Isaia 7 - ÎVUKU RÎA ÛVORO MWARO

Ndûmîrîri kûrî mûthamaki Ahazi

¹ Rîrîa mûthamaki Ahazi, mûvîcî wa Jothamu aathanaga Juda, Jothamu aarî mûvîcî wa Uzia, Rezini mûthamaki wa Sîria na Peka mûvîcî wa Remalia, mûthamaki wa Isiraeli, nîmaatharîkîre îtûûra rîa Jerusalemu, nwatî matiarîvoota.

² Rîrîa mûthamaki wa Juda aamenyithirue atî, andû a Sîria nî manyitanîrîte na andû a Isiraeli, ke na andû ake onthe nîmaanyitirwe nî guoya nyîngî nginya makinaina ta ûrîa mîtî ya kîthakarî inainagua nî rûkûngi.

³ Ngai-Mûnene nîwerire Isaia atîrî, “Oca mûvîcîguo Shearijashubu, na mûthiî nake mûgatûnge mûthamaki Ahazi. Nîûgûtûngana nake njîrarî kûrîa nguo itumagîrwa, mûthiiarî wa mûtaro ûrîa ûretaga manjî kuuma kariarî ka mwena wa îgûrû.

⁴ Mwîre amenyerere, akirîrîrie, ndagetigîre na ndagakue ngoro nîûndû wa marakara meengî ma Rezini, mûthamaki wa Sîria na ma Peka, mûvîcî wa Remalia. Andû acio aîrî mekariî ta ndogo ya ngû ikîvora mwaki.

⁵ Asîria, manyitanîrîte na Aisiraeli na mûthamaki maarî na mûvango wa gûgwîka naaî makiugaga atîrî,

⁶ ‘Nîtûthiî tûkatharîkîre andû a vûrûri wa Juda, tûmeguithie guoya, twîgwatîre vûrûri ûcio na tûtue mûvîcî wa Tabeeli mûthamaki wakuo.’ ”

⁷ Nwatî nie, Mwathani Ngai-Mûnene nîrauga atîrî, “Ûndû ûcio ndûkaavinga.

⁸ Nîûndû îtûûra rînene rîa vûrûri wa Sîria nî Damesiki na mûthamaki wa Damesiki nî Rezini. Kwa îvinda rîa mîaka mîrongo îtandatû na îtano (65) vûrûri wa Isiraeli ûkethîrwa ûcûkangîtue na ûtangîtuîka rûrîrî.

⁹ Îtûûra rîrîa rînene rîa Isiraeli nî Samaria, na mûnene wa Samaria nî mûvîcî wa Remalia.” “Ethîrwa tî mwîtîkia, nama mûtigekindîria.”

Rûûri rwa Imanueli

¹⁰ Ngai-Mûnene nîwerire Ahazi rîngî atîrî,

¹¹ “Îra Ngai-Mûnene, Ngai waku akûve rûûri, rûrî rwa kuuma kûrîa kûriku mûno kwa arîa akuû kana rwa kuuma îgûrû mûno.”

¹² Nwatî Ahazi nîwacokirie atîrî, “Ndigwîtia rûûri, na tîngeria Ngai-Mûnene.”

¹³ Nake Isaia nîwacokirie atîrî, “Tathikîrîriani mue andû a nyomba ya Daudi! Nîmûnogetie andû, atî nwa mûkwenda kûnogithia Ngai wanake?

¹⁴ Kwoguo Mwathani ke mwene nîakûmûva rûûri: mwîrîtu nîakaagîa îvu, aciare kaana na agatuîrîre rîîtwa, ‘Imanueli.’

¹⁵ Kaana kau gakaarîcaga ûûkî na kanyunyage îriia, nginya rîrîa gakaamenya kûthuura maûndû maro na kûrega maûndû macûku.

¹⁶ Mbere ya kaana kau kamenya kûthuura maûndû maro na kûrega maûndû macûku, mavûrûri ma athamaki aîrî arîa mamwîguithagia guoya makethîrwa marî matiganîrie.

¹⁷ “Ngai-Mûnene nîagaakûretere we, andû aku, na andû a nyomba ya aguo yonthe mavinda ma thîna, îrîa îtanoneka rîngî kuuma rîrîa andû a Isiraeli maamûkanire na andû a Juda; thîna ûcio ûkaaumana na mûthamaki wa Asîria.

¹⁸ “Vîndî îo, Ngai-Mûnene nîakaaugia mûrûri ete andû a Misiri maûke ta ngi kuuma kûrîa tûrûnjî twa Nailo tumîte, na Asîria maûke ta njûkî kuuma vûrûrirî wao.

¹⁹ Nîmagaaûka onthe na matûûre ivarûrûkorî, na mîatûkarî ya mathiga, wana ithakarî cia mîtî ya mîgua kuonthe na kûndû kuonthe gwa kûrîthua.

²⁰ “Vîndî îo, Mwathani nîagaakombora kawembe kuuma mûringo wa rûnjî rwa Farati: kawembe kau nî mûthamaki wa Asîria! Nîakenja njuîrî cia ciongo cienyu, njuîrî cia mîîrî yenyu wana nderu cienyu.

²¹ “Vîndî îo, mûndû akaarîthagia mori îmwe na ng'ondu igîrî.

²² Nacio nîikaaruta îriia rîîngî nginya mûndû ûcio agîe na kîrîa kîonthe avataraga. Nao andû anini arîa magaatigara vûrûrirî makaanyunyaga îriia na makarîa ûûkî.

²³ “Vîndî îo, mîgûnda yonthe ya mîthavibu, îrîa wa mûgûnda warî na mîthavibu ngiri îmwe ya mwîgana wa sîlûva ngiri îmwe (1,000) kûringana na kîthimi Kîam hekarû, gûgaakûra nthaugû na mîgua.

²⁴ Andû nîmakaathiî kuo kûguîma marî na mota na mîguî, nîûndû vûrûri wonthe ûkethîrwa wîcûrîte nthaugû na mîgua.

²⁵ Nacio irîma cionthe kûrîa kwarîmagwa, gûgaakûra nthaugû na mîgua na gûtirî mûndû ûkaathiî kuo. Gûkethîrwa kûrî kûndû gwa kûrîthia ng'ombe na ng'ondu.”