Isaia 40 - ÎVUKU RÎA ÛVORO MWARO

Ciugo cia kûmanîrîria

¹ Ngai wenyu arauga atîrî, “Ûmîrîriani andû akwa, thiîni mûkamaûmîrîrie!

² Arîriani andû a Jerusalemu na ûvoreri. Na mûmeere atî ûkomborî ûrîa mararî nîwathira, na mevia mao nîmoverwa. Na atî Ngai-Mûnene amaverithîtie kwîgana nîûndû wa mevia mao monthe.”

³ Kûrî na mûndû ûranîrîra arî werûrî akiugaga atîrî, “Thondekani varavara ya Ngai-Mûnene! Rûngariani njîra ya Ngai wetû werûrî!

⁴ Cianda cionthe nîigeecûrua, na irîma cionthe na tûrîma tûvaraganue. Nakuo kûrîa gûtarî kûrûngarû kûrûngarue, na kûrîa gûtarî kwaraganu kwaraganue.

⁵ Naguo riiri wa Ngai-Mûnene nîûkonanua, nao andû onthe nîmakawona, nîûndû Ngai-Mûnene nîke ugîte ûguo.”

⁶ Kûrî na mûgambo waugire atîrî, “Anîrîra!” Nanie ngîûria atîrî, “Manîrîre ndûî?” “Anîrîra atî: Andû onthe mekariî ta nyaki, ûthaka wao wîkariî ta maûa marî mûgûndarî.

⁷ Nyaki nîyûmaga namo maûa makavova, rîrîa rûkûngi rwa Ngai-Mûnene rwavurutana îgûrû rîamo; nama, andû mekariî ta nyaki.

⁸ Nyaki nîyûmaga namo maûa makavova, nwatî kiugo Kîam Ngai wetû gîgaatûûra tene na tene.”

⁹ Unûkia îgûrû rîa kîrîma kîraca na îgûrû we Zayuni, anîrîra ûvoro ûrîa mwaro! Ugîrîria na vinya we Jerusalemu, anîrîra ûvoro mwaro. Ugîrîria na ndûgetigîre na wîre matûûra ma Juda atî: “Ûyû nîke Ngai wenyu!”

¹⁰ Taroria Mwathani Ngai-Mûnene nîaûkîte na vinya, vinya wake nîguo ûrathana, nîaûka na andû arîa avonoketie na iveo cia andû ake.

¹¹ Akaarîthia ndîthia yake ta mûrîthi, agaacokanîrîria tûgondu na njara ciake, na atûkuue atuigîrîrîte kîthûrirî gîake, na atongorerie ng'ondu irîa irongithia wa kavora.

Gûtirî kîndû kîngîringithanua na Ngai wa Isiraeli

¹² Nû wanathima manjî ma îria na rûvî rwake kana akathima matu na njara ciake? Nû ûngîvota gwîkîra mûthetu wa nthî gîkomberî, kana athime irîma na tûrîma na kîthimi?

¹³ Nû ûngîvota kwonereria Roho wa Ngai-Mûnene ûrîa agwîka, kana kûmûtaara ûrîa angîka?

¹⁴ Ngai aavoire ûrîkû kîrîra nîguo ataûkîrwe, na nû wamûthomithirie njîra ya kîvooto? Nû wamûthomithirie ûmenyo, na akîmwonia njîra ya gûtaûkîrwa?

¹⁵ Kûrî Ngai-Mûnene mavûrûri nîta îtata rîa manjî rîrî ndoorî, nîta rûkûngû rûrî kîthimirî, kûrî ke, icîgîrîra nîta rûkûngû rûvinyu.

¹⁶ Mûtitû wa Lebanoni ndûngiuma ngû mbîganu, kana nyamû ciakuo ciîgana cia kûmûrutîra îtega rîa kûvîvua.

¹⁷ Mavûrûri monthe nîta kîndû vatarî mbere yake, kûrî ke nîta kîndû vatarî.

¹⁸ Kwoguo mûngîringithania Ngai na ndûî, kana nîndûî mûngîmûvuanania nakîo?

¹⁹ Nwa aringithanue na mûvuanano ûrîa umîtue nî mûndû, nake mûturi wa indo cia thaavu akaûvaka thaavu, na akaûgemia na mîkathî ya sîlûva?

²⁰ Mûndû ûrîa mûthîni athuuraga mûtî ûrîa ûtangîora. Nîacokaga agacaria mûndû ûrî na wara wa kumia, na akamumîria mûvuanano ûrîa ûtangîgwa.

²¹ Anga mue mûtiîcî? Anga mûtirî mwegua? Anga mûtierwa kuuma Kîammbîrîria? Anga mûtianataûkîrwa kuuma rîrîa nthî yaûmbirwe?

²² Nthî yaûmbirwe nî ûcio wîkaragîra gîtî gîake Kîam ûnene îgûrû maturî, na kûrî ke andû arîa matûûraga nthî nîta mvandi. Ke atambûrûkîtie matu ta gîtambaa, na agakûnjûra gîtambaa kîu ta îgema rîa gûtûûrwa.

²³ Ke nîagwîthagia anene a nthî, na athamaki akamatua kîndû vatarî.

²⁴ Wa rîrîa mavandwa na mambîrîria kûmera, wana matarî aumu mîri ta ûrîa mûtî ûtonyagia mîri mûtheturî, Ngai-Mûnene angîmavuva na mîvevû nîkwa mavovaga, rûkûngi rûnene rûmagûrûkagia ta macaki.

²⁵ Ûrîa Mûtheru araûria atîrî, “Nîûrîkû mûngîningithania nake, kûrî na wîngî wîkariî tanie?”

²⁶ Taroriani îgûrû mwone! Nû waûmbire indo icio cionthe? Nî ûrîa ûitongoragia ta athigari ake a mbaara, nîaicî cionthe ûrîa ciîgana, aciîtaga cionthe na marîîtwa ma cio. Gûtirî wanarî kîndû kîmwe kîthagîrwa gîtarî vo, nîûndû Ngai-Mûnene arî vinya nyîngî.

²⁷ We Isiraeli njiarwa cia Jakovu, nîndûî gîtûmaga warie, nîndûî gîtûmaga uuge atî, “Ngai-Mûnene ndatwîciragia, na Ngai wetû ndatûtucagîra ciira na kîvooto.”

²⁸ Anga mue mûtiîcî? Anga mûtirî egu? Ngai-Mûnene nîke Ngai ûrîa ûtûûraga tene na tene, nîke mûmbi wa indo cionthe cia nthî. Ke ndathiraga vinya kana anoga, ûmenyo wake ndûngîmenyeka nî mûndû.

²⁹ Nîavecanaga vinya kûrî arîa athiru vinya, nake ûrîa ûtarî na ûvoti nîamwongagîrîra vinya.

³⁰ Wana andû arîa ethî nîmakaathira vinya na manoge, na andû arîa matarî akûrû nîmakaagwa nî kûnoga.

³¹ Nwatî arîa metagîrîra Ngai-Mûnene nîmakoongererwa vinya wao, makaagûrûkaga îgûrû na mathagu ta nderi, makaavinyûra na matikaanoga, makaathiîcaga na magûrû na matikaathira vinya.