Isaia 66 - ÎVUKU RÎA ÛVORO MWARO

Ngai-Mûnene nîwatuîrîre ndûrîrî

¹ Ngai-Mûnene arauga atîrî, “Îgûrû nî gîtî gîakwa Kîam ûnene, nayo nthî nî njûng'wa ya kwigîrîra magûrû makwa. Nî nyomba ya mûthemba ûrîkû mûngîndumîra, na nî vandû vekariî atîa nîngîvota gûtûûra?

² Nie mwene nînie naûmbire indo ino cionthe, na kwoguo indo ino cionthe nî ciakwa. Nwatî mûndû ûrîa ûngenagia, nî ûrîa wînyivagia na wîrirîte, ûrîa ûndîîte na ûmbathîkagîra.

³ “Andû arîa marutaga ndegwa îgongoona monaga arî ûndû ûmwe na kûruta mûndû îgongoona; arîa marutaga ng'ondu îgongoona monaga arî ûndû ûmwe na kuna ngui ngingo; arîa marutaga matega ma irio cia mûgûnda monaga arî ûndû ûmwe na kûruta îtega rîa nthakame ya ngûrwe; arîa marutaga îtega rîa ûbani monaga arî ûndû ûmwe na kûgooca mûvuanano. Andû acio methuurîrîte njîra ciao o ene, na makenaga rîrîa makûgooca Ngai na njîra itarî mbagîrîru.

⁴ Kwoguo nîngûmaretithîria mathîna; na nîmaretere indo irîa metigîrîte, nîûndû rîrîa netanire gûtirî mûndû wetîkire; rîrîa naririe matiathikîrîria. Nwatî meekire maûndû macûku ngîonaga, na makîthuura maûndû marîa mataangenagia.”

⁵ Tathikîrîriani ûrîa Ngai-Mûnene akuuga, mue arîa mwîgucaga mûgambo wake mûkainaina: “Andû enyu arîa mamûthûrîte na mamûnyararîte marauga atîrî nîûndû wakwa, ‘Ngai-Mûnene nîonanie ûnene wake, nîguo tûone mûgîkena.’ Nwatî o ene nîo magaaconoka!

⁶ Tathikîrîriani, mwîgue înegene rîu rîrî îtûûrarî, mûgambo ûcio ûreguîka hekarûrî! Ûcio nî mûgambo wa Ngai-Mûnene akîverithia nthû ciake!

⁷ “Îtûûra rîakwa rîrîa rîtheru rîvana ta mûndûmûka aciarîte mwana wa kavîcî na îvenya, wana ateguîte ruuo rwa gûciara.

⁸ Nîûrîkû wanegua ûndû ta ûcio? Nîûrîkû wanona ûndû ta ûcio? Rûrîrî rûgima nwa rûgîe kuo na mûthenya ûmwe? Vûrûri mûgima nwa ûciarwe wa rîmwe? Nwatî îtûûra rîa Zayuni rîaciarire ciana ciarîo vîndî wa îo rîambîrîrie kwîgua ruuo rwa gûciara.

⁹ Nwa nginyîrie andû akwa vîndî yao ya gûciarwa na ngirie maciarwe?” Nînie Ngai wenyu nauga ûguo.

¹⁰ Kenanîrani na îtûûra rîa Jerusalemu; na mûcanjamûke nîûndû wa rîo, mue arîa onthe mûrîendete! Kenanîrani narîo, mue muonthe mûrîcakayagîra!

¹¹ Nîûndû nîmûkoonga na mwîganie, mûkaarîa ûtonga warîo na mwîganie; mûkaanyua mûkenete na mûvae, kuumana na wîngî wa ikeno ciake.

¹² Ngai-Mûnene arauga atîrî, “Ngaava îtûûra rîa Jerusalemu ûtonga mwîngî ta rûnjî, na ûtonga wa ndûrîrî ûgeecûra kuo ta rûnjî rûrî rwîcûru. Namue mûkoonga na mûkuuagwe ta mwana wa rûkenge, na mûthathawe ta mwana athathaagwa arî cierorî cia ng'ina.

