Jakuvu 3 - ÎVUKU RÎA ÛVORO MWARO

Rûrîmî

¹ Ariû na aarî a îthe, tî eengî gatagatîrî kenyu magîrîrwe nîgûtuîka arimû, nîûndû nîmwîcî atî arîa tûthomithagia nîtûgaatuîrwa na vinya makîria ya arîa engî.

² Mavinda meengî tuonthe nîtûvîtagia. Nwatî mûndû ûrîa ûtavîtagia akîaria, nîmûkinyanîru na nîavotaga kûmenyerera mwîrî wake wonthe.

³ Nîtwîkagîra gîcuma kîrî na mûkanda kanyuarî ka mbarathi nîguo tûtûme îtwathîkîre, na nîtûvotaga kûmîatha îthiî kûrîa tûkwenda.

⁴ Îcirieni ûvoro wa meri: înarî nene ûguo na îtwarithagua nî rûvuvo rûrî na vinya ûguo, nî îvotaga kûgatwa nî kîgati kînini na îkathiî wa kûrîa kuonthe mûtwarithia wayo endaga îthiî.

⁵ Ûguo nwa ta guo rûrîmî rwîkariî. Nî gacunjî kanini ka mwîrî, nwatî nîgetîîaga na maûndû manene. Ta îcirieni ûrîa mûtitû mûnene ûngîvîvua nî karûrîrîmbî kanini!

⁶ Rûrîmî nwa rûtuîke ta mwaki. Nî vûrûri mûgima wa maûndû macûku gatagatîrî ga ciîga cia mîîrî yetû. Rûrîmî nîrûtambagia ûcûku wa ruo mwîrîrî wonthe. Nîrûvîvagia mûtûûrîre wetû wonthe na mwaki ûrîa ûkaga kûrî ruo kuuma îcua.

⁷ Andû nwa mavote kûmenyeria mîthemba yonthe ya nyamû cia kîthaka, iconi, nyamû cia kîruka kîrîa gîtambaga na nthamaki na nîmavotete kûimenyeria.

⁸ Nwatî gûtirî wana ûmwe wanavota kûmenyeria rûrîmî. Rûrîmî nî rûcûku mûno na rûtivoragîra na nîrwîcûrîtwe nî ûrogi ûrîa ûretaga gîkuû.

⁹ Nîtûrûvûthagîra tûgîcokia ngatho kûrî Mwathani na Vava wetû, na tûkarûvûthîra tûkîruma andû arîa engî maûmbîtwe na mûvianîre wa Ngai.

¹⁰ Ciugo cia gûcokia ngatho na cia kûrumana ciumaga kanyuarî wa kau. Ariû na aarî a îthe wetû, ûndû ûyû ndwagîrîrwe nî gwîkîka.

¹¹ Anga manjî maro na macûku nwa matherûke kîthimarî kîmwe?

¹² Ariû na aarî a îthe wetû, nwa kûvoteke mûkûyû ûciare ndamaiyû kana mûthavibu ûciare ngûyû? Naarî! Wana kîthima gîcûrîte manjî ma cumbî gîtingîtherûka manjî maro.

Ûûgî kuuma îgûrû

¹³ Nîkûrî na andû gatagatîrî kenyu marî na ûûgî na ûtaûku? Nîmwagîrîrwe nîkûwonania na njîra ya mîtûûrîre yenyu mîaro na njîra ya ciîko cienyu mbaro ciîkîtwe na wînyivia na ûûgî.

¹⁴ Nwatî ethîrwa ngororî cienyu mûrî na wîru, ûrûrû na wîyendi, mûtigetîîe na ûûgî wenyu, nîûndû mweka ûguo nî mûreganîte na ûma.

¹⁵ Ûûgî ta ûyû tî ta ûrîa ûnyûrûrûkaga kuuma îgûrû, nwatî nî wa gûkû nthî na ndumanîte na Roho wa Ngai, umanîtie na ndaimono.

¹⁶ Varîa varî wîru na wîyendi, vethagîrwa varî na mbûkanîrîro na maûndû macûku ma mîthemba yonthe.

¹⁷ Nwatî mbere ya maûndû monthe, ûûgî ûrîa uumaga îgûrû nî mûtheru, nî wa thayû, ûvoreri na wendani. Ûûgî ûcio wîcûrîtwe nî ntha na nîûciaraga maciaro ma ciîko mbaro, ndûrî kîmenyano na ndûrî ûvinga.

¹⁸ Ûthingu nî maciaro ma mbegû ya thayû îrîa îvandagwa nî andû arîa macaragia thayû.