Jakuvu 5 - ÎVUKU RÎA ÛVORO MWARO

Itonga nîikaanîtue

¹ Na rîu mue itonga tanthikîrîriani. Rîrani na mwîgue kîeva nîûndû wa mathîna marîa maûkîte kûrî mue!

² Ûtonga wenyu nîmworu, na nguo cienyu nacio nî ndîe nî igunyû.

³ Thaavu cienyu na sîlûva cienyu nî ndotu, naguo ûrotu ûyû ûkethîrwa ûrî ûira wa kûregana namue na ûrîe mîîrî yenyu îthire takwa îvîvîtue na mwaki. Mwîigîrîte ûtonga mîthenyarî îno ya mûthiia.

⁴ Mûtirîvîte mîcara wana îrîkû kûrî arîa maarutire wîra mîgûndarî yenyu. Tathikîrîriani mateta mao! Kîrîro Kîam arîa mamûkethagîra irio nî gîkinyîte matûûrî ma Ngai, Mwathani Mwene vinya wonthe.

⁵ Mûtûûrîre wenyu gûkû nthî wîthîrîtwe wîcûrîtwe nî mîago na ikeno. Mwînoretie ta ndegwa yetererete mûthenya wa kûthînjwa.

⁶ Mue nîmûtuîrîrîte na mûkaûraga andû arîa athingu na matireganaga namue.

Gûkirîrîria na Kûvoya

⁷ Kwoguo ariû na aarî a îthe wetû, kiragîrîriani nginya rîrîa Mwathani agaacoka. Taroriani ûrîa mûrîmi akiragîrîria etererete mûgûnda wake ûgîe na maciaro ma vata. Ke nîakiragîrîria maurîrwe nî mbura ya mbere na ya mûthiia.

⁸ Wa namue nwa nginya mûkiragîrîrie. Îthagîrwani mûrî na kîîrîgîrîro nîûndû Mwathani arî vakuvî gûka.

⁹ Ariû na aarî a îthe wetû, tigagani gwîkara mûgîtetanagia nîguo mûtigatuîrwe. Taroriani mûtucanîri arûngamîte mûrangorî.

¹⁰ Ariû na aarî a îthe wetû, taririkanani arathi arîa maaririe na rîîtwa rîa Mwathani. Moceni ta kîonereria gîa gûkirîrîria na kûmîrîria mathîna.

¹¹ Tue tûmetaga arathime nîûndû nîmaaûmîrîrie. Nîmwîguîte ûvoro wîgiî ûkirîrîria wa Ayubu, na nîmwîcî ûrîa Mwathani aamûtanavîre mûthiiarî. Nîûndû Mwathani nîecûrîtwe nî ûtugi na ntha.

¹² Ariû na aarî a îthe wetû, îgûrû rîa maûndû monthe, mûtikanyue muma vîndî îrîa mûreranîra. Mûtikavûthîre rîîtwa rîa îgûrû, nthî kana kîndû kîngî wa kîonthe nîguo mwonanie ûrîa mûrauga. Vîndî îrîa mûrenda kuga îî, ugagani tu “Îî” na rîrîa mûrenda kuga naarî, ugagani “Naarî,” nîguo mûtigatuîrwe.

¹³ Nîkûrî mûndû wana ûmwe gatagatîrî kenyu wî na mathîna? Nîwagîrîrwe nî kûvoya. Nîkûrî na mûndû wana ûmwe gatagatîrî kenyu wî na gîkeno? Nîwagîrîrwe kwina nyîmbo cia ûkumio.

¹⁴ Nî kûrî mûndû wana ûmwe gatagatîrî kenyu mûrûaru? Nîwagîrîrwe nîgwîta athuuri a kanitha. Nao nîmagîrîrwe nî kûmûvoera na kûmûvaka maguta na rîîtwa rîa Mwathani.

¹⁵ Namo mavoya mau mangîvowa na wîtîkio nîmakûvonia mûndû ûcio ûrwarîte na Mwathani acokerie mûndû ûcio ûgima wake wa mwîrî. Na ethîrwa mûndû ûcio nîwîtîkîtie nîakwoverwa mevia make.

¹⁶ Kwoguo umbûranagîrani mevia menyu na mûvoyanagîre nîguo mue mûvonue. Mavoya ma mûndû mûthingu nîmethagîrwa na ûvoti mûnene.

¹⁷ Elija aarî mûndû wa tatue. Nîwavoire arî na kîîo atî gûtikaure na gûtiaura mbura gûkû nthî kwa îvinda rîa mîaka îthatû na nuthu.

¹⁸ Elija nîwacokire akîvoya rîngî na mbura îkiura kuuma îgûrû, na nthî îkîgîa na maketha.

¹⁹ Ariû na aarî a îthe wetû, ethîrwa gatagatîrî kenyu nîkûrî mûndû wana ûmwe ûûrîte akauma ûvororî wa ma nake mûndû wîngî akamûcokia,

²⁰ ririkanani atîrî, mûndû wa wonthe ûgarûraga mwîvia akamûruta njîrarî îrîa njûku nîakaavonokia mwoyo wa mwîvia ûcio kuuma kûrî gîkuû na nîagaatûma mevia meengî movanîrwe.