Jeremia 11 - ÎVUKU RÎA ÛVORO MWARO

Jeremia na Kîrîkanîro

¹ Ngai-Mûnene nîwerire Jeremia atîrî,

² “Thikîrîria maûndû marîa marî kîrîkanîrorî gîkî, ûcoke ûmamenyithie andû a Juda na atûûri a Jerusalemu.

³ Nîûkaamera Ngai-Mûnene, Ngai wa Isiraeli augîte atî kûgwatwa nî kîrumi nî mûndû ûrîa ûtavingagia maûndû marîa marî kîrîkanîrorî gîkî,

⁴ kîrîa narûthire na methe menyu vîndî îrîa namarutire Misiri vûrûri ûrîa wekariî ta mwaki mûnene ûkîrîrîmbûka. Nînamerire mathikîrîrie mûgambo wakwa, na mekage ûrîa wonthe ngûmatha nîguo matuîke andû akwa nanie nduîke Ngai wao.

⁵ Nanie nîngavingia maûndû marîa neranîre kûrî methe menyu na mwîvîtwa, atî nîngaamava vûrûri ûrî na îriia na ûûkî, (ûrîa marî naguo rîu).” Nînacokire ngiuga atîrî, “Ngai-Mûnene, kûrotuîka guo.”

⁶ Ngai-Mûnene nîwambîrire atîrî, “Anîrîra maûndû mama monthe matûûrarî ma Juda na tûcîrarî twa Jerusalemu. Îra andû a kuo megue maûndû marîa marî kîrîkanîrorî na mamavingie.

⁷ Nîûndû rîrîa narutire methe mao Misiri, nînamerire na kinyi mambathîkîre na nginya ûmûnthî nînîmeraga mambathîkîre.

⁸ Nwatî matiambathîkîra kana manthikîrîria, vandû va ûguo onthe nîmaathiîre na mbere kûmia ngoro na gwîka maûndû macûku. Nînamaathîte marûmîrîre kîrîkanîro gîakwa makîrega, kwoguo nînamaverithirie kûringana na maûndû marîa mandîkîtwe kîrîkanîrorî kîu.”

⁹ Nake Ngai-Mûnene nîwacokire akîmbîra rîngî atîrî, “Andû a Juda na Jerusalemu nîmaravanga kûregana nanie.

¹⁰ Nîmacokererete mevia marîa meekagwa nî methe mao, arîa maregire kûmbathîkîra; na nîmagoocete ngai ciîngî. Andû a Isiraeli na Juda nîmaunîte kîrîkanîro kîrîa narûthire na methe mao.

¹¹ Kwoguo Ngai-Mûnene arauga atî, nîngûmaretera maûndû macûku na gûtirî mûndû ûkamaûrîra; wana mangaîra, ndikamathikîrîria.

¹² Nao andû a Juda na a Jerusalemu nîmakaathiî makaîre ngai irîa marutagîra magongoona nîguo imatethie, nwatî itikamatethia rîrîa makethîrwa marî mathînarî.

¹³ Nîûndû mue andû a Juda ngai cienyu ciîngîvîte wata matûûra menyu, nacio metha cia kûrutîra ngai ya Baali magoongona irîa mûtumîte ciîngîvîte ta tûcîra twa Jerusalemu.

¹⁴ Kwoguo, we Jeremia, ndûkangaîre kana ûmvoya nîûndû wa andû aya, nîûndû nie ndikaamathikîrîria mavinda marîa makethîrwa marî thînarî.”

¹⁵ Endwa akwa arîa mendete nîmagîrîrwe nî kwîthîrwa marî nyombarî yakwa wa magîkaga waganu? Mîvîtwa na matega menyu ma kûvîvua, nwa magirie mûkinyîrwa nî mûthiro? Kwoguo vi maûndû mau nwa matûme mûkene?

¹⁶ Vîndî îmwe Ngai-Mûnene aamwîtire; mûtamaiyû mûruru, na ûrî na matunda maro. Nwatî rîu, na mûrurumo ta wa ngûa, nîakûûgwatia mwaki, nacio mvûa ciaguo ivîe cionthe.

¹⁷ Ngai-Mûnene mwene vinya wonthe, ûrîa wamûvandire arauga nîakûmûthiria na mûthiro nîûndû wa waganu ûrîa wîkîtwe nî andû a Isiraeli na a Juda. Nîmandakarîtie nîûndû wa kûrutîra Baali magongoona.

Andû nîmaavangire kûûraga Jeremia

¹⁸ Ngai-Mûnene nîwamenyithirie nanie ngîmenya; Ngai-Mûnene nîwamenyithirie mîvango yao mîcûku.

¹⁹ Nwatî nie nekariî ta ng'ondu mvoreri îvirîtwe kîthînjîrorî, ndiamenya atî marûthîte mîvango îo mîcûku îgûrû rîakwa, maaugaga atîrî, “Tigani tûcûkangie mûtî vamwe na maciaro ma guo, tigani tûmûrage nîguo ariganîre viû.”

²⁰ Nwatî we Ngai-Mûnene mwene vinya wonthe, ûrîa ûtucanagîra na kîvooto, we ûthimaga ngoro na meciria ma andû, tiga mone ûkîndîvîrîria kûrî andû aya, nîûndû nîwe tu ûngîtua cira wakwa.

²¹ Kwoguo, ûvoro wîgiî andû a Anathothi arîa marenda kûmbûraga Ngai-Mûnene arauga atîrî, “Ndûkarathe ûvoro ûkîgwetaga rîîtwa rîa Ngai-Mûnene, na weka guo nîtûgûkûraga.”

²² Kwoguo Ngai-Mûnene mwene vinya wonthe arauga atîrî, “Nîngûmaverithia. Andû ethî nîmakaûragîrwa mbaararî. Anake na erîtu ao nîmagaakua nî yûra.

²³ Nîmvangîte îvinda rîa kûrete mûthiro kûrî andû a Anathothi. Îvinda rîu rîakinya, gûtirî mûndû ûgatigara arî mwoyo.”