Isaia 44 - ÎVUKU RÎA ÛVORO MWARO

Ngai-Mûnene nîke Ngai tu

¹ “Tathikîrîria rîu we Jakovu, ndungata yakwa, Isiraeli ûrîa nthurîte, tanthikîrîria.

² Ngai-Mûnene ûrîa wakûmbire arauga atîrî, “Nakûmbire îvurî rîa nyûkwe na nînie ngûtethagia. Tiga gwîtigîra we Jakovu ndungata yakwa, Jeshuruni ûrîa nthurîte ndûgetigîre.

³ “Nîûndû nîngetîrîria manjî vûrûrirî ûrîa mûnyondu, na mbîkîre nyûnjî vûrûrirî ûrîa mûmû. Nîngetîrîria njiarwa ciaku Roho wakwa, na mbîtîrîrie ciana ciaku irathimo ciakwa.

⁴ Igaakûra ta nyaki îmerete vandû varî na manjî meengî, ta mîtî îrîa îkûraga rûtererî rwa nyûnjî.

⁵ “Mûndû ûmwe nîakaauga atîrî, ‘Nie nîrî wa Ngai-Mûnene,’ na wîngî nîageîtania na rîîtwa rîa Jakovu, nake wîngî nîakaandîka njararî yake, ‘Wa Ngai-Mûnene,’ na eîtanagie na rîîtwa rîa Isiraeli.”

⁶ Ngai-Mûnene mwene vinya wonthe Mûthamaki na Mûkûri wa Isiraeli arauga atîrî, “Nie nînie wa mbere na nînie wa mûthiia; gûtirî ngai îngî tiga nie.

⁷ Nû wîkariî tanie, ta nîauge, tiga onanie na arie arî mbere yakwa. Nû wanîrîre tene ûvoro wa maûndû marîa magekîka vuvarî? Tiga atwîre maûndû marîa magekîka.

⁸ Tigani kwîgua guoya, wana kana mwîtigîre! Na kinthî ndiamwîrire maûndû kuuma tene na ngîmumbûrîra mo? Na mue mûrî aira akwa. Nîkwa kûrî na ngai îngî tiga nie? Nî kûrî Îthiga rîngî; Nie ndiîcî rîngî.”

Ûgooci wa ngai cia mîvuanano nî mûnyarare

⁹ Andû onthe arîa marûthaga mîvuanano nî a mana, na maûndû marîa mamakenagia matirî kîguni. Arîa maigoocaga mationaga na matiîcî atî nîmagaaconorithua.

¹⁰ Gûtirî vata wa kûthondeka ngai kana gwîturîra mûvuanano wa ngai îtangîguna mûndû wanarî atîa.

¹¹ Nama, arîa onthe magoocaga ngai icio nîmagaaconorithua, wana arîa marutaga wîra ûcio nwa andû tu. Tiga magomane vamwe onthe na meyumîrie, nîmagetigîra na maconoke.

¹² Mûturi wa indo cia cuuma ocaga cuuma na akamîrutîra wîra akîmîvîvagia na mwaki. Amîturaga na nyondo na akamîthondeka na njara yake îrî vinya. Vîndî îo araruta wîra ûguo, ke nîavûtaga, akanyonda, akanoga na akathira vinya.

¹³ Mûvundi wa mbaû athimaga rûvaû, akarûkurura na karamu; nîacokaga akarûtenderia na randa. Nîacokaga akarûtenderia na randa rûgîe na mûvuanano ta wa mûndû na ûrî mûthaka, nîguo wîkarage varîa wigîtwe.

¹⁴ Atemaga mîtarakwe; kana akathuura mûtî wa mûkarakaba kana wa mûvuru na akareka mûtî ûcio ûkûre vamwe na mîtî ya mûtitû. Wana nîavandaga mûtarakwe na yo mbura îgaûkûria.

¹⁵ Vuva wa ûguo, mûtî ûcio nîûtuîkaga wa kunwa ngû nî mûndû. Nîocaga gîcunjî kîmwe Kîamguo, nakîo gîcunjî kîu kîngî akaumia ngai ya mûvuanano nakîo na akamîgooca.

