Isaia 65 - ÎVUKU RÎA ÛVORO MWARO

Ngai nîaverithagia andû arîa aremi

¹ Ngai-Mûnene arauga atîrî, “Nethagîrwa nîîvarîrîtie gûcokia mavoya ma andû akwa, nwatî matiamvoya. Nethagîrwa nîîvarîrîtie kwonwa nî arîa mataanjaragia, nwatî wana matiageria kûnjaria. Nie nerire rûrîrî rûrîa rûtamvoyaga atî: ‘Nîrî ava! Nîrî ava.’

² Natambûrûkagîria andû acio aremi njara ciakwa mûthenya mûgima, acio mathiîcaga na njîra itarî nûngîrîru, na marûmagîrîra mîvango yao o ene.

³ Andû aya mekaraga makîndakaragia vîndî cionthe. Marutagîra mîvuanano yao magongoona tûmîtitûrî tûrîa twamûre, na makavîvagîria ûbani îgûrû rîa metha cia magongoona irîa itumîtwe na matuvarî.

⁴ Mekaraga mbîîrîrarî na makararaga methithîte. Marîcaga nyama cia ngûrwe na makanyunyaga mûthûri wa nyama irîa irî mûgiro.

⁵ Meraga andû arîa engî atîrî, ‘Mûtigatûkuvîvîrie; tue tûrî atheru kûmûkîra, mûtigatûvutie!’ Andû ta acio ndingîmakirîrîria, marakara makwa kûrî o mekariî ta mwaki ûrîa ûtavoraga.

⁶ “Nînduîte kûmaverithia na ngandîka, na ndingîkirîrîria rîngî, nwatî nduîte kûmaverithia

⁷ nîûndû wa mevia mao na nîmaverithîrie mevia ma methe mao. Nîûndû nîmaavîvagîria ûbani îgûrû rîa irîma, na makanumaga marî îgûrû rîa tûrîma. Kwoguo nîmaverithia viû nîûndû wa maûndû marîa meekire tene.”

⁸ Ngai-Mûnene arauga atîrî, “Andû moona thavibu inyitanîte vamwe irî mbaro meranaga atî: ‘Tûtikaithûkie, nîûndû nwa ciume ndivei.’ Ûguo nîguo ngeeka nîûndû wa ndungata ciakwa, na ndikaamathiria onthe.

⁹ Nîngaatûma kûgîe na njiarwa kuuma kûrî Jakovu, na ndûme Juda kuume andû arîa makaagaa vûrûri wakwa ûrîa ûrî irîma. Andû arîa nthuurîte nîo makaaûgaa, nao arîa mandungatagîra nîo magaatûûra kuo.

¹⁰ Ciandarî cia Sharoni igaatuîka cia kûrîthagua ng'ondu, nacio Ciandarî cia Akori ituîke kûndû gwa kûnogokagwa nî ng'ombe cia andû akwa arîa maanjaragia.

¹¹ “Nwatî mue arîa mwandiganîrie nie Ngai-Mûnene, arîa mwariganîrwe nî Zayuni, kîrîma kîrîa gîakwa Kîammûre, mue arîa mûgoocaga ngai irîa ciîtagwa Gadi na Meni, ngai cia mûnyaka na mûtino;

¹² mûthiiarî ngaatûma mûragwe na rûviû. Ngaamûragithia muonthe, nîûndû rîrîa netanire mûtiambîtîka, rîrîa naririe mûtianthikîrîria. Nwatî mwekire maûndû macûku na mûkîthuura maûndû marîa mataangenagia.

¹³ Kwoguo, nie Mwathani Ngai-Mûnene nauga atî: Ndungata ciakwa ikethagîrwa na gîa kûrîa, nwatî mue mûkethagîrwa mûrî na yûra; ndungata ciakwa ikethagîrwa irî na gîa kûnyua, nwatî mue mûkethagîrwa mûrî na nyonda; ndungata ciakwa igeekaraga irî na gîkeno, nwatî mue mûgeekaraga mûrî na gîconoko.

¹⁴ Ndungata ciakwa ikaainaga irî na gîkeno ngororî, nwatî mue mûkaarîraga mûrî na ruuo ngororî, mûkiugagîrîria nîûndû wa ruuo rwa ngoro.

¹⁵ Andû akwa arîa nthuurîte magaatûmagîra rîîtwa rîenyu rîrîa makwenda mûnyitwe nî kîrumi. Makaaugaga atî: ‘Nie Mwathani Ngai-Mûnene nîngûmûraga.’ Nwatî nîngaava ndungata ciakwa rîîtwa rîcerû.

¹⁶ Kwoguo, mûndû wa wonthe vûrûrirî wenyu ûrîa ûkenda kûrathimwa, akaathiîcaga kûrathimwa nî Ngai ûrîa wa ma. Nake mûndû wa wonthe ûkevîtaga, akevîtaga akîgwetaga rîîtwa rîa Ngai ûrîa wa ma; nîûndû mathîna marîa makûrû nîmakaariganîra na ndikamaririkana rîngî.”

Ûmbî Mûcerû

¹⁷ Ngai-Mûnene arauga atîrî, “Nîngûmba îgûrû rîcerû na nthî njerû. Maûndû marîa makûrû matikaaririkanwa rîngî, wana kana gwîciirague ûvoro wamo.

¹⁸ Nwatî tûûragani mûkenete vîndî cionthe, mûgîcanjamûkaga nîûndû wa indo irîa ngûmba. Jerusalemu îrîa ngûmba îkethagîrwa îrî gîkeno, nao andû a kuo mageekaraga makenete.

¹⁹ “Nanie nîngaakenaga nîûndû wa Jerusalemu, na ngenagîre andû akwa. Kûu Jerusalemu gûtigaacoka kwîguwa mûgambo wa kîrîro wana kana wa kîeva.

²⁰ Gûtikaagîa ciana igûkua irî ngenge rîngî, nao andû arîa akûrû matigaakua matakinyîtie kavinda kao. Mûndû angîkua akinyîtie ûkûrû wa mîaka îgana akoonagwa arî wa mwîthî, na angîkua atakinyîtie ûkûrû wa mîaka îgana akoonagwa arî mûrume.

²¹ Andû magaatumaga nyomba na magatûûra kuo; makaavandaga mîthavibu na makarîa matunda mayo.

²² Matigaatuma nyomba itûûrwa nî andû engî; matikaavanda mîthavibu îrîwa nî andû engî. Andû akwa magaatûûraga ûtûûro mûraca ta mîtî; na andû akwa arîa amûre nîmagaakenagîra wîra ûrîa marutîte îvinda îraca.

²³ Matikaarutaga wîra ûtarî na umithio, kana magîa na ciana cia kûnyitagwa nî mathîna; nîûndû nîngaamarathimaga o ene wa vamwe na njiarwa ciao.

²⁴ Nîngegucaga mavoya mao wana mbere ya mamvoya, na ngaamacokagîria mavoya mao wana matarîkîtie kûvoya.

²⁵ Ciathi na ng'ondu ikaarîcaga vamwe; mînyambû îkaarîcaga nyaki ta ndegwa, nacio njoka ikaarîcaga mûthetu. Kûu kîrîmarî gîakwa kîonthe kîrîa kîtheru, gûtirî mûndû ûgaativia kana acûkangie ûrîa wîngî.”