¹³ Nie ngaamûmîrîria mûrî kûu Jerusalemu wata ûrîa mwana aûmagîrîrua nî ng'ina.

¹⁴ Rîrîa mûkoona maûndû mau magîkîka nîmûgaakena, mûgeekara mûrî na ûgima wa mîîrî na mûrî na vinya. Vîndî îo nîrîo gûkaamenyekana atî nie Ngai-Mûnene, nînie ngitagîra ndungata ciakwa. Na rîrîa narakara nîmverithagia nthû ciakwa.”

¹⁵ Ngai-Mûnene agaaûka ekariî ta mwaki. Agaaûka akuuîtwe nî kîvuvûkanio, nîguo averithie arîa mamûrakarîtie na akaananie na nînîmbî cia mwaki.

¹⁶ Nîûndû Ngai-Mûnene agaatuîra andû onthe na mwaki na rûviû rwake; nao andû eengî nîmakaaûragwa.

¹⁷ Ngai-Mûnene arauga atîrî, “Andû arîa metheragia na makethambia makathiî marûmanîrîrîte na mûruti magongoona mathiîte mîgûndarî kûrîa mîvuanano îrutagîrwa magongoona, arîa marîcaga nyama cia ngûrwe na cia mbîa, na irio irîa irî mûgiro, makaathiranîrua vamwe onthe.

¹⁸ Nîmbicî ciîko ciao na meciria mao. Ngaaûka gûcokanîrîria andû a ndûrîrî cionthe na nthiomi cionthe; magaaûka na meyonere riiri wakwa

¹⁹ na nîngaamonia rûûri rwa vinya wakwa gatagatîrî kao. “Nwatî arîa magaatigara nîngaamatûma mathiî mavûrûrirî ma kûraca; namo nî: Tarishishi, Lîbia, na Lîdia (kûrîa kûrî andû maicîkene na gûtûmîra ûta na mîguî mûno.) Wana nîngaamatûma mathiî mavûrûrirî ma Tubali na Ngiriki, wana mavûrûrirî ma kûraca marîa marî vakuvî na îria, marîa matanegua ngumo ya rîîtwa rîakwa wana kana moona riiri wakwa. Andû acio akwa nîmakaanîrîra ûvoro wa riiri wakwa mavûrûrirî mau monthe.

²⁰ Nîmakaaûngania andû onthe a rûrîrî rwenyu kuuma ndûrîrîrî cionthe mamarete kûrî nie Ngai-Mûnene marî îtega. Makaamarete makuuîtwe na mbarathi, ikaari cia mbarathi, mataratî, nyûmbû, na ngamîîra kîrîmarî gîakwa kîrîa kîtheru kûu Jerusalemu, wata ûrîa Aisiraeli maretage irio ciao cia mîgûnda nyombarî ya Ngai-Mûnene maciîkîrîte ciondorî ino ntheru.

²¹ Nîngaathuura amwe ao nîmatue athînjîri-Ngai na amwe ao nîmatue Alawi.

²² “Wata ûrîa îgûrû rîcerû na nthî njerû irîa ngaaûmba igaatûûra na vinya wakwa, nwaguo njiarwa cienyu na rîîtwa rîenyu igaatûûra.

²³ Kuuma kîrugo Kîam mweri mûcerû nginya kîrugo kîu kîngî Kîam mweri mûcerû, na kuuma thavatû îmwe nginya îrîa îngî, andû onthe nîmagaaûkaga gûkû Jerusalemu kûngoocera kuo.” Ûguo nîguo Ngai-Mûnene arauga.

²⁴ “Makiuma kûu nîmakoonaga ciimba cia andû arîa maareganire nanie; igunyû irîa ikaairîcaga itigaakucaga, na mwaki ûrîa ûkaaivîvagia ndûkaavorekagia, na ciimba icio ikoonekaga irî na magigi nî andû onthe.”