Jeremia 10 - ÎVUKU RÎA ÛVORO MWARO

Kûgooca mîvuanano na kûgooca Ngai wa ma

¹ Mue andû a Isiraeli, tathikîrîriani mwîgue ûrîa Ngai-Mûnene arauga.

² Ngai-Mûnene arauga atîrî, “Mûtikarûmîrîre mîthiîre ya mavûrûri marîa mengî, na mûtikamakue nî marûûri ma îgûrû, nîûndû mavûrûri marîa mengî nîmaramakua nîmo.

³ Mîtugo ya ndini ya andû acio nî ya maveeni. Mûtî nîûtemagwa mûtitûrî, na ûkaumua mûvuano wa ngai na kathanwa nî mûndû.

⁴ Andû nîmaûgemagia na sîlûva na thaavu; nîmavûthagîra nyondo na mîcumarî kûûnyitithania, nîguo ndûkainaine.

⁵ Mîvuanano yao îkariî ta inyamû cia kûvavûra iconi irî mûgûndarî wa marenge, ndîngîvota kwaria, nîkwa îkuagwa nîûndû ndîngîvota kûthiî. Ndûkamîtigîre nîûndû ndîngîka ûndû mûcûku, wana kana îka ûndû mwaro.”

⁶ We Ngai-Mûnene gûtirî wîngî wîkariî tawe, we wî mûnene na rîîtwa rîaku rîrî vinya mwîngî.

⁷ Nû ûtangîgwîtigîra we mûthamaki wa mavûrûri? We nîwagîrîrwe nî gûtîewa, nîûndû gatagatîrî ka andû arîa aûgî onthe a mavûrûri, na gatagatî ka athamaki ao onthe, gûtirî wîkariî tawe.

⁸ Onthe nî irimû na nîaritu; kîrîra Kîam mîvuanano nî Kîam mana!

⁹ Mîvuanano yao îgemetue na sîlûva kuuma Tarishishi, na thaavu kuuma Ofiri, îrûthîtwe nî andû marî na wara, wa kûrûtha indo na mbaû na aturi a thaavu, îcokete îgekîrwa itambaa cia rangi wa vururu na wa njambarawe, îtumîtwe nî andû marî na wara.

¹⁰ Nwatî Ngai-Mûnene nîke Ngai wa ma, nî Ngai ûrîa ûtûûraga mwoyo na nî mûthamaki wa tene na tene. Angîrakara nthî nîîthingithaga, na ndûrîrî itingîûmîrîria marakara make.

¹¹ Kwoguo nîmûkaamera atî: “ngai irîa itaûmba nthî na îgûrû nîikaathira cionthe gûkû nthî.”

Rwîmbo rwa gûkumia Ngai

¹² Ngai-Mûnene nîke waûmbire nthî na vinya wake, nîke wathondekire nthî na ûûgî wake, na agîtambûrûkia îgûrû na njîra ya ûmenyo wake.

¹³ Vîndî îrîa aruta mûgambo manjî marîa marî îgûrû nîmarurumaga, na nîke ûtûmaga matu mambate kuuma mîthiia ya nthî. Atûmaga rûveni rûvenie rîrîa kûraura, na agatûma rûkûngi rûke rumîte kûrîa rwîkaraga.

¹⁴ Mûndû nî kîrimû na ndarî ûmenyo; arîa onthe marûthaga mîvuanano ya thaavu nîmaconorithagua nîyo; nîûndû mîvuanano îo nî ya maveeni na ndîrî mwoyo.

¹⁵ Ngai icio nî cia mana na nî cia kînyarari; vîndî îrîa ikaverithua nî ikathirua.

¹⁶ Ngai wa Jakovu ndavana ta cio, nîûndû nîke waûmbire indo cionthe, na nîathuurîte Isiraeli matuîke andû ake, Ngai-Mûnene mwene vinya wonthe nîrîo rîîtwa rîake.

Andû a Jerusalemu nîmakaathamua

¹⁷ Mue andû a Jerusalemu cokanîrîriani indo cienyu, mûrî arigicîrie.

¹⁸ Nîûndû Ngai-Mûnene arauga atîrî, “Taroria, nîngûmwikia nja ya vûrûri ûyû, nîngamaretithîria mathîna meengî mûno.”

¹⁹ Kaî tue andû a Jerusalemu tûrî ativie-î! Ngurara yetû nî nene mûno! Nwatî nînaugire atîrî, “Nama îno nî mînyamaaro, na nwanginya nyûmîrîrie.”

²⁰ Îgema rîakwa nîrîomomore, mîkanda yarîo yonthe nîmîtuîkangu, ciana ciakwa nîindiganîrîtie, na gûtirî wanarî ûmwe mûtigaru wa kûnyambîra îgema rîngî, kana wa kûnjurîria itambaa.

²¹ Nîûndû arîthi nî irimû, na mativoyaga Ngai-Mûnene kîrîra, kwoguo methîrîtwe matakûthiî na mbere, na ng'ondu ciao cionthe ikanyagania.

²² Tathikîrîriani! Kûrî na ndûmîrîri yatûkinyîra! Kûrî na înegene înene kuuma mwena wa rûgûrû, vûrûri wa mwena wa rûgûrû nî ûkîte; gûtûma matûûra ma Juda matuîke werû, kûrîa nyamû cia kîthaka ikamamaga.

²³ Ngai-Mûnene nîmbicî atî mûndû ndarî ûvoti îgûrû rîa mûtûûrîre wake, gûtirî mûndû ûngîvota gûtongoria mûtûûrîre wake.

²⁴ We Ngai-Mûnene, nûnga na njîra îrîa îmbagîrîrîte, ndûkamverithie ûrî na marakara nîûndû navota kûthira.

²⁵ Îtûrûra marakara maku kûrî mavûrûri marîa matakûgoocaga, na kûrî andû arîa matagoocaga rîîtwa rîaku. Nîûndû nîmaûragîte andû aku a Isiraeli, nîmamacûkangîtie makathira viû, na magatiga vûrûri wao ûrî maganjo.