Isaia 47 - ÎVUKU RÎA ÛVORO MWARO

Îtuîro rîa Babuloni

¹ Ngai-Mûnene arauga atîrî, “Nyûrûrûka wîkarîre mûthetu, we mwîrîtu nthingi wa Babuloni; îkara mûtheturî nthî vandû vatarî na gîtî, we mwarî wa Akalidei! Nwatî kuuma rîu ndûgeetwa rîngî mûnini na ûtarî vinya.

² Oca mathiga ma kîthîi na ûthîe mûtu! Ruta gîtambaa gîaku gîa kûthitha ûthiû, ûrute nguo yaku îrîa ndaca! Gucagucia nguo ciaku na îgûrû, nîguo ûringe nyûnjî.

³ Andû nîmakoona njaga yaku, na nîmakoona gîconoko gîaku. Nie nîngerîvîrîria na ndikeguîra mûndû wanarî ûmwe ntha.”

⁴ Rîîtwa rîa mûkûri wetû nî Ngai-Mûnene mwene vinya wonthe, Ûrîa Mûtheru wa Isiraeli.

⁵ Ngai-Mûnene arauga atîrî, “We mwarî wa Akalidei îkara ûkirîte kivi na ûthiî ndumarî, nîûndû ndûgaacoka gwîtwa mûndûmûka mûthamaki wa mavûrûri!

⁶ Nînaarakarire nî andû akwa, ngîtûma andû arîa akwa manyitwe nî mûgiro. Nînamanenganîre kûrî we, nwatî we ndwameguîra ntha; wana arîa akûrû nîwamakinyîrîrie mûno.

⁷ Weîrire atî nîûtûûra wî mûndûmûka mûthamaki tene na tene, na ndweciria maûndû mama ngororî yaku, kana wîciria ûrîa gûgekara mûthiiarî.

⁸ “Kwoguo rîu thikîrîria we wendete gwîkenia, we wîkaraga ûtagûtangîka ûkîîraga na ngoro atî, ‘Nwanie tu na gûtirî wîngî tiga nie; ndigeekara ta mûndûmûka wa ndigwa, kana mbîgua ruuo rwa gûkuîrwa nî ciana.’

⁹ Maûndû mama moîrî magaaûka kûrî we wa rîmwe mûthenya ûmwe, gûkuîrwa nî ciana na gûtuîka mûndûmûka wa ndigwa, wana ethîrwa wî na ûrogi mwîngî, na wî na vinya mwîngî wa kûringa mbûgû.

¹⁰ “Ûtûûraga wîvokete waganu waku; weîraga atî gûtirî mûndû ûrakwona. Ûûgî waku na ûmenyo waku nîguo wakûvîtithirie, na weîraga na ngoro yaku atî: ‘Nie nînie tu na gûtirî wîngî tiga nie.’

¹¹ Nwatî nîûkaanyitwa nî maûndû macûku, na ndûkaavota kûmenya kûrîa maumîte. Nîûkaanyitwa nî mathîna, na ndûkaavota kûmathiria, maûndû ma gûkûthiria nîmagaaûka kûrî we wa rîmwe, marîa ûtanamenya ûvoro wamo.

¹² Îkara wîvokete ûgo na ûrogi waku mwîngî, indo irîa ûtwîre ûtûmagîra kuuma rîrîa warî mûnini. Ciavota gûgûtethia, ciavota gûtûma andû metigîre.

¹³ Ûtwîre wînogetie mana na mataaro maku meengî. Tiga andû acio mathomaga îgûrû maturî, arîa marî ûûgî wa njata maûke makûvonokie, arîa makûrathagîra wa mweri wa mweri, magakwîra maûndû marîa mageekîka kûrî we.

¹⁴ “Taroria andû acio magekara ta rûûa, na nîmakaavîvua na mwaki! Matikaavota kwîvonokia, kuuma rûrîrîmbîrî rwa mwaki. Mwaki ûcio ndûkavaana ta makara ma gwota, wana kana mwaki wa gwotwa.

¹⁵ Ûguo nîguo andû arîa mûrutithanagia wîra nao magaatuîka kûrî we, andû acio mûtwîre mûceraga nao kuuma rîrîa warî mûnini. Nîmakaathiî wa mûndû njîra yake, na vatigaatigwa mûndû wanarî ûmwe wa gûkûvonokia.”