Isaia 58 - ÎVUKU RÎA ÛVORO MWARO

Wînyerekia wa ma

¹ Ngai-Mûnene arauga atîrî, “Anîrîra na vinya waku wonthe wata ûrîa ûngîvota! Menyithia nyomba ya Jakovu, andû akwa mevia mao!

² Mangoocaga mîthenya yonthe, na nîmendaga kûmenya njîra ciakwa, takwa marî rûrîrî rûtwîre rwîkaga maûndû ma ûthingu, na rûtarî rwatiganîria maathani ma Ngai wao. Mendaga nîmatuîre ciira na kîvooto, na makendaga gûkuvîvîria Ngai.”

³ Andû maraûria atîrî, “Twînyerekagia nîkî, nawe Ngai-Mûnene ndwonaga? Twîimaga irio nîkî, nawe ndûtindanagîra na ûndû ûcio?” Nake Ngai-Mûnene aramacokeria atîrî, “Mûthenya ûrîa mûrenyerekia, mûrûmagîrîra wendi wenyu tu, na mûgakinyîrîria aruti wîra enyu onthe.

⁴ Taroriani, mwînyerekagia nîguo mûtetanie na mûrûe mûkîringanaga na ngundi. Kwînyerekia kwa mûthemba ta ûyû wenyu gûtigaatûma nîmûthikîrîrie mûkîmvoya.

⁵ Mûthenya ûrîa mûrenyerekia, nîmwîverithagia; mwînamagîrîria ciongo cienyu ta kamûnyaki, na mûkaara nguo cia macakaya mûkaimamîra na mûkamama mûurî. Kûu nîkuo mwîtaga kwînyerekia? Mwîciragia nie Ngai-Mûnene, nwa ngenue nî mûthenya ta ûcio?

⁶ “Kwînyerekia kûrîa kûngenagia nî gûkû: kûthengutia mînyororo ya gûkinyanîrîria na ya kwimana kîvooto; kûrekereria andû arîa akinyîrîrie, na kûthengutia mînyororo ya mîthemba yonthe.

⁷ Nî kûgaana irio cienyu na arîa avûtu na kwamûkîra athîni arîa maûrûraga mîciîrî yenyu. Mwona mûndû arî njaga, mûkamûva nguo na mûtikarege gûtethereria andû enyu.

⁸ “Mweka maûndû mau, wega wakwa ûkaamwaragîra ta riûa rîkîratha, na mwarwara mûkaavoraga na îvenya. Ciîko cienyu mbaro nîcio ikaamûtongoragia, naguo riiri wa Ngai-Mûnene ûmûgitagîre kuuma mwena wa vuva.

⁹ Vîndî îo mûkaavoyaga, nanie Ngai-Mûnene ngegua mavoya menyu. Mûkaambîtaga, nanie ngamwîtîka. “Mûngîtiga gûkinyanîrîria, na mûtigane na rûthûro rwa mîthemba yonthe, na mûtigane na mîario yonthe mîcûku;

¹⁰ mûvecage arîa avûtu irio, na mûvingagîrie arîa marî na mathîna mavata mao, ûtheri wenyu ûkaaraga kûrîa kûrî nduma, nakîo kîeva kîenyu kîgarûrwe gîtuîke gîkeno.

¹¹ Nie Ngai-Mûnene ngaamûtongoragia vîndî cionthe, na nîmûvingagîrie mavata menyu vîndî ya thîna. Ngaamwigaga mûrî na vinya na ûgima mwaro. Mûkaavana ta mûgûnda wî mwîtîrîrie manjî, ta kîthima Kîam manjî kîrîa gîtavûcaga.

¹² Andû enyu nîmagaatuma rîngî nyomba irîa ciomomorirwe tene, maitume rîngî îgûrû rîa mîcingi îrîa mîkûrû. Namue mûgeetagwa andû arîa maatumire rîngî nthingo irîa ciomomoretwe, arîa maatumire rîngî nyomba irîa ciavaraganîtue.”

Kîveo nîûndû wa kûvingia thavatû

¹³ Ngai-Mûnene arauga atîrî, “Ûngîtiga kûruta wîra mûthenya wa thavatû, ûtige kûrûmîrîra maûndû ma gwîkenia we mwene mûthenya wakwa mwamûre, ûtucage thavatû mûthenya wa gûkena na mûthenya wa Ngai-Mûnene wa kûvewa gîtîîo, ûvecage mûthenya ûcio gîtîîo, na ûtige kûthiîcaga njîra ciaku, na ûtige gûcaragia maûndû ma gwîkenia kana kwaragia ndeto itarî na kîguni,

¹⁴ nîûkaagîa na gîkeno kîrîa mvecaga arîa mandungatagîra, na ngûvecage ûvootani maûndûrî monthe ma gûkû nthî, na nîngaatûma ûkenagîre vûrûri ûrîa nagaîre aguo, Jakovu. Nînie, Ngai-Mûnene nauga ûguo.”