Isaia 49 - ÎVUKU RÎA ÛVORO MWARO

Isiraeli nî Ûtheri wa Mavûrûri

¹ Tanthikîrîriani mue mavûrûri ma kûraca, tegani matû mue andû arîa mûtûûraga kûndû kûraca! Ngai-Mûnene aambîtire mbere ya njiarwe, aanthuurire nduîke ndungata yake nîrî îvurî rîa nyanya.

² Ke nîwatûmire ciugo ciakwa ciûvîge ta rûviû rûrîa rûûgî, na akînthitha rungu rwa kîruru Kîam njara yake. Aanduire ta mûguî ûrî mûvarîrie gûtûmîrwa, na akînthitha thiakarî yake.

³ Nîwacokire akîmbîra atîrî, “We Isiraeli wî ndungata yakwa; na nîwe ûkoonanagia riiri wakwa.”

⁴ Nwatî nînaugire atîrî, “Ndutîte wîra wa mana! Ndûmîrîte vinya yakwa na gûtirî ûndû ng'unîkîte naguo.” Kûnarî ûguo Ngai-Mûnene nîke ûkaanduîra ciira wakwa na kîvooto; na nîke ûkaandîva wîra wakwa.

⁵ Na rîu Ngai-Mûnene arauga atî; ûrîa wambîtire kuuma nîrî îvurî rîa nyanya, nîguo nduîke ndungata yake; nîguo njokie andû a Jakovu kûrî ke, nîguo njokanîrîrie andû a Isiraeli varî ke. Ngai-Mûnene nîamvete gîtîîo, na Ngai wakwa nîke ûtuîkîte vinya wakwa.

⁶ Ke augîte atîrî, “Tî ûndû mûvûthû gûtuîka ndungata yakwa, ûrûngamie rîngî mîvîrîga ya Jakovu, na kûrûnga andû a Isiraeli arîa maatigarire. Nwatî nîngûgûtua ûtheri kûrî andû a Ndûrîrî, nîguo andû onthe a gûkû nthî mavonoke.”

⁷ Ngai-Mûnene mûkûri wa Isiraeli na ûrîa Mûtheru wake, arera ûrîa ûnyararîtwe mûno, ûrîa ûmenetwe nî andû a mavûrûri na nî ndungata ya athamaki atîrî, “Athamaki nîmagaakwona na marûngame magûtîîe; anene wanao nîmakenamîrîria mothiû mao magûtîîe.” Mageeka ûguo nîûndû wa ûrîa nie Ngai-Mûnene nîrî mwîvokeku, Ûrîa Mûtheru wa Isiraeli, nîke ûkûthuurîte.

Gûtumwa rîngî kwa Jerusalemu

⁸ Ngai-Mûnene arauga atîrî, “Vîndî îrîa mbagîrîru, nînagûcokerie îvoya rîaku, mûthenya wa kûvonokania nînagûtethirie; nîngwigîte na ngarûtha kîrîkanîro na andû a mavûrûri monthe na njîra yaku. Nîngaatûma ûtûûre rîngî vûrûrirî ûrîa watiganîrue ûtarî kîndû, ûtuîke îgai rîenyu.

⁹ Nîûkera mîgwate atîrî, ‘Umani kûu njeera!’ Nao arîa marî ndumarî ûmeere atîrî, ‘Umîrani ûtherirî!’ Makonaga gîa kûrîa, kûrîa kuonthe makaavîtûkagîrîra, wana irîmarî ntheri nîmakoona gîa kûrîa.

¹⁰ Matikavûûta kana manyonda. Riûa kana ûrugarî wa werûrî itikaamavîvia, nîûndû nîmagaatongorerua nî ûrîa ûmendete, na nîakaamavira kûrîa manjî matherûkaga.

¹¹ “Nîngaarûtha njîra irîmarî ciakwa cionthe, na nîngaarûngaria njîra ciakwa.

¹² Andû akwa nîmakaauma kûndû kûraca, nao engî maume mwena wa rûgûrû na engî mwena wa îthûîro, na arîa engî maume mwena wa îveti.”

