Isaia 57 - ÎVUKU RÎA ÛVORO MWARO

Ûgooci wa mîvuanano nîwarumirwe kûu Isiraeli

¹ Mûndû mûthingu nîakucaga na gûtirî mûndû ûmakaga; andû aro mangîkua, gûtirî mûndû ûmenyaga atî Ngai nîkwa amagitagîra matikanyitwe nî maûndû macûku.

² Arîa mathiîcaga na mîthiîre mîrûngîrîru maakua nîmakethîrwa na thayû.

³ Nwatî mue ciana cia ago, na njiarwa cia mûndûmûka mûtharia na mûmaraa ûkani ava vakuvî.

⁴ Nû mûranyarara? Nû mûrathekerera? Anga mue mûtirî ciana cia evia, rûciaro rûrîa rûveenanagia?

⁵ Mue mûgoocagîra ngai cia maveeni rungu rwa mîvuru yonthe. Mûthînjagîra ciana cienyu irî magongoona mîatûkarî ya mathiga.

⁶ Mwocaga mathiga marîa manyoroku kuuma Kîamndarî. Mûmocaga mûkîmarutagîra matega ma kîndû gîa kûnyuwa na matega ma irio. Mwîciragia nîngenagua nî maûndû mau?

⁷ Mûrîarûthîru ûtharia kûndû kûrîa gûtûgîru na njîra ya kûgooca mîvuanano, kwoguo mûtiîthîrîtwe mûrî evokeku kûrî nie.

⁸ Mwigîte mîvuanano yenyu vuva wa mîrango na mîkîgorî yayo. Mûndiganagîria, mûkaruta nguo cienyu na mûgatwa itandarî cienyu irîa nene mûrî na endwa enyu, arîa mûrîvaga nîguo mûmame nao. Kûu nîkuo mûvingagîria merirîria menyu macûku.

⁹ Mwîvakaga manyamû manungi waro na maguta mûgacoka mûkathiî kûgooca ngai ya mûvuanano îrîa îtagwa Moleku. Mwatûmire anjaama enyu mathiî kûndû kûraca, nginya magîkinya kwa arîa akuû.

¹⁰ Mue nîmwenogirie na rûgendo rwa kûthiî kûndû kûraca, nwatî mûtiakua ngoro. Nîmwathiîre na mbere kûgîa na vinya, na kwoguo mûtiagirîka.

¹¹ Ngai-Mûnene araûria atîrî, “Mwegucaga guoya na mûgetigîra ûrîkû, atî nîguo mûveenanie, na mûtiandirikana, wana kana mwîciria ûvoro wakwa wanarî vanini? Mwatigire kûnîîtigîra nîûndû nîngirîte kavinda karaca?

¹² Nie nîngaaumbûrîra andû ûvoro wa ûthingu wenyu na mawîra menyu, nwatî mîvuanano yenyu ndîkaamûguna.

¹³ Vîndî îrîa mûgaakaya mûgîtia ûtethio, mîvuanano îo yenyu nîîkamûvonokia! Rûkûngi nîrûkaamîvuruta îthiî kûndû kûraca. Nwatî arîa manîîvokete nîo makegwatîra vûrûri ûtuîke wao, na magae Kîrîma gîakwa kîrîa Kîammûre.”

Ntha cia Ngai

¹⁴ Ngai-Mûnene arauga atîrî, “Tûgûtani, tûgûtani, thondekani njîra, thengutiani ithukî cionthe njîrarî ya andû akwa!

¹⁵ “Ûguo nîguo Ke Ûrîa ûrî îgûrû mûno, Ke Ûrîa wambararîtue mûno, ûrîa ûtûûraga tene na tene na ûrîa wîtagwa Mûtheru arauga. “Nie mbîkaraga kûu îgûrû kûrîa kûtheru, mbîkaraga na andû athînîku na enyivia. Nîngekîra mîoyo arîa maarî enyivia, na gwîkîra vinya arîa enyivia.

¹⁶ Nîûndû ndigûtûûra ngararanagia tene na tene, kana ndûûre ndakarîte nîo vîndî cionthe. Nîûndû nîngîka ûguo, andû onthe nwa makwire, andû arîa nie naveere mwoyo.

¹⁷ “Narakarire nîo nîûndû wa mevia mao na ûkoroku wao, nînamaverithirie, ngîmatiganîria na ngîtûmbwa nî marakara. Nwatî nîmaûmirie kîongo na makîthiî na mbere kûrûmîrîra njîra ciao o ene.

¹⁸ “Nîmonete mîthiîre yao, nwatî nîngamavonia. Nîngamatongoria, na nîmaûmîrîrie; nîngavoreria andû arîa macakayaga.

¹⁹ Nînie Ngai-Mûnene ngaamava thayû, thayû kûrî arîa marî kûraca na arîa marî gûkuvî! Nînie ngaavonia andû akwa.

²⁰ Nwatî andû arîa aganu mekariî ta îria rîgikia ndiivû, rîrîa rîtangîvoorera; makûmbî ma manjî ma rîo maikagia ndaka na gîko ndeererî ciarîo.

²¹ Ngai wakwa arauga atîrî, ‘Andû arîa aganu matingîgîa na thayû.’ ”