Jakuvu 1 - ÎVUKU RÎA ÛVORO MWARO

¹ Nie Jakuvu ndungata ya Ngai na ya Mwathani Jesû Kristû: Nînamûkethia mue muonthe andû a Ngai arîa mûnyagarûkîte nthî yonthe.

Wîtîkio na Ûûgî

² Ariû na aarî a îthe wetû, rîrîa mwagîa na magerio ma mîthemba na mîthemba, nîmwagîrîrwe nî gwîcûragwa nî gîkeno,

³ nîûndû nîmwicî atî wîtîkio wenyu ûngîvoota magerio ta mama mûkaavotaga kûmîrîria.

⁴ Tigani kûmîrîria kwenyu kûmûtongoragie maûndûrî monthe mûtakûgwa, nîguo mwîthagîrwe mûrî akinyanîru na mûrî agima na mûtarî na kîndû mûturîte.

⁵ Nwatî ethîrwa nîkûrî na mûndû wana ûmwe wa cienyu ûtarî na ûûgî, nîwagîrîrwe nîgwîtia Ngai ûrîa ûvecaga andû onthe arî na ûtaana na ûtugi.

⁶ Nwatî nwanginya etie arî na wîtîkio na atarî na nganja. Mûndû wa wonthe ûgîcaga na nganja ekariî ta ndivû cia manjî ma îria irîa cikanagua na ivurutanagua nî rûkûngi.

⁷ Mûndû ta ûcio ndavotaga gûtua îtua na nî athanganagia maûndûrî monthe marîa ekaga.

⁸ Ke ndagîrîrwe nîgwîciria atî nîakaamûkîra kîndû kuuma kûrî Mwathani.

Ûthîni na Ûtonga

⁹ Akristiano arîa athîni nîmagîrîrwe nî gûkenaga rîrîa Ngai amanenevia.

¹⁰ Nao Akristiano arîa atongu nîmagîrîrwe nî gûkenaga rîrîa Ngai amanyivia, nîûndû itonga nîikaathira wata ûrîa maûa ma kîthaka mathiraga.

¹¹ Riûa nîrîaraga rîrî na ûrugarî mwîngî na rîkavîvia mûmera, maûa maguo magûcaga na ûthaka waguo ûkathira. Na njîra wata îo itonga nîigaakua îrî mawîrarî ma cio.

Magerio

¹² Kûrathimwa nî andû arîa maûmagîrîria magerio, nîûndû mavootana mageriorî ta mau nîmakaanyita nthûmbî ya mwoyo îrîa Ngai erîîre andû arîa mamwendete.

¹³ Mûndû wa wonthe angîgerua ndakauge atîrî, “Nîragerua nî Ngai.” Nîûndû Ngai ndageragua nî ûndû mûcûku, na ke mwene ndageragia mûndû.

¹⁴ Nwatî mûndû nîageragua rîrîa agucîrîrua na aveenererua nî merirîria make ke mwene marîa macûku.

¹⁵ Merirîria mau macûku nîmagîcaga îvu na magaciara mevia, namo mevia mau makûra maciaraga gîkuû.

¹⁶ Arata akwa ende, mûtikaaveenue!

¹⁷ Gîîko wa kîonthe Kîamro na kîveo wa kîonthe gîkinyanîru kiumaga îgûrû. Kînyûrûrûkaga kiumîte kûrî Ngai mûmbi wa motheri ma îgûrû, ûrîa ûtagarûrûkaga ta iruru cia motheri ma îgûrû.

¹⁸ Ngai nîke wendire tûgîe kuo na njîra ya kiugo Kîam ma, nîguo tûtuîke a vata gatagatîrî ga ciûmbe ciake cionthe.

Kwîgua na gwîka

¹⁹ Arata akwa ende, ririkanagani maûndû mama! Mûndû wa wonthe nîaviûvage kwîgua, nwatî ndakaviûvage kwaria kana kûrakara.

²⁰ Nîûndû marakara matingîtûma mûndû akinyire ûthingu wa Ngai.

²¹ Kwoguo îîyaûreni mîtugo yonthe mîcûku na maûndû monthe matarî maro. Îînyivieni mbere ya Ngai na mwamûkîre kiugo kîrîa avandaga ngororî cienyu na nîkîo kîngîvota kûmûvonokia.

²² Tigani kwîveenia na njîra ya kûthikîrîria kiugo gîake tu, vandû va ûguo îkagani ûrîa kiugîte.

²³ Mûndû wa wonthe ûthikagîrîria kiugo na ndekaga ûrîa kiugaga ekariî ta mûndû ûrîa wîroragia ûthiû wake na gîcicio.

²⁴ Eroragia na akathiî akona ûrîa ke mwene ekariî na athiî wa rîmwe akariganîrwa nî ûrîa ekariî.

²⁵ Nwatî andû arîa mathomaga waro watho ûrîa mûkinyanîru na ûrutaga mûndû ûkomborî, nîaûrûmagîrîra na akavingia ûrîa ugîte na tî kûthikîrîria na akîriganîrwa nîguo, andû acio nî arathime maûndûrî monthe marîa mekaga.

²⁶ Mûndû wa wonthe wîciragia nî wa ndini na ndamenyagîrîra rûrîmî rwake, ndini yake nî ya mana na nî kwîveenia eveenagia.

²⁷ Ndini îrîa Ngai Vava atucaga ntheru na îtarî na ûcuke nî kûmenyerera ciana cia ndigwa na aka a ndigwa mathînarî mao, na kwîgirîrîria maûndû marîa macûku ma nthî.