Jakuvu 2 - ÎVUKU RÎA ÛVORO MWARO

Gûkaanua ûvoro wîgiî kîmenyano

¹ Ariû na aarî a îthe wetû, ta etîkia a Mwathani Jesû Kristû ûrîa ûrî riiri, mûtikanecirie atî andû amwe marî vata gûkîra arîa engî.

² Î narîo mûndû mûtongu wîkîrîte nguo cia goro na mbete ya thaavu angîûka mûcemaniorî wenyu na mûndû mûthîni wa nake atonye kuo ekîrîte nguo irî na gîko ndembûkangu!

³ Mûngîva mûndû ûcio wîkîrîte nguo cia goro gîtîîo Kîam mwanya na mûmwîre atîrî, “Îkara ava gîtîrî gîkî Kîamro,” na wîre mûndû ûcio mûthîni atîrî, “Rûngama vaarîa,” kana, “Îkara nthî ava magûrûrî makwa.”

⁴ Mue mûrî na mavîtia ma kwonania kîmenyano gatagatîrî kenyu na ma gûtucanîra cira mûrî na meciria macûku.

⁵ Tathikîrîriani arata akwa ende! Ngai aathuurire andû arîa athîni gûkû nthî nîguo matuîke itonga cia wîtîkio na magae ûthamaki ûrîa Ngai erîîre arîa mamwendete.

⁶ Nwatî mûtitîîaga arîa athîni. Na kinthî itonga tîcio imûkinyagîrîria? Na kinthî twacio imûviraga îgootirî?

⁷ Itonga icio nwacio ciaragia ûvoro mûcûku wîgiî rîîtwa rîaro rîrîa mwîtanîtue narîo.

⁸ Watho wa Ûthamaki ûrîa wonekaga mandîkorî matheru nî ûyû: “Enda mûndû ûrîa mûriganîtie nake wata ûrîa wîyendete we mwene.” Ethîrwa ûkaathîkagîra watho ûyû, we ûgekaga ûrîa kwagîrîrîte.

⁹ Nwatî ethîrwa nîmwonanagia kîmenyano nîmwîvagia na watho nî ûmûtuîrîrîte mûrî evia.

¹⁰ Mûndû ûrîa unîte rîathani rîmwe, nîatucagîrwa atî ke nî unîte maathani monthe.

¹¹ Nîûndû ûrîa waugire “Ndûkanatharanie” nwake waugire “Ndûkanaûragane.” Kwoguo ethîrwa ndûtharanîtie na nî ûraganîte nî unîte watho.

¹² Kwoguo aragiani na mwîkage maûndû ta andû magaatuîrwa na njîra ya watho ûrîa ûrekagîrîria andû.

¹³ Nîûndû Ngai ndakeegua ntha agîcirithia andû arîa mategucanagîra ntha, nwatî mûndû ûrîa wîgucanagîra ntha ndageetigîra îtuîro.

Wîtîkio na ciîko

¹⁴ Ariû na aarî a îthe wetû, kûrî na vata ûrîkû wa andû kuga atî marî na wîtîkio ethîrwa ciîko ciao itironania? Wîtîkio ûcio nwa ûmavonokie?

¹⁵ Î narîo kethîrwa kûrî na ariû na aarî a îthe wetû mavatarîte nguo na matirî na irio cia kwîgana.

¹⁶ Kûrî na vata ûrîkû wa kûmeera atîrî, “Thiîni na thayû, mwote mwaki na mûrîe mûvae” ethîrwa mûtiramava kîrîa mavatarîte ûtûûrorî wao?

¹⁷ Kwoguo wîtîkio ûrî wuonga ûtarî na ciîko nî mûkuû.

¹⁸ Nwatî mûndû ûmwe nwa auge atîrî, “We ûrî na wîtîkio, nwatî nie nîrî na ciîko.” Nie nwa nîmûcokerie atîrî, “Monia ûrîa mûndû angîvota kwîthîrwa arî na wîtîkio vatarî na ciîko, nanie nîngûkwonia wîtîkio wakwa na njîra ya ciîko irîa mbîkaga.”

¹⁹ Nîwîtîkîtie atî kûrî Ngai ûmwe tu. Ûguo nî waro! Ndaimono wana cio nîciîtîkîtie guo na nîcinainaga irî na guoya.

²⁰ We kîrimû! Nîûrenda kwonua atî wîtîkio ûtarî na ciîko nî ûyû mûthatu?

²¹ Iburahimu îthe wetû wa tene, nîwatwirwe mûthingu nîûndû wa ûrîa eekire vîndî îrîa aarutire mûriû wake Isaka metharî ya kûrutîra kîgongoona.

²² Nîkwa mûtarona atî wîtîkio wake nîwarutithanirie wîra na ciîko ciake? Wîtîkio wake nîwatwirwe mûkinyanîru na njîra ya ciîko ciake.

²³ Namo mandîko matheru nîmaavingirue marîa maugîte atîrî, “Iburahimu nîwetîkirie Ngai, na nîûndû wa wîtîkio wake, Ngai nîwamûtwire mûthingu.” Kwoguo Iburahimu nîwetirwe mûrata wa Ngai.

²⁴ Kwoguo mue rîu nîmûrona atî andû matucagwa athingu na njîra ya ciîko ciao, nwatî tî na njîra ya wîtîkio wao mûtheri.

²⁵ Ûguo nwa guo wana Rahavu ûrîa warî mûmaraa atwirwe mûthingu na njîra ya ciîko ciake. Ke nîwanyitire athigani Isiraeli ûgeni na nîwamatethirie maûre mathiî na njîra îngî.

²⁶ Kwoguo, wata ûrîa mwîrî ûtarî na mîvevû wîthagîrwa ûrî mûkuû, nwa ta guo wîtîkio ûtarî na ciîko wîthagîrwa ûrî mûkuû.