¹³ Mue îgûrû inani mûkenete! Wanamue nthî kenani! Mue irîma ambîrîriani kwina! Nîûndû Ngai-Mûnene nîaûmîrîrîtie andû ake, na nîakeguîra ntha andû ake arîa marathînîka.

¹⁴ Nwatî Zayuni aaugire atîrî, “Ngai-Mûnene nîandiganîrîtie, Mwathani wakwa nîariganîrîtwe nînie.”

¹⁵ Mûndûmûka nwa ariganîrwe nî kaana gake karîa arongithia, na arega kwîgua ntha nî mwana ûrîa aciarîte? Wana ethîrwa mûciari wa mûndûmûka nwa ariganîrwe nî mwana wake, nie ndikaariganîrwa nîwe.

¹⁶ Taroria nîngwandîkîte mvîîrî cia njara ciakwa; monaga nthingo ciaku vîndî cionthe.

¹⁷ Arîa magaagûtuma rîngî nîmagûka wa rîu, nao arîa maagûcûkangirie nîmakaauma kûrî we mathiî.

¹⁸ Vingûra metho ûrorie mîena yonthe na wone; andû aku onthe maûnganîte vamwe maûkîte kûrî we! Wata ûrîa nie ndûûraga mwoyo, ûgeekîra andû aya onthe ta nguo, wata ûrîa wîkagîra nguo cia kwîgemia nacio, na ûmeyove wata ûrîa mûviki eyovaga rîrîa akwîgemia na mathaga make.

¹⁹ “Nama vûrûri waku ûrîa mûcûkangie na ûgatiganîrua, nîûkethîrwa ûrî mûnini mûno wa gûtûûrwa nî andû aku; nao arîa maagûtavîte makethîrwa marî kûraca nawe.

²⁰ Ciana ciaku irîa waciarire ûrî îthamîriorî nîigaakwîra rîngî atîrî, ‘Vûrûri ûyû nî mûnini mûno, tûve vandû vengî va gûtûûra!’

²¹ Nîûgacoka wîyûrie na ngoro atîrî, ‘Nû wanjiarîre ciana ino cionthe? Nakuîrîrwe nî ciana ciakwa ngîtigwa takwa nîrî nthaata, navirirwe îthamîriorî na ngîtewa kûndû kûraca. Nwatî nû warerire ciana ino? Natigirwe kûu nîrî nienga, ciana ino nacio ciaumire kû?’ ”

²² Mwathani Ngai arauga atîrî, “Nîngambararîria andû a ndûrîrî njara yakwa, na mbûkîrîrie vendera yonwe nî andû; nao nîmakaarete anake enyu mamakuuîte na njara ciao, nao erîtu enyu mamakuuîte na ituro ciao.

²³ Athamaki magaatuîka amenyereri aku, nao aka ao matuîke akûreri. Nîmagaaturumithia mothiû mao nthî mbere yaku na magûtîîe; na nîmagaakwonia gîtîîo menyivîtie. Nawe nîûgaacoka ûmenye atî Nie, nînie Ngai-Mûnene; na atî arîa mambetagîrîra matigaaconorithua.”

²⁴ Nwa ûcuune mûndû njamba indo irîa atavîte? Kana ûvonokie mûndû mwaganu ovetwe na kîvooto?

²⁵ Nwatî Ngai-Mûnene arauga atîrî, “Wana indo irîa itavîtwe nî andû njamba nîigoocwa, na andû arîa movetwe nî njamba irîa irî vinya nîmakaavonokua, nîûndû nie nînie ngaarûa na andû arîa marûaga nawe, na nîngaavonokia ciana ciaku.

²⁶ Nîngaatûma arîa mamûvinyagîrîria marîe nyama ciao o ene, na marîwe nî nthakame yao o ene ta ndivei. Andû onthe nîmakaamenya atî Nie Ngai-Mûnene, nînie Mûvonokia waku, nînie Mûkûri waku, Ûrîa ûrî Vinya wa Jakovu.”