¹⁶ Nî akagia mwaki na gîcunjî kîmwe Kîam mûtî ûcio, agacoka agokia nyama na gîcunjî kîmwe Kîamguo na akarîa akavaa. Nîacokaga agota mwaki na akauga atîrî, “Rîu nînegua ûrugarî! Nînona mwaki!”

¹⁷ Nîacaga ngai yake ya mûvuanano na gîcunjî kîu kîngî Kîam mûtî ûcio, na agaûturîria maru akaûgooca. Aûvoyaga akiugaga atîrî, “Mvonokia, nîûndû we nîwe ngai yakwa!”

¹⁸ Andû acio matiîcî ûndû, wana kana mecirie. Nîavinge metho mao, nîguo matikavote kwona, na makavingwa meciria mao, nîguo matikavote gûtaûkîrwa.

¹⁹ Gûtirî mûndû ûririkanaga, kana agîa ûûgî, wana kana akamenya maûndû na auge atîrî, “Nînavîvirie gîcunjî kîmwe Kîam mûtî ûyû na mwaki, na nînarugire mîgate na makara ma guo, na ngîokia nyama na ngîmîrîa. Nîngîvota atîa kûthondeka matigari ma mûtî ûcio kîndû gîa kûgoocwa kîrî mûgiro, na ndurîrie gîcunjî kîu Kîam mûtî maru nîkîgooce?”

²⁰ Mûndû ûcio arîcaga mûu, nîûndû meciria make nîmo mamûveenetie, akaremwa nî kwîvonokia wana kana kuga atîrî, “Kinthî tî maveeni nyitîte na njara yakwa ya ûrîo?”

Ngai-Mûnene, nîke Mûmbi na Mûvonokia

²¹ Ngai-Mûnene arauga atîrî, “We Jakovu, taririkana, we Isiraeli taririkana atî we wî ndungata yakwa. Nie nînie nakûmbire nîguo ûndungatagîre, we Isiraeli nie ndikaariganîrwa nîwe.

²² Nîmvatîte mavîtia maku ta îtu, na mevia maku ta nundu; njokererani nîûndû nîmûkûûrîte.”

²³ Kenani mue arîa onthe mûtûûraga îgûrû, nîûndû Ngai-Mûnene nîekîte ûguo! Anîrîrani mue nthî kûrîa kûriku! Inani mûkenete mue irîma, mîtitû na mîtî yonthe îrîa îrî kuo! Nîûndû Ngai-Mûnene nîakûûrîte Jakovu, na nîatûûra akumagua vûrûrirî wa Isiraeli.

²⁴ “Nînie Ngai-Mûnene ûrîa wagûkûûrire; nînie nakûmbire ûrî nda ya nyûkwe. Nînie Ngai-Mûnene mûmbi wa indo cionthe. Nînie natambûrûkirie îgûrû na ngîûmba nthî na vinya wakwa, gûtirî mûndû wandethirie.

²⁵ Nînthiragia vinya ûgo wa aragûri arîa maveenanagia, na ngathiria vinya andû arîa monaga maûndû. Nînie ndeganaga na ciugo cia andû arîa aûgî, na ngatua ûûgî wao ûrimû.

²⁶ Nînie mbîkagîra ciugo cia ndungata yakwa vinya, na ngavingia mataaro ma anjaama akwa. Nînie mbîraga Jerusalemu atî andû nîmagaatûûra kuo rîngî, namo matûûra ma Juda nîmagaatumwa rîngî, na nîngaatuma rîngî matûûra ma kuo marîa macûkangu.

²⁷ Nînie mbugaga kûrîa kûrî manjî mariku kûvûe, na nîngaavûîthia nyûnjî cienyu.

²⁸ Nînie mbîraga mûthamaki Cairasi atî: ‘We nîwe ûgaatuîka mûthamaki vandûrî vakwa, we nîûkaavingia mîvango yakwa yonthe: nîûkaathana Jerusalemu îtumwe rîngî, na mûcingi wa hekarû ûtumwe rîngî.’ ”