Isaia 52 - ÎVUKU RÎA ÛVORO MWARO

Ngai nîagaakûûra Jerusalemu

¹ Ûkîra, ûkîra! Gîa na vinya, we Zayuni; îkîra nguo ciaku irîa mbaro, we Jerusalemu, îtûûra rîrîa rîamûre; nîûndû gûtirî mûndû ûtarî mûruu kana ûrî na mûgiro ûgaatonya gwaku rîngî.

² Wîrivarive ume rûkûngûrî ûrûgame, îyovore mînyororo yume ngingorî yaku, we mwarî wa Zayuni, we ûtwîre wî mwove.

³ Nîûndû Ngai-Mûnene arauga atîrî, “Mue mwendirue ûkomborî gûtarî kîndû mûrutîrîtwe; na mûgaakûûrwa mûtakûrutîrwa mbeca.

⁴ Kîambîrîriarî andû akwa maathiîre Misiri na magîtûûra kuo marî ageni; vuvarî Asîria nîmaamavinyîrîrie vatarî na gîtûmi.

⁵ Kwoguo rîu nie nîratetheka na ndûî, rîrîa ngwona andû akwa matavîtwe mana? Arîa mamathaga nîkwa maretîîa, narîo rîîtwa rîakwa rîcambagua vîndî cionthe. Ûguo nîguo Ngai-Mûnene arauga.

⁶ Kwoguo andû akwa nîmakaamenya rîîtwa rîakwa, na mûthenya ûcio nîmakaamenya atî Nie nînie mbaragia na, Nînie nîrî ava.”

⁷ Kaî nî ûndû mwaro-î kwona mûndû arî irîmarî aretete ûvoro mwaro, akîanîrîra ûvoro wa thayû, na akîanagîrîra ûvonokio! Arera andû a Zayuni atîrî, “Ngai wenyu nîke ûrathana!”

⁸ Tegueni mûgambo wa arangîri aku, maraina vamwe nî gûkena! Nîûndû nîmareyonera na metho mao o ene, gûcoka kwa Ngai-Mûnene îtûûrarî rîa Zayuni!

⁹ Mue kûndû kûrîa gûcûkangu kwa Jerusalemu, ambîrîriani kwina vamwe mûkenete. Nîûndû Ngai-Mûnene nîavoreretie andû ake, nîakûûrîte Jerusalemu.

¹⁰ Ngai-Mûnene nîonanîtie vinya wake mûtheru kûrî andû a mavûrûri monthe, nayo mîthiia yonthe ya nthî nîîkona ûvonokio wa Ngai wetû.

¹¹ Thiîni, thiîni, mume kûu Babuloni, mûtikavutie kîndû wa kîonthe kîrî mûgiro! Îîtherieni mue mûkuuaga indo cia Ngai-Mûnene.

¹² Vîndî îno mûtikaauma kuo na îvenya, na mûtikaathiî mûvinyûrîte. Nîûndû Ngai-Mûnene nîke ûkaamûtongoreria, nake Ngai wa Isiraeli nîke ûkaamuma vuva amûgitîrîte.

Ndungata ya Ngai-Mûnene

¹³ Ngai-Mûnene arauga atîrî, “Ndungata yakwa nîkaathatûkwa wîrarî wayo, nîkaanenevua, yambararue na nîkaavewa gîtîîo mûno.

¹⁴ Wata ûrîa andû eengî maamakire rîrîa maamîonire, nîûndû ûthiû wayo warî mûcûkangie mûno na ndîekariî ta mûndû, na mûvuano wake ndwavuana ta wa mûndû;

¹⁵ nwaguo îkaamakia ndûrîrî nyîngî, nao athamaki magaakira ki, magegete nîûndû wake, nîûndû nîmakoona maûndû marîa matanerwa, na nîmageciria maûndû marîa mateguîte ûvoro wamo.”