Isaia 9 - ÎVUKU RÎA ÛVORO MWARO

Nîtûciarîrîtwe mwana

¹ Vûrûri ûrîa wecûrîtwe nî kîeva ndûkethîrwa ûrî na mathîna rîngî. Tene Ngai nîwatûmire mavûrûri ma Zebuluni na Nafutali mamenererue, nwatî vuvarî nîagaatûma Galili kûrîa andû a ndûrîrî matûûraga kûgîe na ûkumio. Vûrûri ûyû nî ûrîa ûrî njîrarî îrîa îthiîrîrîte gatagatî ka îria na Jorodani.

² Andû arîa maatwîre mathiîcagîrîra ndumarî nîmonete ûtheri mûnene. Andû arîa maatûûraga vûrûrirî wa nduma ndumanu, rîu nîmarîrîtwe nî ûtheri.

³ We Ngai-Mûnene, nîûtûmîte rûrîrî rûongerereke, nîûtûmîte rûgîe na gîkeno kînene. Nîmaracanjamûka marî mbere yaku, marî na gîkeno ta vîndî ya maketha, ta ûrîa andû makenaga rîrîa maragaana indo irîa matavîte.

⁴ Nîûndû nîunangîte îcoki rîrîa rîamaritûvîrîte, na ûkaunanga mûtî wa kwigîrîra ciande ciao. Nîunangîte rûthanju rûrîa rwavinyagîrîria andû aku, wata ûrîa wavootire athigari a mbaara a Midiani.

⁵ Iratû cionthe cia athigari a mbaara arîa maatharîkagîra, na nguo ciao cionthe irîa irî na maroro ma nthakame, nîikaavîvua ta ngû.

⁶ Nîûndû nîtûciarîrîtwe kaana. Nîtûvetwe kaana ga kavîcî. Na nîkavetwe vinya wa kwathana. Gageetwa, “Mûtaarani wa Magegania, Ngai mwene vinya wonthe, Vava wa Tene na tene, Mûthamaki wa Thayû.”

⁷ Wathani wake nîûkaathiî na mbere ûkînenevaga; vîndî cionthe ûkethagîrwa ûrî na thayû, na nîagaatuîka mûthamaki vuva wa Daudi. Nîakaaûrûngamia na aûmenyerere, akaathanaga na kîvooto na ûthingu, kuuma rîu nginya tene na tene. Ngai-Mûnene mwene vinya wonthe nîke ûkaavingia maûndû mama.

Ngai-Mûnene nîakaaverithia Isiraeli

⁸ Mwathani nîatuîrîrîte andû a Jakovu, na îtuîro rîu rîgakinyîra andû a Isiraeli.

⁹ Andû onthe a Isiraeli nîmakaamenya, andû a mûvîrîga wa Efiraimu na andû arîa matûûraga Samaria, maragia na mwîtîîo na ûng'endu makiugaga atîrî,

¹⁰ “Nthingo cia matuvarî nî nyomomoku, nwatî tue nîtûituma rîngî na mathiga marî maumie. Itugî cia mîtî ya mîkûyû nî njûkangie, nwatî vandûrî va cio nîtûtuma na cia mîtarakwe.”

¹¹ Kwoguo, Ngai-Mûnene nîakaarete nthû ciao nîguo imatharîkîre.

¹² Andû a Sîria marî mwena wa îrathîro, na andû a Filisiti marî mwena wa îthûîro, mathamîtie tûnyua twao nîguo mamerie Isiraeli. Kûnarî ûguo, marakara ma Ngai-Mûnene tî mathiru; na nîatambarûkîtie njara yake nîguo îverithanie.

¹³ Ngai-Mûnene mwene vinya wonthe averithia andû a Isiraeli, matiamûcokerera.

¹⁴ Kwoguo mûthenya ûmwe Ngai-Mûnene nîagaatinia Isiraeli ciongo na mîkia, agaatinia rûvûa rwa mûkîndû na rûthanje.

¹⁵ Athuuri na andû arîa ave gîtîîo nîo ciongo, nao arathi arîa mathomithanagia maûndû ma maveeni nîo mîkia.

¹⁶ Atongoria a andû aya nîmamavîtithîtie, nao arîa matongoragua nî andû aya nîmaûrîte.

¹⁷ Kwoguo Mwathani ndakenagua nî anake aya, ndarî na ntha na ciana ciao cia ndigwa na aka ao a ndigwa, nîûndû andû onthe matiîcî Ngai, na nîeki naaî na maragia maûndû ma waganu. Nîûndû wa maûndû mau monthe, marakara make tî mathiru, nwatî nwa atambarûkîtie njara yake nîguo îverithanie.

¹⁸ Waganu wa andû wakanaga ta mwaki ûvîvagia nthaugû na mîgua. Wakanaga ta mwaki ûkîvîvia mûtitû ûkîrutaga ndogo ndito îkiunûkagia na îgûrû.

¹⁹ Marakara ma Ngai-Mûnene mwene vinya wonthe, nîmatûmîte vûrûri ûvîvue na mwaki, nao andû nîta ngû cia gûwakania; gûtirî mûndû ûracaîra mûndû ûrîa wîngî.

²⁰ Macunanaga indo nwatî matiîganagîra, marîcaga nyama cia mûndû ûrîa wîngî, wa mûndû atharîkagîra mûndû ûrîa wîngî.

²¹ Manase na Efiraimu matharîkanagîra o ene, nao oîrî marî vamwe matharîkagîra Juda. Nîûndû wa maûndû mau monthe marakara ma Ngai-Mûnene tî mathiru, nwa atambûrûkîtie njara yake nîguo îverithanie.