Isaia 48 - ÎVUKU RÎA ÛVORO MWARO

Kûma kîongo kwa andû a Ngai

¹ Tathikîrîriani ûndû ûyû, mue nyomba ya Jakovu, mue mwîtanîtue na rîîtwa rîa Isiraeli, mue mûrî a mûvîrîga wa Juda, arîa mwîvîtaga mûkîgwetaga rîîtwa rîa Ngai-Mûnene, na mugaga atî mûgoocaga Ngai wa Isiraeli, nwatî tîna njîra ya ma kana wagîrîru.

² Kûnarî ûguo mwîtîîaga mûgîîtanagia na îtûûra rîtheru, na mugaga atî mwîvokaga Ngai wa Isiraeli, ûrîa rîîtwa rîake nî Ngai-Mûnene mwene vinya wonthe.

³ Ngai-Mûnene arera andû a Isiraeli atîrî, “Nînarathire wa tene maûndû marîa mageekîka na ngîtûma mamenyekane; nînacokire ngîtûma mekîke wa rîmwe.

⁴ Nîûndû nînamenyaga atî we wî mûremi mûno, na kîongo gîaku kîûmîte ta cuuma, naguo ûthiû waku ûgekara ta gîcango.

⁵ Kwoguo nînakumbûrîre maûndû mau kuuma tene, nînakwîrire ûvoro wa mo mbere ya mekîke, nîguo ndûkauge atî: ‘Mûvuanano wakwa nîguo wîkîte maûndû mau, mûvuanano wakwa wa kumua na wa gûtwekua nîyo yatûmire maûndû mau mekîke.’

⁶ “Maûndû marîa wegwire, rîu nîûramona monthe; ûrarega kûmetîkia nîkî? Kuuma rîu ngaakwonagia maûndû macerû, maûndû mathithe marîa ûtaicî.

⁷ Maûndû mau marekîka rîu tî ma tene; ndwanegua ûvoro wamo mbere tiga ûmûnthî. Kwoguo ndûngiuga atî nîwaicî ûvoro wamo monthe.

⁸ Ndwanamegua, na ndwanamenya ûvoro wamo, ndwanegua maûndû mau na matû maku kuuma tene. Nîûndû nînaicî atî we warî mwaganu mûno, na atî kuuma gûciarwa gwaku we wetagwa mûregi.

⁹ “Nîûndû wa rîîtwa rîakwa nîngûthiria marakara makwa, nîûndû wa ûkumio wa rîîtwa rîakwa nîngwîrigîrîria marakara makwa, nîmarigîrîria nîguo ndikamûthirie.

¹⁰ Taroria nîngûtheretie na mwaki, nwatî tî ta ûrîa sîlûva îtheragua, nîngûgeretie na mwaki mûnene wa mathîna.

¹¹ Nîreka ûguo nîûndû wakwa nie mwene, rîîtwa rîakwa rîrarega gûtîîwa nîkî? Ndingîvecana riiri wakwa kûrî mûndû wîngî wanarî ûrîkû.”

Cairasi mûthamaki ûrîa Ngai-Mûnene athuurîte

¹² Ngai-Mûnene arauga atîrî, “Tanthikîrîria we Jakovu, tanthikîrîria we Isiraeli ngîgwîta! Nie nînie Ngai-Mûnene, nînie wa mbere na nînie wa mûthiia!

¹³ Nînie navandire mûcingi wa nthî na njara ciakwa, na ngîtambûrûkia îgûrû. Rîrîa neta îgûrû na nthî, nîimbîtîkaga irî vamwe.

¹⁴ “Ûnganani vamwe muonthe na mûthikîrîrie! Nî mûvuanano ûrîkû gatagatîrî ka mîvuanano îo waririe maûndû mau? Ke ûrîa Ngai-Mûnene endete, nîke ûgeeka Babuloni ûrîa Ngai-Mûnene endaga, na nîke ûkaatharîkîra Akalidei.

¹⁵ Nie nînie naririe maûndû mau na ngîmwîta, nînie namûtongoririe na mûvango wake nîûkaavua.

¹⁶ “Nguvîvîriani mwîgue ûrîa nguga, kuuma tene ndianarîria nthithorî, kuuma rîrîa maûndû mau maambîrîîrie gwîkîka Nie naarî wa kuo.” Na rîu Ngai-Mûnene mwene vinya wonthe, nîandûmîte na akamva vinya wa Roho wake.

Mûvango wa Ngai-Mûnene kûrî andû ake

¹⁷ Ngai-Mûnene Ûrîa Mûtheru wa Isiraeli mûvonokia waku, arauga atîrî, “Nie nînie Ngai-Mûnene, Ngai waku, nînie ngûrutaga maûndû ma gûkûguna, nînie ngûtongoragia njîra îrîa wagîrîrwe nî kûthiîrîra.

¹⁸ “Naarî kethîrwa nîweguîte maathani makwa! Thayû ûngîakûnyûrûrûkîre ta rûnjî, ûngîagîre na ûthingu mwîngî ta makûmbî ma manjî.

¹⁹ Njiarwa ciaku ingîengîvîte ta mûthanga, ciana ciaku ingîengîvîte ta tûthiga twa mûthanga, rîîtwa rîao rîtikaathengutua kana rîcûkangua.”

²⁰ Umani Babuloni, ûrani mume kûrî Akalidei! Anîrîrani ûndû ûyû mûkenete, ûmenyithanieni mîthiiarî yonthe ya nthî: ugani atîrî, “Ngai-Mûnene nîavonoketie ndungata yake Jakovu!”

²¹ Rîrîa aamatongoririe makîvîtûkîrîra werûrî matianyonda. Nîwatûmire manjî maume îthigarî nîûndû wao, nîwatûranirie îthiga na manjî makiuma mwatûkarî ûcio.

²² Nwatî Ngai-Mûnene arauga atîrî, “Andû arîa aganu matikaagîa na thayû.”