Isaia 64 - ÎVUKU RÎA ÛVORO MWARO

¹ Naarî kethîrwa wavingûra matu ûnyûrûrûke nthî, irîma ingîkwona ikainaina nî guoya.

² Ingîvîa ta ûrîa mwaki ûvîvagia kîthaka, ta ûrîa mwaki ûtûmaga manjî matherûke. Ûka ûmenyithanie rîîtwa rîaku kûrî nthû ciaku, na ûtûme ndûrîrî cinaine irî mbere yaku!

³ Rîrîa wekire maûndû ma kûgegania marîa tûterîgîrîre; nîwanyûrûrûkire nthî na ûgîtûma irîma cinaine nî guoya ciakwona.

⁴ Kuuma tene gûtirî mûndû wanegua kana akona Ngai îngî tiga we, ûrîa wîkaga andû arîa mamwîvokete maûndû ta mau.

⁵ We nîwamûkagîra andû arîa mekaga maûndû ma ûthingu makenete, arîa makûririkanaga na marûmagîrîra njîra ciaku. We nîwarakarire nîtue, nwatî nîtwathiîre na mbere kwîvia; wana ethîrwa nîwarakarire mûno nîtue, tûtwîre twîvagia kuuma tene.

⁶ Tue tuonthe tûtuîkîte ta andû marî na mûgiro; na ciîko cietû cionthe mbaro ciîkariî ta nguo îrî na gîko. Tuonthe tûûmaga ta mathangû, namo mevia metû matûgûrûkagia ta rûkûngi.

⁷ Gûtirî wanarî mûndû ûkûvoyaga; gûtirî mûndû ûkûvoyaga ûtethio. We nîûtwîthithîrîte na ûgatûtiganîria nîûndû wa mevia metû.

⁸ Nwatî kûnarî ûguo, we Ngai-Mûnene, we nîwe Vava. Tue twîkariî ta yûmba, nawe wîkariî ta mûmbi wa nyûngû. We nîwe watûmbire tuonthe.

⁹ Ndûgatûrakarîre makîria, we Ngai-Mûnene, kana ûtûûra ûririkanaga mevia metû tene na tene. Ririkana atî tue tuonthe tûrî andû aku.

¹⁰ Matûûra maku marîa matheru matuîkîte werû; Zayuni gûtuîkîte werû, Jerusalemu gûtuîkîte maganjo.

¹¹ Nyomba yetû îrîa ntheru na nthaka, kûrîa methe metû maagûkumagîria, nîîvîvîtue na mwaki îkavîa viû. Nakuo kûndû gwetû kuonthe kûrîa kwarî kûthaka gûtigîtwe kwanangîkîte.

¹² We Ngai-Mûnene, nwa wone maûndû mau monthe na ûrege kûringwa nî ntha? Nîûthiî na mbere gûkira, na ûtûverithie gûkîra ûrîa tûngîvota kûmîrîria?