Isaia 41 - ÎVUKU RÎA ÛVORO MWARO

Ngai nîwerîre Isiraeli atî nîakûmatethia

¹ Ngai arauga atîrî, “Takirani mûnthikîrîrie mue mûtûûraga rûtere rwa îria! Mue andû a ndûrîrî gîani na vinya mûcerû; îyumîrieni na mwarie maûndû menyu, tigani tûgomane nîguo tûtue ciira tûrî vamwe.

² “Nû watûmire mûndû kuuma mwena wa îrathîro, na agîtûma athiî akîvootanaga kûndû kuonthe? Nînie ndûmaga avoote mavûrûri, na ngatûma athage athamaki, ndûmaga mavaraganue na rûviû rwake takwa marî rûkûngû, nîmanyaganagia na mîguî yakwa ta ûrîa macaki manyaganagua nî rûkûngi.

³ Ke amavinyûragia na akamavîtûka na ndone thîna, wana angîthîrwa athiîrîrîte njîrarî atanavîtûkîrîra rîngî.

⁴ Nû watûmire maûndû mau monthe mekîke? Nû wavangire ûrîa maûndû marûmanagîrîra kuuma Kîammbîrîria? Nie Ngai-Mûnene, naarî kuo kuuma Kîammbîrîria, na nînie ngethîrwa kuo nginya kîrîkîro.

⁵ “Arîa matûûraga rûtere rwa îria nîmoonire ûndû ûcio na magîîtigîra, andû a nthî yonthe nîmarainaina nî guoya, onthe macemanirie vamwe makînaûka.

⁶ Wa mûndû aûmagîrîria ûrîa wîngî, akîmwîraga atîrî, ‘Îyûmîrîrie!’

⁷ Mûtumi wa indo cia mbaû nîaraûmîrîria, mûturi wa indo cia thaavu, nake mûndû ûrîa ûnyorokagia mûvuanano na nyondo, nîaraûmîrîria mûndû ûrîa ûûnyitithanagia na mîcumarî. Onthe marauga atîrî: ‘Mûvuanano ûcio nî mwaro,’ nao nîmaranyitithania mûvuanano ûcio na mîcumarî, na akaûnyinyia mûno nîguo ndûkagwe.

⁸ “Nwatî we, Isiraeli ndungata yakwa, we Jakovu ûrîa nie nthurîte, we rûciaro rwa Iburahimu mûrata wakwa.

⁹ We ûrîa naakûretire kuuma mîthiia ya nthî; naagwîtire kuuma kûrî ituri ciayo irîa irî kûraca mûno, ngîkwîra atî: ‘We ûrî ndungata yakwa, nîngûthuurîte na ndigûteete.’

¹⁰ Tiga gwîtigîra, nîûndû nîrî vamwe nawe, ndûkegue guoya, nîûndû nînie Ngai waku! Nîngaakwongerera vinya na ngûtethie, nîngaagûtirîrîra na njara yakwa ya ûthingu.

¹¹ “Taroria, arîa onthe maakûrakarîre nîmagaaconoka na maconorithue. Arîa magianaga nawe magaatuîka kîndû vatarî na nîmagaakua.

¹² Ûgaacaria acio magianaga nawe, nwatî ndûkamoona, arîa marûaga nawe magaatuîka kîndû vatarî.

¹³ Nîûndû nie Ngai-Mûnene Ngai waku, nîngûnyitaga njara yaku ya ûrîo, na ngakwîra atî: ‘Tiga gwîtigîra, nîngûgûtethia.’ ”

¹⁴ Ngai-Mûnene arauga atîrî, “We Jakovu, kagunyû gaka, tiga gwîtigîra, mue andû a Isiraeli, nîngaamûtethia, nie nînie mûvonokia wenyu Ûrîa Mûtheru wa Isiraeli.

¹⁵ Nîngaatûma mûtuîke ta mûtî wa kûvûûra ngano, ûrî na magego macerû na maûgî, nîmûkaavûra irîma na mûivaraganie, mûgaakinyanga tûrîma tûtuîke ta rûkûngû.

¹⁶ Mûkaavuva irîma icio naruo rûkûngi rûigûrûkie kûndû kûraca, naruo rûkûngi rûnene rûinyaganie. Namue nîmûgaakena nîûndû wa Ngai-Mûnene, na mûkumie Ûrîa Mûtheru wa Isiraeli.

¹⁷ “Rîrîa athîni na avatari maracaria manjî matakûmona, na rîrîa mîmero yao îrî mîng'arûku nî kûnyonda, nînie Ngai-Mûnene ngaamacokeria, nie Ngai wa Isiraeli ndikaamatiganîria.

¹⁸ Nîngaatûma nyûnjî itherûke kuuma irîmarî irîa itarî kîndû, na ithima cia manjî itherûke kûu Kîamndarî, nîngaatûma kûu werûrî kûgîe maria ma manjî, nakuo nthî nyûmû ndûme kûgîe na ithima cia manjî.

¹⁹ Nîngaavanda mîtarakwe kûu werûrî, mîgaa, mîandathi na mîtamaiyû, na mvande mîvondo mîcindanûgû na mîkarakava vamwe,

²⁰ nîguo andû mone na mamenye, mecirie na mataûkîrwe vamwe, atî Ngai-Mûnene nîke wîkîte ûguo. Ûrîa Mûtheru wa Isiraeli nîke wîkîte ûndû ûyû.”

Ngai-Mûnene nîwakararirie ngai cia maveeni

²¹ Ngai-Mûnene mûthamaki wa Jakovu arauga atîrî, “Mue ngai cia mavûrûri reteni ciira wenyu, ûkani mûvecane ivooto cienyu!

²² Reteni ivooto icio na mûtûîre ûrîa gûgekara. Twîreni maûndû marîa maatuîkîkire tene, nîguo twîcirie ûvoro wamo, nîguo tûmenye ûrîa makaarigîrîria, kana mûtwîre maûndû marîa magaaûka.

²³ Twîreni maûndû marîa magaaûka vuvarî, nîguo tûmenye atî mwî ngai! Îkani ûndû mwaro kana ûndû mûcûku, nîguo tûmake na twîtigîre!

²⁴ Mue mûtirî kîene, na wîra wenyu nîwa mana, mûndû ûrîa ûmûgoocaga arî na mûgiro.

²⁵ “Nîndûmîte mûndû aume mwena wa rûgûrû nake nîmûku, nîmûthuurîte kuuma mwena wa îrathîro, nake nîagaakaîra rîîtwa rîakwa. Ke nîagaakinyanga athamaki ta yûmba, ta ûrîa mûmbi wa nyûngû akinyangaga yûmba.

²⁶ Nû waugîte ûndû ûyû kuuma Kîammbîrîria, nîguo tûûmenye. Nû wambîrîrie kûwanîrîra, nîguo tuge atî nîwaririe ûma? Gûtirî wanarî ûmwe wa cienyu wagwetire ûndû ûyû, na gûtirî mûndû weguire ciugo cienyu.

²⁷ Nie Ngai-Mûnene nînie naarî wa mbere kwîra Zayuni ûvoro, nînatûmire mûnjaama kûu Jerusalemu akavire ndûmîrîri ya ûvoro mwaro.

²⁸ Nwatî naroria, ndirona mûndû, gatagatîrî ka mîvuanano îno, gûtirî mûtaarani, ûngîvota gûcokia kîûria vîndî îrîa naûria.

²⁹ Taroria, ngai icio ciao cionthe nî cia maveeni, mawîra mao monthe nîma mana, mîvuanano yao ya kûrarûrwa ndîrî vinya na nî ya mana.”