrû rîgiî andû arîa weciragia nî arata aku, arîa we mwene wathomithirie rîrîa magaakûvoota na makwathe? Kinthî ndûgecûrwa nî ûrûrû ta wa mûndûmûka akîgîa na mwana?

²² Na ûngîyûria na ngoro atîrî, “Maûndû mama marekîka nîkî, kûrî nie?” Nîûndû wa ûrîa mevia maku mengîvîte, nîkîo gîtûmîte ûkûnjûa nguo, na ûkamenyanwa nawe kîîmwîrî na vinya.

²³ Mûndû nwa agarûre rangi wa ngoothi yake, kana ngarî îcenjie maroro mayo? Ethîrwa nwa magarûre, wana mue mûmenyerete gwîka naaî, nwa mwîke maûndû marîa magîrîrîte.

²⁴ Ngaamûnyagania ta macaki, magûrûkîtue nî rûkûngi kuuma werûrî.

²⁵ Ngai-Mûnene arauga atîrî, “Maûndû mama nîmo nîmûgaîrîte, nîûndû nîmwariganîrwe nînie, na mûgîtîkia ngai cia maveeni.

²⁶ Nie nîngûkûnja nguo nginya kîongo, na njaga yaku nîîkonekana.

²⁷ Nîmonete ûgîka maûndû marîa menete, ûtharia na gûcumîkîra aka ene na ûmaraa mwîngî, kûu tûrîmarî na mîgûndarî. Mue andû a Jerusalemu kaî mwî na thîna-î! Nîmwîkara mûtatheretue nginya rî?”